पार्थ पवारांच्या कार्यपद्धतीवर वरिष्ठ नेत्यांची नाराजी;
ज्येष्ठ नेत्यांची अमित शाहांकडे तक्रार?

Top 15 News:  राष्ट्रवादी काँग्रेसमध्ये सुनेत्रा पवार यांनी सूत्रे हाती घेतल्यानंतर पक्षांतर्गत घडामोडींना वेग आला आहे. नुकतीच  सुनील तटकरे, प्रफुल्ल पटेल, दिलीप वळसे पाटील आणि धनंजय मुंडे यांनी दिल्लीत अमित शाह यांची भेट घेतली. या बैठकीत अर्थखात्याची मागणी आणि पार्थ पवार यांच्या कार्यपद्धतीबाबत नाराजी व्यक्त केल्याची माहिती सूत्रांनी दिली. नियुक्त्यांमध्ये वरिष्ठांना विश्वासात घेतले जात नसल्याचा आक्षेपही घेण्यात आला. दरम्यान, सोमवारी कोअर कमिटीची बैठक पार पडली. आज सुनेत्रा पवार यांनी सर्व आमदारांची बैठक बोलावली असून, त्यात काय निर्णय होणार, याकडे राजकीय वर्तुळाचे लक्ष लागले आहे.

गोकुळ अध्यक्षपदाचा फैसला १० नोव्हेंबरला;
महायुतीकडून शासकीय सदस्यांच्या नियुक्तीची तयारी

गोकुळ दूध संघाच्या अध्यक्षपदावरून सुरू असलेल्या संघर्षाला नवे वळण मिळाले आहे. १३ विरुद्ध १२ अशा संख्याबळावर समविचारी आघाडीने शशिकांत चुयेकर यांच्या निवडीचा दावा केला आहे. मात्र, महायुतीने या निवडीला आक्षेप घेतला. कोल्हापूर सर्किट बेंचमध्ये झालेल्या सुनावणीनंतर न्यायालयाने १० नोव्हेंबरला पुन्हा सभा घेऊन निवड प्रक्रिया पूर्ण करण्याचे निर्देश दिले. दरम्यान, चार शासकीय सदस्यांना मतदानाचा अधिकार देण्याच्या हालचाली महायुतीकडून सुरू असल्याची माहिती आहे. त्यामुळे अध्यक्षपदाचा फैसला १० नोव्हेंबरला होणार आहे.

महाराष्ट्रावर अवकाळी पावसाचे संकट!
‘या’ ८ जिल्ह्यांना यलो अलर्ट

बंगालच्या उपसागरातील ‘मुरासू’ चक्रीवादळामुळे महाराष्ट्रातील हवामानात बदल झाला आहे. राज्यातील अनेक जिल्ह्यांमध्ये आज विजांच्या कडकडाटासह वादळी पावसाचा अंदाज हवामान विभागाने वर्तवला आहे. चंद्रपूर, गडचिरोली, यवतमाळ, नांदेड, लातूर, रत्नागिरी, सिंधुदुर्ग आणि कोल्हापूर या आठ जिल्ह्यांना यलो अलर्ट जारी करण्यात आला आहे. पुणे, सातारा, सांगली, सोलापूरसह इतर जिल्ह्यांतही पावसाची शक्यता आहे. शेतकऱ्यांनी काढणी केलेली पिके सुरक्षित ठिकाणी ठेवावीत, तसेच विजांच्या वेळी उघड्यावर थांबू नये, असे आवाहन करण्यात आले आहे.

‘मी कधीच मॅनेज होणार नाही;
मनोज जरांगेंचा सरकारला इशारा

मराठा आरक्षण आंदोलनाचे नेते मनोज जरांगे यांनी सरकारला इशारा दिला आहे. ‘रोज एक टोळी माझ्या मागे लागली आहे; पण मी कधीच मॅनेज होणार नाही. ज्या दिवशी छापा टाकेन, तेव्हा रडायची वेळ तुमच्यावर येईल. मी पडदा फाडून सत्य बाहेर आणणारा आहे,’ असा इशारा त्यांनी दिला. नांदेडमधील नवीन येथे आयोजित कीर्तन सोहळ्यात ते बोलत होते. तसेच मराठा समाजाच्या नोंदी उपलब्ध असूनही प्रमाणपत्रे दिली जात नसल्याचा आरोप करत, अधिकारी अर्ज स्वीकारत नसल्याचा दावाही त्यांनी केला.

पुणेकरांचा मेट्रो प्रवास उद्यापासून सुरू!
मेट्रो लाईन-३ चं आज उदघाटन Top 15 News: 

पुणेकरांसाठी आनंदाची बातमी! माण-हिंजवडी ते शिवाजीनगर मेट्रो मार्गिका उद्यापासून प्रवाशांच्या सेवेत दाखल होणार आहे. आज पंतप्रधान नरेंद्र मोदी यांच्या हस्ते या मार्गाचे ऑनलाइन लोकार्पण होणार आहे. या मार्गावर एकूण १७ स्थानके असून गर्दीच्या वेळेत दर सहा मिनिटांनी मेट्रो उपलब्ध होणार आहे. त्यामुळे हिंजवडी आयटी पार्कमध्ये जाणाऱ्या कर्मचाऱ्यांसह पुणेकरांचा प्रवास अधिक जलद आणि सोयीस्कर होण्याची अपेक्षा आहे. या सेवेमुळे रस्त्यावरील वाहतुकीचा ताणही कमी होण्यास मदत होणार आहे.

 ‘माझा पराभव नाही, तर घात झाला’;
सतीश चव्हाणांचा आरोप, अब्दुल सत्तारांवर निशाणा

पदवीधर निवडणुकीतील पराभवानंतर सतीश चव्हाण यांनी महायुतीतील काही नेत्यांवर गंभीर आरोप केले आहेत. ‘माझा पराभव झाला नाही, तर घात झाला,’ असा दावा करत त्यांनी अब्दुल सत्तार यांच्यावर निशाणा साधला. काही नेत्यांनी उघडपणे, तर काहींनी पडद्यामागून विरोधात काम केल्याचा आरोपही त्यांनी केला. महसूल विभागाने मतदार याद्या अद्ययावत न केल्यामुळे अनेकांची नावे वगळली गेल्याचा दावाही चव्हाण यांनी केला. या प्रकरणाची वरिष्ठ नेत्यांनी दखल घ्यावी, अशी मागणी करत त्यांनी २०२९ च्या निवडणुकीबाबतही सूचक इशारा दिला.

 शेतकऱ्यांना विश्वासात न घेताच ऊसदर जाहीर;
समशेरपूर कारखान्याविरोधात आंदोलनाचा एल्गार!

नंदुरबार तालुक्यातील समशेरपूर साखर कारखान्याने शेतकऱ्यांना विश्वासात न घेता परस्पर ऊसदर जाहीर केल्याने संताप व्यक्त होत आहे. जाहीर केलेला दर परवडणारा नसल्याचा आरोप करत शेतकरी आणि ऊस वाहतूकदारांनी कारखाना प्रशासनाविरोधात आंदोलन पुकारले आहे. खते, औषधे, मजुरी, ऊसतोडणी आणि वाहतुकीचा खर्च वाढल्याने समाधानकारक दर मिळावा, अशी मागणी आंदोलकांनी केली आहे. दराचा फेरविचार न केल्यास आंदोलन तीव्र करण्याचा इशाराही देण्यात आला आहे. कारवाई करावी, असा इशाराही राष्ट्रवादीच्या पदाधिकाऱ्यांनी दिला आहे.

‘शेतकऱ्यांचा अपमान सहन करणार नाही’;
संजय गायकवाड यांच्या निलंबनाची मागणी, धुळ्यात निषेध आंदोलन

शेतकऱ्यांविषयी वादग्रस्त विधान केल्याच्या आरोपावरून शिवसेनेचे आमदार संजय गायकवाड यांच्याविरोधात धुळ्यात राष्ट्रवादी काँग्रेस शरदचंद्र पवार पक्ष आक्रमक झाला आहे. पक्षाच्या पदाधिकारी आणि कार्यकर्त्यांनी गायकवाड यांच्या पोस्टरला जोडे मारत निषेध आंदोलन केले. तसेच त्यांचे तातडीने निलंबन करून योग्य ती कारवाई करावी, अशी मागणी जिल्हाध्यक्ष जितेंद्र मराठे यांनी केली. केवळ निवेदन स्वीकारून विषय संपवू नये, अन्यथा आंदोलन तीव्र करू, असा इशाराही पदाधिकाऱ्यांनी दिला.

ऊसतोड मजुरांच्या १० हजार मुलांचे शिक्षण धोक्यात;
१२१ वसतिगृहे अद्याप बंद!

ऊसतोड मजुरांच्या मुलांच्या शिक्षणाचा प्रश्न ऐरणीवर आला आहे. साखर कारखान्यांचा गळीत हंगाम सुरू होऊन पंधरवडा उलटला, तरी १२१ हंगामी वसतिगृहे सुरू झालेली नाहीत. त्यामुळे १० हजार २५४ विद्यार्थ्यांचे शिक्षण अधांतरी आहे. विशेष म्हणजे, ऊसतोड मजुरांचे मोठ्या प्रमाणावर स्थलांतर होणाऱ्या आष्टी आणि पाटोदा तालुक्यांत एकही वसतिगृह प्रस्तावित नाही. याविरोधात बीड जिल्हाधिकारी कार्यालयासमोर निदर्शने करण्यात आली. वसतिगृहे तातडीने सुरू करावीत आणि दोन्ही तालुक्यांतील विद्यार्थ्यांसाठी स्वतंत्र व्यवस्था करावी, अशी मागणी निवेदनाद्वारे करण्यात आली.

 ‘गुन्हेगार ठरवणे ही भाजपची पद्धत’;
किशोरी पेडणेकरांचा हल्लाबोल

दिया मिर्झा यांच्यावरील वादावरून शिवसेना ठाकरे गटाच्या नेत्या किशोरी पेडणेकर यांनी भाजपवर निशाणा साधला. मुंबईकरांना प्रदूषणाबाबत जनजागृती करण्यासाठी कलाकाराची नियुक्ती करण्यात गैर काय, असा सवाल त्यांनी केला. तसेच निर्णय जाहीर केल्यानंतर मुंबई महापालिकेने माघार घेणे निंदनीय असल्याचे त्या म्हणाल्या. महापौर रितू तावडे यांना प्रकरणाची माहिती नसल्याचा आरोप करत त्यांनी अमित साटम यांच्यावरही टीका केली. मुंबई महापालिका भाजपच्या दावणीला बांधली आहे का, असा सवालही त्यांनी उपस्थित केला. पक्षांतर्गत टीकेलाही त्यांनी प्रत्युत्तर दिले.

PF काढण्यासाठी क्लेमची प्रतीक्षा संपणार!
आता ATM आणि UPI वरून पैसे काढता येणार?

नोकरदारांसाठी पीएफबाबत मोठी अपडेट समोर आली आहे. EPFO 3.0 अंतर्गत कर्मचाऱ्यांना ATM कार्ड आणि UPI द्वारे पीएफचे पैसे काढण्याची सुविधा देण्याची तयारी सुरू आहे. यासाठी NPCI सोबत तांत्रिक एकत्रीकरण केले जाणार असल्याचे वृत्त आहे. या सुविधेमुळे पात्र कर्मचाऱ्यांना ऑनलाइन क्लेम आणि मंजुरीची प्रतीक्षा न करता पैसे मिळवणे सोपे होऊ शकते. डिसेंबर २०२६ अखेरपर्यंत ही सुविधा सुरू होण्याची शक्यता वर्तवली जात आहे. मात्र, पैसे काढण्याची मर्यादा आणि अधिकृत नियम अद्याप जाहीर झालेले नाहीत.

पंजाबच्या माजी मंत्र्याच्या घरी ईडीचा छापा;
१६ ठिकाणी शोधमोहीम

पंजाबचे माजी उद्योगमंत्री आणि काँग्रेस नेते सुंदर शाम अरोरा यांच्या अडचणीत वाढ झाली आहे. अंमलबजावणी संचालनालयाने (ED) सोमवारी पहाटे त्यांच्या होशियारपूर येथील निवासस्थानी छापा टाकला. यासह मोहाली, चंदीगड, जालंधर आणि लुधियानासह १६ ठिकाणी शोधमोहीम राबवण्यात आली. ही कारवाई पाच कोटी रुपयांच्या कथित लाच प्रकरणाशी संबंधित असल्याचे सांगितले जात आहे. मात्र, ईडीकडून अद्याप अधिकृत स्पष्टीकरण देण्यात आलेले नाही. त्यामुळे या कारवाईकडे पंजाबच्या राजकीय वर्तुळाचे लक्ष लागले आहे.

पुन्हा युद्धाला तोंड फुटले,
इराणच्या केशम बेटावर मोठा हल्ला

अमेरिका आणि इराणमधील तणाव पुन्हा वाढला आहे. राष्ट्राध्यक्ष डोनाल्ड ट्रम्प यांनी युद्ध टळण्याचे संकेत दिल्यानंतर काही तासांतच अमेरिकन सैन्याने इराणच्या केशम बेटावर हवाई हल्ले केल्याचे वृत्त आहे. इराणची वृत्तसंस्था ‘आयआरएनए’ने या हल्ल्यानंतर बेटावर अनेक स्फोट झाल्याचे म्हटले आहे. दरम्यान, अमेरिका आणि इराणमध्ये शांतता कराराची चर्चा सुरू असल्याचा दावा उपराष्ट्राध्यक्ष जे. डी. व्हान्स यांनी केला होता. मात्र, हल्ल्यामुळे होर्मुझच्या सामुद्रधुनीतील सुरक्षेचा प्रश्न पुन्हा ऐरणीवर आला असून जागतिक तेल बाजारावरही परिणाम होण्याची शक्यता आहे.

ग्लेन मॅक्सवेलचा आंतरराष्ट्रीय क्रिकेटला अलविदा;
फ्रँचायझी क्रिकेटमध्ये खेळणार!

ऑस्ट्रेलियाचा स्फोटक अष्टपैलू ग्लेन मॅक्सवेलने आंतरराष्ट्रीय क्रिकेटच्या सर्व प्रकारांतून निवृत्ती जाहीर केली आहे. यापूर्वी वनडे क्रिकेटला अलविदा केलेल्या मॅक्सवेलने आता टी-20 आणि कसोटीलाही रामराम ठोकला आहे. 2023 विश्वचषकात अफगाणिस्तानविरुद्ध नाबाद 201 धावांची ऐतिहासिक खेळी करणाऱ्या मॅक्सवेलने कारकिर्दीत अनेक विक्रम केले. ऑस्ट्रेलियाच्या दोन वनडे आणि एका टी-20 विश्वचषक विजेत्या संघाचा तो सदस्य होता. आंतरराष्ट्रीय क्रिकेटमधून निवृत्त झाला असला, तरी जगभरातील टी-20 फ्रँचायझी लीगमध्ये त्याचा खेळ सुरू राहणार आहे.

‘मी आलिया-दीपिका नाही, माझा सिनेमा फ्लॉप होईल’;
राधिका आपटेचं बॉक्स ऑफिसवर स्पष्ट मत  Top 15 News: 

अभिनेत्री राधिका आपटेने बॉलिवूडमधील बॉक्स ऑफिसच्या समीकरणांवर भाष्य केलं आहे. ‘मी मुख्य भूमिकेत असलेला थिएटरमधील चित्रपट चांगला असूनही फ्लॉप होऊ शकतो, कारण मी आलिया भट्ट किंवा दीपिका पदुकोण नाही,’ असं ती म्हणाली. महिला-प्रधान चित्रपटांना प्रेक्षक मिळवणं कठीण असल्याचंही तिने स्पष्ट केलं. त्यामुळे पुरुषप्रधान चित्रपटांमध्ये काम करावं लागत असल्याचं राधिकाने सांगितलं. तसेच हिंसाचार दाखवणाऱ्या चित्रपटांच्या लोकप्रियतेवरही तिने नाराजी व्यक्त केली.