Trump on Sri Lanka:  अमेरिकेचे दोन वरिष्ठ अधिकारी श्रीलंकेच्या स्वतंत्र दौऱ्यांवर कोलंबो याठिकाणी दाखल झाले आहेत. यामध्ये पॅसिफिक हवाई दलाचे कमांडर जनरल केविन श्नाइडर यांचा समावेश आहे. अधिकाऱ्यांनी दिलेल्या माहितीनुसार, या दौऱ्यांचा मुख्य उद्देश संरक्षण, सुरक्षा आणि आर्थिक सहकार्य हा आहे. सामरिकदृष्ट्या महत्त्वाच्या हिंद महासागर क्षेत्रात वॉशिंग्टनचा वाढता सहभाग पाहता हे दौरे महत्त्वपूर्ण मानले जात आहेत.

अमेरिकन दूतावासाने दिलेल्या माहितीनुसार, श्नाइडर तीन दिवसांच्या दौऱ्यासाठी रविवारी श्रीलंकेत दाखल झाले असून, हा दौरा २४ जून रोजी संपेल. दक्षिण आणि मध्य आशियाई घडामोडींचे सहाय्यक परराष्ट्र सचिव एस. पॉल कपूर हे देखील तीन दिवसांच्या दौऱ्यासाठी रविवारी कोलंबो येथे दाखल झाले.

हिंद महासागर क्षेत्रात वाढत्या भू-राजकीय स्पर्धेच्या काळात हे उच्चस्तरीय दौरे होत आहेत, आणि चीनने अलिकडच्या वर्षांत आपली पायाभूत सुविधांमधील गुंतवणूक आणि सागरी उपस्थिती वाढवली आहे.

अमेरिकेचा खरा हेतू काय आहे? Trump on Sri Lanka: 

अमेरिका आपल्या सर्वसमावेशक इंडो-पॅसिफिक धोरणाचा भाग म्हणून, श्रीलंकेसह या प्रदेशातील देशांसोबत संरक्षण, सुरक्षा आणि आर्थिक संबंध अधिक दृढ करू पाहत आहे. अमेरिकी दूतावासाने दिलेल्या माहितीनुसार, श्नाइडर आपल्या दौऱ्यात श्रीलंकन ​​सरकार आणि संरक्षण विभागातील वरिष्ठ अधिकाऱ्यांची भेट घेतील, ज्यात संरक्षण मंत्रालय आणि श्रीलंकन ​​हवाई दलाच्या नेत्यांचा समावेश आहे. यावेळी दूतावासाने,”हवाई आणि सागरी निगराणी, सायबर सुरक्षा, आपत्कालीन प्रतिसाद आणि प्रादेशिक सुरक्षा या क्षेत्रांतील सहकार्य वाढवण्यावर चर्चेचा भर असेल” असे म्हटले आहे.

श्नाइडर इंडो-पॅसिफिक प्रदेशातील सर्व अमेरिकी हवाई दलाचे कर्मचारी आणि संसाधनांवर देखरेख करतात. दूतावासाने या दौऱ्याचे वर्णन अमेरिका-श्रीलंका संरक्षण भागीदारीच्या वाढत्या सामर्थ्याचे प्रतीक असे केले आहे.

तसेच, संयुक्त सराव, लष्करी देवाणघेवाण आणि वारंवार होणाऱ्या वरिष्ठ-स्तरीय संवादावर आधारित, विस्तारत असलेल्या द्विपक्षीय संबंधांमधील हा एक नवीन महत्त्वाचा टप्पा असल्याचेही म्हटले आहे. दूतावासाने म्हटले आहे की, शांतता, सुरक्षा आणि समृद्धी टिकवून ठेवण्याच्या सामूहिक प्रयत्नांमध्ये अमेरिका श्रीलंकेला एक आवश्यक भागीदार मानते.

आपल्या दौऱ्यात, कपूर श्रीलंकेच्या वरिष्ठ नेत्यांसोबत सुरक्षा सहकार्य आणि प्रादेशिक मुद्द्यांवर चर्चा करतील. द्विपक्षीय व्यापार आणि गुंतवणुकीचे संबंध वाढवण्यावर चर्चा करण्यासाठी ते खाजगी क्षेत्रातील अधिकारी आणि अमेरिकी कंपन्यांच्या प्रतिनिधींनाही भेटतील.

दूतावासाने म्हटले आहे की, ही भेट समृद्धी आणि सुरक्षिततेला चालना देणारी भागीदारी अधिक दृढ करण्याच्या, तसेच हिंद महासागरातील एक प्रमुख भागीदार म्हणून श्रीलंकेसोबत सहकार्य अधिक सखोल करण्याच्या राष्ट्राध्यक्ष डोनाल्ड ट्रम्प यांच्या वचनबद्धतेचे प्रतीक आहे.