Chitra Wagh : काल उद्धव ठाकरे यांच्या शिवसेनेचा दसरा मेळावा शिवाजी पार्कवर पार पडला. या मेळाव्यातून उद्धव ठाकरे आणि संजय राऊत यांनी केंद्र सरकारवर जोरदार हल्लाबोल केला. लॉरेन्स बिष्णोई अस्तित्वातच नाही, अमित शाह हेच लॉरेन्स बिष्णोई आहे, अशा शब्दात संजय राऊतांनी केंद्रीय गृहमंत्री अमित शाह यांच्यावर टीकास्र डागले.

या टीकेला आता भाजप आमदार चित्रा वाघ यांनी जोरदार प्रत्युत्तर दिले आहे. “काश्मीर मधून कलम ३७० कायमचं हटवून अखंड हिंदुस्तानचे स्वप्न पाहणाऱ्या केंद्रीय गृहमंत्री अमित शाहांवर बोलण्याची तुमची औकात तरी आहे का संजय राऊत?” अशा तिखट शब्दांत चित्रा वाघ यांनी संजय राऊतांच्या टीकेला प्रत्युत्तर दिले.

आधी स्वतःची राजकीय पात्रता तपासा

ज्यांना भांडुपमध्ये स्वतःचा एक नगरसेवक निवडून आणायची धमक नाही त्यांनी देशाचे पंतप्रधान नरेंद्र मोदी आणि राज्याचे लाडके मुख्यमंत्री देवाभाऊंवर भाष्य करण्याचे धाडस करू नये, आधी भांडूप जिंका मग देश जिंकायच्या गोष्टी करा, आधी स्वतःची राजकीय पात्रता तपासा, अशा शब्दांत चित्रा वाघ यांनी संजय राऊतांच्या टीकेचा समाचार घेतला.

नेमकं काय म्हणाल्या चित्रा वाघ? 

“सकाळी उठून माईक समोर पोपटपंछी करणाऱ्या सर्वज्ञानाी संजय राऊतांनी आधी स्वतःची राजकीय पातळी तपासावी. राम मंदिराच्या मुहर्तावर बोटं उचलताना तुम्हाला लाजच कशी वाटत नाही. राम मंदिराचा मुहूर्त अगदी योग्य होता, चुकला होता तर तुमचा २०१९ चा मुहूर्त, जेव्हा तुम्ही जनादेशाचा अपमान करत राष्ट्रवादी आणि काँग्रेसच्या पायाशी जाऊन बसला. काश्मीर मधून कलम ३७० कायमचं हटवून अखंड हिंदुस्तानचे स्वप्न पाहणाऱ्या केंद्रीय गृहमंत्री अमित शाहांवर बोलण्याची तुमची औकात तरी आहे का संजय राऊत?”

 उद्धव ठाकरेंचा फडणवीस, शिंदेंवर प्रहार 

टायगर श्रॉफवरील हल्ल्याच्या घटनेवरुन उद्धव ठाकरेंनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना लक्ष्य केले. “लॉरेन्स बिष्णोई साबरमती जेलमध्ये अमित शाहचा ढोकळा फाफडा खात बसलाय. फडणवीसजी तुमच्यात दम असेल तर तुमच्या बाबाकडे जा आणि घेऊन या त्या बिष्णोईला, जीभ झडत का नाही शहरी नक्षल म्हणायला? असा तिखट सवाल उद्धव ठाकरेंनी उपस्थित केला.

Devendra Fadnavis : पुणे पदवीधर व शिक्षक मतदार संघातील महायुतीच्या उमेदवारांना कोल्हापूरकरांनी निवडून द्यावे; मुख्यमंत्री फडणवीस यांचे आवाहन