गोकुळच्या गुप्त जीआरमधील चार नावे सतेज पाटलांनी जाहीर केली;
कोल्हापुरात चर्चांना उधाण!

Top 15 news: गोकुळच्या अध्यक्षपदाची निवडणूक मंगळवारी पार पडणार असून, त्यापूर्वीच राजकीय वातावरण तापले आहे. महायुती सरकारने नियुक्त केलेल्या पाच सरकारी संचालकांपैकी मतदानाचा अधिकार असलेल्या चार संचालकांची नावे सतेज पाटील यांनी संघर्ष मोर्चात जाहीर केली. शिवाजी आडनाईक, डॉ. प्रवीणचंद्र हेंद्रे, प्रशांत पाटोले आणि कृष्णात पाटील अशी त्यांची नावे आहेत. सरकारने जीआर सार्वजनिक न करताही ही नावे बाहेर आल्याने चर्चांना उधाण आले आहे. या नावांवरून सतेज पाटील यांनी महायुतीला लक्ष्य करत, सांगलीतील व्यक्तीला गोकुळमध्ये स्थान दिल्याची टीका केली.

‘रामदास कदम माझ्या पाया पडले होते’;
सुनील तटकरेंचा खळबळजनक दावा

राष्ट्रवादी काँग्रेसचे खासदार सुनील तटकरे यांनी शिवसेना नेते रामदास कदम यांच्यावर गंभीर आरोप केले आहेत. नारायण राणे यांनी शिवसेना सोडल्यानंतर रामदास कदम आपल्याकडे आले होते. त्यांनी माझ्या पाया पडून विनवणी केली होती, असा दावा तटकरेंनी केला. २००९ मध्ये निवडणुकीत पराभव झाल्यानंतर कदम यांनी मंत्रिपदाची मागणी केली होती. राष्ट्रवादीत जाण्याची धमकी देऊन त्यांनी विरोधी पक्षनेतेपद मिळवल्याचेही तटकरे म्हणाले. कदम यांचे आरोप खोटे असून, त्यांना कायदेशीर नोटीस देणार असल्याचा इशाराही त्यांनी दिला. तसेच यापुढे रामदास कदम यांच्यावर काहीही बोलणार नसल्याचे तटकरेंनी स्पष्ट केलंय.

शेतकऱ्यांची दिवाळी अंधारात!
दुष्काळी मदतीचे ५ हजार रुपयेही बँकांकडून कर्जात जमा

दुष्काळग्रस्त शेतकऱ्यांना राज्य सरकारकडून दिली जाणारी पाच हजार रुपयांची अग्रीम मदत बँकांकडून थकीत कर्जापोटी वळती केली जात असल्याच्या तक्रारी समोर आल्या आहेत. त्यामुळे मदत मिळूनही शेतकऱ्यांना दिवाळी साजरी करता येत नसल्याचे चित्र आहे. ‘शिवार हेल्पलाइन’च्या माहितीनुसार, संपर्क साधलेल्या ५४ टक्के शेतकऱ्यांची मदत कर्ज खात्यात जमा झाली आहे. या प्रकारावर कृषिमंत्री दत्तात्रय भरणे यांनी नाराजी व्यक्त केली. मदतीच्या रकमेतून कर्जवसुली करू नये. अशी वसुली झाली असल्यास पैसे शेतकऱ्यांना परत केले जातील, असे त्यांनी स्पष्ट केले. दरम्यान, तक्रारींची दखल घेण्याचे आवाहन कृषी आयुक्तांनी केले आहे.

महाराष्ट्रात थंडीची चाहूल,
निफाडचा पारा १२ अंशांवर!

दिवाळीच्या काळात देशातील अनेक राज्यांत पावसाचा जोर कायम आहे. भारतीय हवामान विभागाने आज नऊ राज्यांमध्ये वादळी वाऱ्यासह पावसाचा अंदाज वर्तवला आहे. अरुणाचल प्रदेश, आसाम, मेघालय, नागालँड, मणिपूर, मिझोराम, त्रिपुरा, हिमाचल प्रदेश आणि जम्मू-काश्मीरमध्ये पावसाची शक्यता आहे. तामिळनाडू आणि अंदमान-निकोबार बेटांवर मुसळधार पावसाचा इशारा देण्यात आला आहे. दरम्यान, महाराष्ट्रात थंडीची चाहूल लागली असून अनेक ठिकाणी किमान तापमान १५ अंशांखाली गेले आहे. सोमवारी निफाडमध्ये १२ अंश सेल्सिअस तापमानाची नोंद झाली. पुणे, नाशिक, परभणी, गोंदिया आणि यवतमाळमध्येही गारठा वाढला आहे.

ठाणे-कल्याण-नवी मुंबईचा प्रवास होणार सुसाट!
मेट्रो १२ अ आणि दोन उड्डाणपुलांना मंजुरी Top 15 news: 

ठाणे, कल्याण, नवी मुंबई आणि पनवेलमधील वाहतूक कोंडी कमी करण्यासाठी राज्य सरकारने मोठा निर्णय घेतला आहे. मानपाडा–कल्याण फाटा (शिळफाटा)–खुटारीगाव, तळोजा या मुंबई मेट्रो १२ अ मार्गिकेसह दोन उड्डाणपुलांच्या एकात्मिक प्रकल्पाला मंजुरी देण्यात आली आहे. या तिन्ही प्रकल्पांसाठी १३ हजार ८५६ कोटी रुपयांहून अधिक खर्च अपेक्षित आहे. मेट्रो मार्गाची लांबी १८.४ किलोमीटर असून त्यावर १२ उन्नत स्थानके असतील. तसेच कल्याण फाटा ते मानपाडा आणि कल्याण फाटा ते तळोजा असे दोन उन्नत मार्ग उभारले जाणार आहेत. एमएमआरडीएला या प्रकल्पांची कामे साडेतीन वर्षांत पूर्ण करण्याचे उद्दिष्ट देण्यात आले आहे. उन्नत मार्गांवर टोल आकारणीही केली जाणार आहे.

RNO – गोकुळची निवडणूक आजच होणार;
न्यायालयाचा हिरवा कंदील!

कोल्हापूर जिल्हा दूध उत्पादक संघ अर्थात गोकुळची निवडणूक आज नियोजित वेळेनुसार होणार आहे. मुंबई उच्च न्यायालयाच्या औरंगाबाद खंडपीठाने निवडणूक प्रक्रियेला परवानगी दिली आहे. यामध्ये निवडून आलेले २५ आणि शासननियुक्त चार सदस्य मतदान करणार आहेत. मात्र, शासननियुक्त सदस्यांची मते स्वतंत्र ठेवण्याचे निर्देश न्यायालयाने दिले आहेत. संपूर्ण प्रक्रियेचे व्हिडिओ चित्रीकरण होणार असून निकालासह अध्यक्षपदाची निवडही होईल. अध्यादेशाला स्थगिती देण्याची शासनाची मागणी न्यायालयाने फेटाळली. अध्यादेशाच्या वैधतेवर मात्र निर्णय झालेला नाही. या प्रकरणाची पुढील सुनावणी २५ नोव्हेंबरला होणार असल्याची माहिती याचिकाकर्त्यांचे वकील श्रीकृष्ण गणबावले यांनी दिली.

RNO – पोहरादेवीत मनोज जरांगेंचे स्वागत;
बंजारा आरक्षणासाठी पाठपुराव्याचे आश्वासन

मराठा आरक्षण आंदोलनाचे नेते मनोज जरांगे पाटील यांनी बंजारा समाजाची काशी म्हणून ओळखल्या जाणाऱ्या पोहरादेवी येथे भेट दिली. यावेळी त्यांनी संत सेवालाल महाराज आणि आई भवानीचे दर्शन घेतले. बंजारा समाजाच्या आरक्षणासह विकासाच्या मुद्द्यांवर त्यांनी महंतांशी चर्चा केली. देशभरातील बंजारा समाजाला एकच आरक्षण सूची लागू असावी, अशी भूमिका जरांगे यांनी मांडली. या मागणीसाठी पाठपुरावा करण्याचे आश्वासन त्यांनी दिल्याची माहिती महंत सुनील महाराज यांनी दिली. तर बंजारा समाजाला न्याय मिळवून देण्यासाठी सर्व महंत एकत्रित प्रयत्न करणार असल्याचे आमदार महंत बाबूसिंग महाराज यांनी सांगितले. या भेटीत सामाजिक एकोपा आणि विकासासाठी एकत्र काम करण्याचा निर्धार व्यक्त करण्यात आला.

RNO – वर्षभर समुद्रात वास्तव्य, दिवाळीत तीन दिवस दर्शन!
बहिरी देवाची अनोखी परंपरा

नवी मुंबईच्या दिवाळे गावात आजही अडीचशे ते तीनशे वर्षांची अनोखी परंपरा मोठ्या श्रद्धेने जपली जात आहे. वर्षाचे बाराही महिने समुद्रात वास्तव्य करणारे बहिरी देव दिवाळीत मात्र तीन दिवसांसाठी किनाऱ्यावर विराजमान होतात. दिवाळीच्या चतुर्दशीला वाजतगाजत देवाचे आगमन होते, दुसऱ्या दिवशी भव्य पालखी सोहळा पार पडतो, तर तिसऱ्या दिवशी १०० ते १५० होड्यांच्या साक्षीने देव पुन्हा समुद्रातील मूळ स्थानी परततात. विशेष म्हणजे, येथे देवाचे विसर्जन केले जात नाही, तर त्यांना त्यांच्या समुद्री निवासस्थानी पुन्हा विराजमान केले जाते. कोळी बांधवांचे रक्षणकर्ता मानल्या जाणाऱ्या बहिरी देवाच्या दर्शनासाठी मुंबई, ठाणे, रायगड आणि पालघरमधून भाविक दाखल होतात. तांडेल कुटुंबीयांच्या तीन पिढ्यांनी जपलेला हा वारसा आजही नव्या पिढीच्या सहभागातून तितक्याच उत्साहात पुढे सुरू आहे.

RNO – लातूर बँक निवडणुकीत खळबळ;
मुगावच्या कमलाकर शिंदेंचे अपहरण ?

लातूर जिल्हा मध्यवर्ती सहकारी बँकेच्या निवडणुकीदरम्यान अपहरणाचा गंभीर आरोप करण्यात आला आहे. निलंगा तालुक्यातील मुगाव येथील कमलाकर शिंदे यांचे निलंग्यातून अपहरण झाल्याचा दावा त्यांची मुलगी सृष्टी शिंदे यांनी केला आहे. या प्रकारामागे अरविंद पाटील आणि त्यांच्या कार्यकर्त्यांचा हात असल्याचा संशयही त्यांनी व्यक्त केला आहे. तसेच स्थानिक पोलिसांच्या भूमिकेवर नाराजी व्यक्त करत वडिलांचा तातडीने शोध घेण्याची मागणी केली आहे. या प्रकरणाची सखोल चौकशी करून दोषींवर कठोर कारवाई करावी, अशी मागणीही त्यांनी प्रशासनाकडे केली आहे.

RNO – भांडुपेश्वर कुंडावर दिवाळी महोत्सवाचा जल्लोष;
संजय राऊतांची उपस्थिती

दिवाळीनिमित्त भांडुप येथील भांडुपेश्वर कुंड परिसर आकर्षक विद्युत रोषणाईने सजवण्यात आला आहे. आमदार सुनील राऊत यांच्या वतीने करण्यात आलेली ही रोषणाई नागरिकांचे लक्ष वेधून घेत आहे. या दिवाळी महोत्सवाला खासदार संजय राऊत यांनीही उपस्थिती लावली. यावेळी त्यांनी नागरिकांसोबत दिवाळीचा आनंद साजरा केला. महोत्सवाच्या निमित्ताने संजय राऊत यांनी विविध राजकीय आणि सामाजिक विषयांवरही भाष्य केले.

मोदी-झेलेंस्की यांच्यात फोनवरून चर्चा;
युक्रेन युद्धावर शांततेसाठी भारताचा पुढाकार!

पंतप्रधान नरेंद्र मोदी यांनी युक्रेनचे अध्यक्ष वोलोडिमिर झेलेंस्की यांच्याशी फोनवरून सविस्तर चर्चा केली. यावेळी झेलेंस्की यांनी युद्धातील सद्यस्थिती आणि आगामी अबू धाबी बैठकीच्या तयारीची माहिती दिली. तर युद्धावर तोडगा काढण्यासाठी संवाद आणि मुत्सद्देगिरी हाच मार्ग असल्याचे मोदी यांनी स्पष्ट केले. शांतता प्रस्थापित करण्यासाठी भारत सर्वतोपरी योगदान देण्यास कटिबद्ध असल्याचा विश्वासही त्यांनी दिला. दरम्यान, काळ्या समुद्रातून होणाऱ्या धान्य निर्यातीतील अडथळे आणि अन्नसुरक्षेचा मुद्दाही चर्चेत आला. यासाठी भारताची भूमिका महत्त्वाची असल्याचे झेलेंस्की यांनी नमूद केले. अन्नसुरक्षेसाठी दोन्ही देशांची पथके संपर्कात राहणार असल्याचेही ठरले.

कच्च्या तेलाचे दर आठवडाभरात १७ टक्क्यांनी घसरले;
भारतात पेट्रोल-डिझेल स्वस्त होणार?

अमेरिका आणि इराणमधील संघर्षावर चर्चेतून तोडगा निघण्याचे संकेत मिळताच जागतिक बाजारात कच्च्या तेलाच्या किमती घसरल्या आहेत. मागील आठवड्यात ब्रेंट क्रूडच्या दरात तब्बल १६ ते १७ टक्क्यांची घसरण झाली. कोविडनंतरची ही सर्वात मोठी साप्ताहिक घसरण ठरली आहे. भारतासाठी ही दिलासादायक बाब आहे. कारण देश आपल्या गरजेपैकी सुमारे ८८.७ टक्के कच्चे तेल आयात करतो. तेल स्वस्त झाल्यास आयात खर्च, महागाई आणि रुपयावरील दबाव कमी होण्यास मदत होऊ शकते. मात्र, पेट्रोल-डिझेलचे दर लगेच कमी होतीलच असे नाही. रुपयाचा विनिमय दर, वाहतूक खर्च आणि सरकारी करांचाही इंधन दरांवर परिणाम होतो. होर्मुझ सामुद्रधुनीतील तणावामुळे पुरवठ्याची चिंता मात्र कायम आहे.

इस्रायलमध्ये नेतान्याहूंना सत्तेतून हटवण्याची संधी;
गॅडी आयझेनकॉट यांच्याकडे सरकार स्थापनेची जबाबदारी!

इस्रायलच्या २७ ऑक्टोबरच्या निवडणुकीत कोणत्याही पक्षाला बहुमत मिळाले नाही. नेतान्याहू यांच्या लिकुड पक्षाला २७ जागा मिळाल्या, तर त्यांच्या आघाडीचे संख्याबळ ५३ वर थांबले. बहुमतासाठी आवश्यक ६१ जागांचा आकडा त्यांना गाठता आला नाही. दुसरीकडे, विरोधी गटाला ४८ आणि अरब पक्षांना १९ जागा मिळाल्या. राष्ट्रपती आयझॅक हेर्झोग यांनी ८ नोव्हेंबरला गॅडी आयझेनकॉट यांच्याकडे सरकार स्थापनेची जबाबदारी सोपवली. त्यांना सरकार स्थापनेसाठी २८ दिवसांची मुदत असून, १४ दिवसांची मुदतवाढ मिळू शकते. मात्र, अरब पक्षांच्या पाठिंब्याशिवाय बहुमत मिळवणे कठीण आहे. त्यामुळे नेतान्याहूंची सत्ता जाणार की पुन्हा राजकीय समीकरणे बदलणार, याकडे जगाचे लक्ष लागले आहे

सूर्यकुमारकडे मुंबईच्या नेतृत्वाची धुरा;
सय्यद मुश्ताक अली ट्रॉफीसाठी संघ जाहीर!

भारताचा टी-२० स्टार सूर्यकुमार यादव पुन्हा कर्णधाराच्या भूमिकेत दिसणार आहे. सय्यद मुश्ताक अली ट्रॉफीसाठी मुंबई क्रिकेट असोसिएशनने त्याच्याकडे मुंबई संघाचे नेतृत्व सोपवले आहे. बीसीसीआयची ही स्पर्धा १४ नोव्हेंबरपासून सुरू होणार आहे. मुंबईच्या संघात शार्दुल ठाकूर, शिवम दुबे, सर्फराज खान, तुषार देशपांडे आणि शम्स मुलानी यांसारख्या अनुभवी खेळाडूंचाही समावेश आहे. सूर्यकुमारच्या नेतृत्वाखाली मुंबईला विजेतेपद मिळवून देण्याचे संघाचे लक्ष्य आहे. मुंबईचा पहिला सामना १४ नोव्हेंबरला हैदराबादविरुद्ध होणार आहे. या स्पर्धेत दमदार कामगिरी करून भारतीय संघातील स्थानासाठी दावा मजबूत करण्याची संधी सूर्यकुमारला मिळणार आहे.

सूरज चव्हाणने दिवाळीत दाखवला लेकीचा चेहरा;
लक्ष्मीपूजनाचा व्हिडीओ सोशल मीडियावर व्हायरल! Top 15 news: 

‘बिग बॉस मराठी ५’चा विजेता सूरज चव्हाण सध्या वैयक्तिक आयुष्यामुळे चर्चेत आहे. लक्ष्मीपूजनाच्या दिवशी त्याने सोशल मीडियावर व्हिडीओ शेअर करत आपल्या चिमुकल्या लेकीचा चेहरा पहिल्यांदाच दाखवला. या व्हिडीओमध्ये सूरज आणि त्याची पत्नी संजना लेकीचे औक्षण व पूजन करताना दिसत आहेत. सूरजने लेकीचे पाय धुऊन हळद-कुंकू आणि फुलांनी पूजा केली. त्यानंतर पत्नीचेही पूजन करून तिचे आशीर्वाद घेतले. ‘माझी लाडूबाई, माझी लाडाची लक्ष्मी’ असे कॅप्शन त्याने व्हिडीओला दिले आहे. हा व्हिडीओ सोशल मीडियावर व्हायरल होत असून चाहत्यांकडून लेकीचे कौतुक केले जात आहे.