Ajit Pawar Plane Crash : दिवंगत उपमुख्यमंत्री अजित पवार यांच्या बारामती विमान अपघातप्रकरणी त्यांचे पुतणे आणि राष्ट्रवादी काँग्रेस (शरद पवार गट)चे आमदार रोहित पवार यांनी पुन्हा एकदा खळबळजनक आरोप केले आहेत. दिल्लीत घेतलेल्या पत्रकार परिषदेत रोहित पवार यांनी अपघातग्रस्त विमानाचे मुख्य पायलट कॅप्टन सुमित कपूर यांना ‘वैफल्यग्रस्त’ असल्याचा संकेत देत, २१० कोटींच्या विमा असलेल्या विमानाची जबाबदारी अशा व्यक्तीच्या हाती देण्यात आली, असा गंभीर आरोप केला आहे. रोहित पवार यांनी सुमित कपूर यांच्या पूर्व इतिहासावर टाकला प्रकाश – २०१० आणि २०१७ मध्ये उड्डाणापूर्वीच्या ब्रेथलाइझर चाचणीत मद्यपान सिद्ध झाल्याने DGCA कडून निलंबन झाले होते. एकदा तीन वर्षांचे निलंबनही झाले. – कंपनीच्या पायलट ग्रुपमध्ये सुमित कपूर यांच्यावर वारंवार मद्यपान करत असल्याचा उल्लेख. – कंपनीचे मालक कॅप्टन व्ही. के. सिंग यांनी उड्डाणापूर्वी “तुझे स्टंट मला गोत्यात आणतील” असा मेसेज केला होता. – जेट एअरवेजमधून निघाल्यानंतर सुमित कपूर यांना महिन्याला १०-१२ लाख पगार मिळत होता, पण नंतर नोकरी मिळाली नाही. VSR कंपनीत ३-४ लाख पगार आणि फ्लाइटला २० हजार अतिरिक्त मिळत होते, ज्यामुळे आर्थिक ताण होता आणि वैफल्यग्रस्त असण्याची शक्यता. रोहित पवार यांनी अपघाताच्या दिवशीचे मुद्देही उपस्थित केले – बारामतीत दृश्यमानता कमी असतानाही रनवे २९ मोकळा असताना सुमित कपूर यांनी रनवे ११ वरच उतरावे असा हट्ट धरला. – मुंबई-बारामतीसाठी जास्त इंधन भरले गेले, ज्यामुळे स्फोटाची तीव्रता वाढली असावी. – विमान मुद्दाम खाली आपटून स्फोट घडवला गेला, असा दावा. – DGCA अधिकाऱ्यांवर (श्वेता सिंह यांच्यासह) दिशाभूल आणि कंपनीला संरक्षण देण्याचा आरोप; चौकशी ‘चोरच करत असल्याची’ भावना. रोहित पवार यांनी VSR कंपनी, एरो हँडलर आणि पायलट सुमित कपूर यांच्यावर संशय व्यक्त करत, हा अपघात नव्हे तर षडयंत्र असल्याचा दावा केला आहे. ते म्हणाले, “देशातील सर्वात पॉवरफुल दोन व्यक्ती पंतप्रधान नरेंद्र मोदी आणि गृहमंत्री अमित शाह यांनीच न्याय देऊ शकतात.” त्यांनी मोदींना ईमेलद्वारे पत्र पाठवणार असल्याचे सांगितले. अजित पवार यांच्या अपघातानंतर रोहित पवार यांनी मुंबईतही अनेक पत्रकार परिषदा घेतल्या होत्या. शरद पवार यांनी मात्र हा अपघातच असल्याचे म्हटले आहे. DGCA ने VSR कंपनीसह नॉन-शेड्यूल्ड ऑपरेटर्सची विशेष सेफ्टी ऑडिट सुरू केली आहे. फ्लाइट डेटा रेकॉर्डरमधून माहिती काढली गेली असून, तपास सुरू आहे. मात्र, रोहित पवारांच्या आरोपांमुळे प्रकरण अधिक तापले आहे. सुमित कपूरची वैफल्यग्रस्त अवस्था आणि पूर्व इतिहासामुळे चौकशीत नवे वळण येण्याची शक्यता आहे.
