Sambhaji Bhide : दहीहंडी आणि आगामी गणेशोत्सवाच्या पार्श्वभूमीवर डीजे, डॉल्बी आणि मोठ्या आवाजाच्या साऊंड सिस्टीमचा मुद्दा पुन्हा चर्चेत आला आहे. शिवप्रतिष्ठानचे संस्थापक संभाजी भिडे यांनी हिंदू सणांमध्ये डीजे-डॉल्बीचा वापर करण्यास तीव्र विरोध केला आहे. तसेच दहीहंडीच्या कार्यक्रमांमध्ये महिलांना नाचवण्याच्या प्रकारावरही त्यांनी नाराजी व्यक्त केली.  (Sambhaji Bhide)

दहीहंडी हा हिंदू संस्कृती आणि परंपरेशी जोडलेला सण असल्याचे सांगत भिडे यांनी त्याचे स्वरूप बदलण्यास विरोध केला. दहीहंडीच्या कार्यक्रमात महिलांना नाचवणे योग्य नसून असे कार्यक्रम आयोजित करणाऱ्यांना त्यांनी आक्रमक शब्दांत ‘देशद्रोही’ संबोधले आहे. दहीहंडीमध्ये अभिनेत्री आणि नृत्यांगनांचे कार्यक्रम आयोजित करण्यावरून यापूर्वीही सोशल मीडियावर चर्चा झाली होती.  (Sambhaji Bhide)

‘डॉल्बीतून देशाला काय बळ मिळते?’  (Sambhaji Bhide)

डीजे आणि डॉल्बीच्या वापरावरही भिडे यांनी प्रश्न उपस्थित केला. मोठ्या आवाजात डॉल्बी वाजवून देशाला किंवा समाजाला काय फायदा होतो, असा सवाल त्यांनी केला. हिंदू सणांमधून डीजे आणि डॉल्बी हद्दपार करण्याचे आवाहन त्यांनी केले. सण-उत्सवांचे धार्मिक आणि सांस्कृतिक स्वरूप जपले पाहिजे, अशी त्यांची भूमिका आहे.

दरम्यान, मनसे अध्यक्ष राज ठाकरे यांनीही दहीहंडीतील डीजे, डॉल्बी, लेझर लाईट आणि महिलांच्या नृत्याच्या कार्यक्रमांवर आक्षेप घेतला आहे. मोठ्या आवाजामुळे नागरिकांच्या आरोग्यावर परिणाम होऊ शकतो, त्यामुळे सण साजरे करताना नियमांचे पालन झाले पाहिजे, अशी भूमिका त्यांनी मांडली आहे.

महाराष्ट्रात ध्वनीप्रदूषणाबाबत स्थानिक प्रशासनाकडून विविध नियम आणि निर्बंध लागू केले जातात. साधारणपणे रात्री १० ते सकाळी ६ या वेळेत लाउडस्पीकर आणि मोठ्या आवाजाच्या साऊंड सिस्टीमवर निर्बंध असतात. सणांसाठी काही मर्यादित सवलती असल्या तरी परवानगी आणि ध्वनीमर्यादांचे पालन आवश्यक असते.

त्यामुळे आगामी गणेशोत्सवात डीजे-डॉल्बीबाबत प्रशासनाची भूमिका काय असेल आणि उत्सव मंडळे नियमांचे पालन कसे करणार, याकडे लक्ष लागले आहे.