Trinity College-QNX MoU: के. जे. एज्युकेशनल इन्स्टिट्यूटच्या शैक्षणिक संकुलातील ट्रिनिटी कॉलेज ऑफ इंजिनिअरिंग अँड रिसर्चने उद्योग-शिक्षण दुवा अधिक मजबूत करण्याच्या दिशेने महत्त्वाचे पाऊल उचलले आहे. संस्थेचे संस्थापक अध्यक्ष कल्याणराव जाधव यांच्या संकल्पनेतून आणि महाविद्यालयाचे प्राचार्य डॉ. अभिजित औटी यांच्या पुढाकाराने दि. ९ एप्रिल २०२६ रोजी बेंगळुरू येथील हयात हॉटेलमध्ये QNX कंपनीसोबत सामंजस्य करार (MoU) करण्यात आला. या करारासाठी पुणे विभागातून विविध निकषांच्या आधारे केवळ चार महाविद्यालयांची निवड करण्यात आली होती. कार्यक्रमाला QNX कंपनीचे नॅशनल हेड राज जैन उपस्थित होते. एम्बेडेड ऑपरेटिंग सिस्टीम आणि ऑटोमोटिव्ह सॉफ्टवेअर क्षेत्रात QNX ही जागतिक स्तरावर अग्रगण्य कंपनी असून ती वाहननिर्मिती, औद्योगिक आणि तंत्रज्ञान क्षेत्रातील कंपन्यांना सुरक्षित व विश्वासार्ह सॉफ्टवेअर प्लॅटफॉर्म उपलब्ध करून देते. या सामंजस्य कराराअंतर्गत विद्यार्थ्यांना QNX Embedded Software चे मोफत लायसन्स, प्राध्यापकांसाठी मोफत प्रशिक्षण तसेच विद्यार्थी आणि प्राध्यापकांना प्रमाणपत्र (Certification) मिळणार आहे. याशिवाय पात्र विद्यार्थ्यांना इंटर्नशिप आणि प्लेसमेंटच्या संधी उपलब्ध होणार आहेत. या उपक्रमामुळे विद्यार्थ्यांना आधुनिक एम्बेडेड सॉफ्टवेअर तंत्रज्ञानाचे प्रशिक्षण मिळून करिअरच्या नव्या संधी खुल्या होणार आहेत. तसेच स्टार्ट-अप आणि स्वयंरोजगाराची प्रेरणा देण्यावरही विशेष भर दिला जाणार आहे. या प्रसंगी कल्याणराव जाधव यांनी सांगितले की, विद्यार्थ्यांच्या उज्ज्वल भविष्यासाठी संस्था सातत्याने प्रयत्नशील आहे. औद्योगिक युगात जागतिक दर्जाचे ज्ञान, उद्योजकतेची दृष्टी आणि आर्थिक नियोजनाची जाणीव आवश्यक आहे. सूक्ष्म, लघु व मध्यम उद्योगांच्या संधींचा योग्य वापर केल्यास यश निश्चित मिळू शकते, असे त्यांनी नमूद केले. प्राचार्य डॉ. अभिजित औटी यांनी सांगितले की, या करारामुळे उद्योग, शिक्षण आणि रोजगार यांचा परस्पर संबंध अधिक दृढ होईल. विद्यार्थी केवळ नोकरीकडे न पाहता उद्योजकतेकडे वळतील आणि त्यांच्यात आत्मविश्वास वाढेल. प्राध्यापकांसाठीच्या प्रशिक्षणामुळे नवीन तंत्रज्ञानाचे ज्ञान विद्यार्थ्यांपर्यंत पोहोचवणे अधिक प्रभावी होईल, असे त्यांनी सांगितले. या MoU साईनिंग कार्यक्रमासाठी प्राचार्य डॉ. अभिजित औटी यांच्यासह प्रा. विराज बर्गे (डायरेक्टर – ट्रेनिंग अँड प्लेसमेंट) उपस्थित होते. संस्थेचे कार्यकारी संचालक मेजर जनरल (निवृत्त) समीर कल्ला यांनी महाविद्यालयाच्या निवडीबद्दल समाधान व्यक्त करत विद्यार्थ्यांना उज्ज्वल भविष्यासाठी शुभेच्छा दिल्या. तसेच संस्थेच्या पदाधिकारी हर्षदा जाधव यांनी या उपक्रमामुळे विद्यार्थ्यांना उद्योगाभिमुख कौशल्ये विकसित करण्यास मदत होईल, असे सांगत करारासाठी शुभेच्छा दिल्या. संस्थेचे पदाधिकारी विनोद जाधव, विभावरी जाधव देशमुख तसेच संचालक डॉ. हेमंत देशमुख आणि टेक्निकल संचालक डॉ. फुलमबरीकर यांनीही या उपक्रमाचे स्वागत करून शुभेच्छा व्यक्त केल्या.
