पावसाच्या खंडाने २० जिल्ह्यांत दुष्काळसदृश स्थिती;
सोयाबीन उत्पादक शेतकरी संकटात

Top 15 News : ऑगस्ट-सप्टेंबरमधील पावसाच्या मोठ्या खंडामुळे राज्यातील २० जिल्ह्यांतील ९१ तालुक्यांमध्ये दुष्काळसदृश परिस्थिती निर्माण झाल्याचा दावा केला जात आहे. मराठवाडा, उत्तर महाराष्ट्र, विदर्भ आणि पश्चिम महाराष्ट्रातील अनेक भागांत खरिपाच्या पिकांना मोठा फटका बसला आहे. नांदेडमध्ये करपलेल्या सोयाबीनला शेतकऱ्याने आग लावली, तर बुलढाण्यात तरुण शेतकऱ्याने रक्ताने मुख्यमंत्र्यांना पत्र लिहिले. संग्रामपूरमध्ये शेतकऱ्यांनी दुष्काळ जाहीर करून कर्जमाफीची मागणी करत आंदोलन केले. हिंगोलीतही सोयाबीन पिकांचे मोठे नुकसान झाले आहे. शेतकऱ्यांनी आर्थिक मदत, पीक विमा भरपाई आणि जनावरांच्या चाऱ्याची तातडीने व्यवस्था करण्याची मागणी केली आहे.

चार जिल्ह्यांचे प्रशासकीय विभाजन;
21 जिल्ह्यांत 47 नवीन अप्पर तहसील कार्यालये

राज्यातील चार जिल्ह्यांच्या प्रशासकीय विभाजनाचा निर्णय घेण्यात आला आहे. मुख्यमंत्री देवेंद्र फडणवीस यांच्या सूचनेनुसार महसूलमंत्री चंद्रशेखर बावनकुळे यांनी हा निर्णय घेतला. बारामती, पंढरपूर, दापोली आणि नागपूर ग्रामीण येथे अतिरिक्त जिल्हाधिकारी कार्यालये सुरू करण्यात येणार आहेत. तसेच 21 जिल्ह्यांत 47 नवीन अप्पर तहसील कार्यालयांची निर्मिती केली जाणार आहे. पंढरपूर येथे अपर जिल्हाधिकारी कार्यालयाला मंजुरी मिळाली असून, पंढरपूर, सांगोला, मंगळवेढा, माढा, माळशिरस, करमाळा आणि मोहोळ या सात तालुक्यांचा कारभार या कार्यालयातून चालणार आहे. त्यामुळे नागरिकांना प्रशासकीय कामांसाठी सोलापूर जिल्हाधिकारी कार्यालयात जाण्याची गरज कमी होणार आहे.

राज्यात पावसाचा जोर वाढणार;
४ जिल्ह्यांना ऑरेंज, २० जिल्ह्यांना येलो अलर्ट

राज्यात पावसाने दडी मारल्याने शेतकरी चिंतेत असतानाच हवामान खात्याने दिलासा देणारा अंदाज वर्तवला आहे. पुढील ४८ तासांत राज्यातील २४ जिल्ह्यांमध्ये वादळी वाऱ्यासह जोरदार पावसाची शक्यता आहे. विदर्भातील यवतमाळ, नागपूर, चंद्रपूर आणि गडचिरोली या चार जिल्ह्यांना ऑरेंज अलर्ट देण्यात आला आहे. तर हिंगोली, नांदेड, वर्धा, भंडारा, गोंदिया, जालना, बीड आणि धाराशिवसह अन्य जिल्ह्यांना येलो अलर्ट जारी करण्यात आला आहे. काही ठिकाणी विजांच्या कडकडाटासह मुसळधार पावसाचा अंदाज आहे. त्यामुळे शेतकरी आणि नागरिकांनी सतर्क राहण्याचे आवाहन प्रशासनाकडून करण्यात आले आहे.

साहिल वाकोडे प्रकरणात नवे CCTV फुटेज समोर;
परीक्षेदरम्यान मोबाईल वापरताना दिसला

आयआयटी बॉम्बेतील विद्यार्थी साहिल वाकोडेच्या आत्महत्या प्रकरणात परीक्षाकक्षातील सीसीटीव्ही फुटेज समोर आले आहे. या फुटेजमध्ये साहिल परीक्षा देताना मोबाईल वापरताना आणि एका पर्यवेक्षकाकडे मोबाईल देताना दिसत आहे. त्यानंतर तो आपल्या वस्तू घेऊन परीक्षा कक्षातून बाहेर पडताना दिसतो. साहिलने प्रश्नांची उत्तरे मिळवण्यासाठी प्रश्नपत्रिका ChatGPT वर अपलोड केल्याचे संस्थेने म्हटले आहे. मात्र, त्याच्यावर शिस्तभंगाची कारवाई करण्यात आली नव्हती, अशी माहिती IIT बॉम्बेकडून देण्यात आली. दरम्यान, साहिलच्या पालकांनी संस्थेत त्याच्याशी भेदभाव आणि छळ झाल्याचा आरोप केला असून, प्राध्यापक सूर्यनारायण दुला यांच्या अटकेची मागणी केली आहे.

‘मुंबईच्या राजा’चे 99वे वर्ष;
22 फुटी बाप्पाचे बार्जवरून खोल समुद्रात विसर्जन

मुंबईच्या गणेशोत्सवातील मानाचे स्थान असलेल्या गणेशगल्लीतील ‘मुंबईच्या राजा’चे यंदा 99वे वर्ष आहे. शुक्रवार, 25 सप्टेंबरला सकाळी 7 वाजता शेवटची महाआरती झाल्यानंतर लालबाग ते गिरगाव चौपाटी अशी विसर्जन मिरवणूक निघणार आहे. यंदा प्रथमच 22 फुटी ‘मुंबईच्या राजा’चे गिरगाव चौपाटी येथे अत्याधुनिक बार्ज जहाजावरून थेट खोल समुद्रात विसर्जन करण्यात येणार आहे. महाराष्ट्र मेरीटाईम बोर्ड, मुंबई पोलीस आणि महापालिकेच्या मान्यतेनुसार रात्री 8 ते 11 या वेळेत विसर्जन होणार आहे. 1977 मध्ये मंडळाने 22 फुटी गणेशमूर्तीची परंपरा सुरू केली होती. 2004 मध्ये या बाप्पाला ‘मुंबईचा राजा’ हे नाव देण्यात आले.

“शेतकऱ्यांचे आसू पुसण्याचे काम आम्ही करू ”;
एकनाथ शिंदेंचा दिलासा Top 15 News :

पावसाच्या खंडामुळे खरिपाच्या पिकांचे नुकसान झाल्याच्या पार्श्वभूमीवर उपमुख्यमंत्री एकनाथ शिंदे यांनी बुलढाणा जिल्ह्याचा दौरा केला. खामगाव तालुक्यातील कोलोरी येथे त्यांनी शेतकऱ्यांच्या बांधावर जाऊन पीक नुकसानीची पाहणी केली आणि शेतकऱ्यांना धीर दिला. बुलढाणा जिल्ह्यात पिकांचे मोठ्या प्रमाणात नुकसान झाल्याचे सांगत, राज्य सरकार शेतकऱ्यांना लवकरात लवकर मदत करेल, असे आश्वासन शिंदे यांनी दिले. मागील वर्षीप्रमाणे यंदाही शेतकऱ्यांची दिवाळी काळी होऊ देणार नाही, असे त्यांनी म्हटले. नवरात्र आणि दिवाळीच्या काळात शेतकऱ्यांना दिलासा देण्यासाठी सरकार प्रयत्नशील असल्याचेही शिंदे यांनी सांगितले. “शेतकऱ्यांचे आसू पुसण्याचे काम राज्य सरकार करेल,” असेही त्यांनी स्पष्ट केले.

मराठवाड्यात ३५ हजार कोटींचे नुकसान? ;
हेक्टरी ५० हजार मदतीची रोहित पवारांची मागणी

मराठवाड्यातील दुष्काळी परिस्थितीच्या पार्श्वभूमीवर आमदार रोहित पवार यांनी सरकारकडे शेतकऱ्यांना तातडीने मदत देण्याची मागणी केली आहे. मराठवाड्यात सुमारे ३५ हजार कोटी रुपयांचे नुकसान झाल्याचा दावा करत त्यांनी तातडीने पंचनामे करण्याची मागणी केली. तसेच हेक्टरी ५० हजार रुपये मदत, चारा छावण्या आणि रखडलेली पीक विम्याची रक्कम देण्याची मागणी केली. बीडमधील सुमारे ८०० कोटी आणि धाराशिवमधील २०२२ पासूनचे सुमारे ६०० कोटी रुपयांचे पीक विम्याचे दावे प्रलंबित असल्याचा दावा त्यांनी केला. सरकारवर दबाव वाढल्यानंतरच पंचनाम्याची घोषणा झाल्याचा आरोपही पवार यांनी केला. दरम्यान, मागण्यांसाठी बीडमध्ये आंदोलन करणार असल्याचे त्यांनी सांगितले.

“ट्रोलिंगला घाबरत नाही,माझ्या प्रश्नांची उत्तरं द्या”
अजय बारस्कर यांचं जरांगेंनाआव्हान

मनोज जरांगे यांच्या आंदोलनासंदर्भात आपण उपस्थित केलेल्या प्रश्नांची उत्तरे मिळत नसल्याचा दावा अजय बारस्कर यांनी केला आहे. प्रश्नांची उत्तरे देता येत नसल्यामुळे जरांगे यांच्या सोशल मीडिया टीम आणि समर्थकांकडून आपले बनावट फोटो तयार करून तसेच जुने व्हिडिओ कट-छाट करून बदनामीची मोहीम सुरू असल्याचा आरोप त्यांनी केला. मात्र, अशा ट्रोलिंगला किंवा कथित बदनामीच्या मोहिमेला आपण घाबरत नसल्याचे बारस्कर यांनी म्हटले. गेल्या तीन वर्षांत पहिल्यांदाच जरांगे बचावात्मक भूमिकेत आल्याचा दावाही त्यांनी केला. तसेच उपस्थित केलेल्या मूळ प्रश्नांची उत्तरे देण्याची मागणी बारस्कर यांनी केली.

 अर्धापूरसह नांदेडमध्ये कोरडा दुष्काळ जाहीर करा;
विविध मागण्यांसाठी काँग्रेसचे आंदोलन

अर्धापूर तालुक्यात पावसाअभावी शेतकरी संकटात सापडल्याचा दावा करत काँग्रेसच्या वतीने आंदोलन करण्यात आले. सोयाबीन, कापूस, हळद, तूर, उडीद, मूग आणि ऊस पिकांचे नुकसान झाल्याचे आंदोलनकर्त्यांनी सांगितले. जनावरांच्या चारा आणि पाण्याचा प्रश्नही गंभीर बनल्याचे त्यांनी म्हटले. अर्धापूरसह संपूर्ण नांदेड जिल्ह्यात कोरडा दुष्काळ जाहीर करून शेतकऱ्यांना पीकविमा देण्याची मागणी करण्यात आली. हेक्टरी दोन लाख रुपये मदत, रब्बी पेरणीसाठी हेक्टरी २५ हजार रुपये, मागील दोन वर्षांचा पीकविमा आणि चारा अनुदान देण्याची मागणी करण्यात आली. तसेच कर्जवसुलीला स्थगिती आणि व्याजात सवलत देण्याची मागणीही करण्यात आली. आंदोलनात काँग्रेस पदाधिकारी आणि शेतकरी सहभागी झाले होते.

 SIR अंतर्गत ५१ हजार नागरिकांना नोटिसा;
चोपडा मतदारसंघात ३० सप्टेंबरपासून सुनावणी

चोपडा विधानसभा मतदारसंघात विशेष सखोल पुनरीक्षण अर्थात SIR प्रक्रियेत ३ लाख २७ हजार ४४९ मतदारांचे फॉर्म अपलोड करण्यात आले आहेत. त्यापैकी ४२ हजार १०५ मतदार मयत, दुबार किंवा स्थलांतरित असल्याची नोंद झाली आहे. आता सुमारे ५१ हजार नागरिकांना नोटिसा बजावण्याची प्रक्रिया सुरू झाली आहे. नोटीस बजावण्यासाठी कर्मचाऱ्यांना दोन दिवसांचे प्रशिक्षण देण्यात आले. ३० सप्टेंबरपासून या प्रकरणांवर सुनावणी सुरू होणार आहे. महसूल विभागाचे कर्मचारी आणि तहसीलदार भाऊसाहेब थोरात यांच्या मार्गदर्शनाखाली प्रक्रिया राबवली जात आहे. SIR प्रक्रियेत मतदारांची माहिती तपासून मतदार यादी अद्ययावत करण्याचे काम सुरू आहे.

₹२,७००चं कॅन्सर औषध ₹२७ हजारांना;
औषधांच्या दरांवर सुप्रीम कोर्टाचे ताशेरे Top 15 News :

खासगी रुग्णालयांमध्ये औषधे आणि वैद्यकीय साहित्याच्या कथित अवाजवी दरांबाबत दाखल जनहित याचिकेवर सुनावणी करताना सुप्रीम कोर्टाने केंद्र सरकार आणि संबंधित यंत्रणांना प्रश्न विचारले. याचिकेत ₹११ची सलाईन ₹३२५ला, तर ₹२,७००चे कॅन्सर औषध ₹२७ हजारांना विकले जात असल्याचा दावा करण्यात आला. औषधांच्या अवाजवी किमतींवर नियंत्रणासाठी कठोर पावले उचलण्याची मागणी करण्यात आली आहे. अन्न व औषध प्रशासनाचे आयुक्त तुकाराम मुंढे यांनीही औषधांच्या किमतींबाबत संबंधित केंद्रीय यंत्रणांकडे पत्रव्यवहार केला होता. दरम्यान, औषधांच्या किमती, वैद्यकीय उपकरणांवरील नियंत्रण आणि रुग्णांवरील आर्थिक भार याबाबत न्यायालयीन सुनावणीत गंभीर मुद्दे उपस्थित झाले.

भाजपला निवडणुकीआधी मोठा धक्का;
जेडीयूची पंजाबमध्ये नवी आघाडी

नितीश कुमार यांच्या जनता दल युनायटेडच्या पंजाब युनिटने 2027 विधानसभा निवडणुकीच्या तयारीला वेग दिला आहे. जेडीयूने शिरोमणी अकाली दल श्री आनंदपूर साहिबसोबत युती जाहीर केली आहे. समान विचारांच्या पक्षांना एका मंचावर आणणे हा युतीचा उद्देश असल्याचे जेडीयू पंजाबचे प्रदेशाध्यक्ष मलविंदर सिंह बेनीपाल यांनी सांगितले. जेडीयू पंजाबमधील सर्व विधानसभा जागांवर निवडणूक लढवण्याची तयारी करत आहे. दरम्यान, दिवंगत अभिनेते सुनील दत्त यांच्या पुतणी ममता दत्त यांनी जेडीयूमध्ये प्रवेश केला आहे. या युतीच्या माध्यमातून पंजाबमध्ये संघटन मजबूत करण्यावर भर दिला जाणार आहे. पक्षाने जनसंपर्क आणि संघटनात्मक विस्ताराचे काम सुरू करण्याची माहितीही दिली आहे.

१० वर्षांनंतर शी जिनपिंग अमेरिकेत;
ट्रम्प यांनी विमानतळावर केले स्वागत

चीनचे राष्ट्राध्यक्ष शी जिनपिंग १० वर्षांनंतर प्रथमच अमेरिकेत दाखल झाले असून, राष्ट्राध्यक्ष डोनाल्ड ट्रम्प यांनी जॉइंट बेस अँड्र्यूज येथे त्यांचे वैयक्तिकरित्या स्वागत केले. ट्रम्प यांनी रेड कार्पेट अंथरून शी यांना औपचारिक सन्मान दिला. व्यापार, शुल्क, कृत्रिम बुद्धिमत्ता, तैवान आणि इराण यांसारख्या मुद्द्यांवर दोन्ही नेत्यांमध्ये चर्चा होण्याची शक्यता आहे. शी आणि त्यांच्या पत्नी पेंग लियुआन यांच्यासाठी व्हाइट हाऊसमध्ये औपचारिक कार्यक्रम आणि राजभोजाचे आयोजन करण्यात आले आहे. याच वर्षी मे महिन्यात ट्रम्प यांनी चीनचा दौरा केला होता. त्यानंतर दोन्ही नेत्यांची ही दुसरी प्रत्यक्ष भेट आहे. या भेटीत अमेरिका-चीन संबंधांमध्ये स्थिरता राखण्यावरही चर्चा होण्याची शक्यता आहे.

अभिषेक शर्माच्या नावावर नकोसा विक्रम;
2026 मध्ये सातव्यांदा शून्यावर बाद

जपानविरुद्धच्या टी-20 सामन्यात भारतीय सलामीवीर अभिषेक शर्मा पहिल्याच चेंडूवर बाद झाला. चार्ली हारा-हिंझेच्या गोलंदाजीवर शोमा सुगाया-स्लेटरने त्याचा झेल घेतला. यासह 2026 मध्ये टी-20 आंतरराष्ट्रीय क्रिकेटमध्ये अभिषेक सातव्यांदा शून्यावर बाद झाला. एका कॅलेंडर वर्षात सर्वाधिक सात वेळा शून्यावर बाद होण्याच्या विक्रमाची त्याने बरोबरी केली. विशेष म्हणजे, यंदा अभिषेक पाच वेळा गोल्डन डकवर बाद झाला आहे. सर्व प्रकारच्या टी-20 सामन्यांचा विचार करता, 2026 मध्ये त्याच्या नावावर 10 शून्यांची नोंद आहे. मात्र, याच वर्षी त्याने अफगाणिस्तानविरुद्ध अवघ्या 30 चेंडूत शतक झळकावले होते.

२० वर्षानंतर सलमानला विवेकची साथ!
बॉडी शेमिंगवर मांडलं स्पष्ट मत Top 15 News :

‘बिग बॉस 20’मध्ये सलमान खानने ट्रोलर्सना सुनावल्यानंतर आता विवेक ओबेरॉयची प्रतिक्रिया चर्चेत आली आहे. विशेष म्हणजे, सलमान आणि विवेक गेल्या अनेक वर्षांपासून एकमेकांशी बोलत नसल्याचे म्हटले जाते. मात्र, ट्रोलिंगच्या मुद्द्यावर विवेकने सलमानच्या भूमिकेशी साधर्म्य असणारे मत मांडले. IANSला दिलेल्या मुलाखतीत विवेक म्हणाला की, आयुष्यात अनेक सकारात्मक गोष्टी घडत असताना नकारात्मकतेवर लक्ष केंद्रित करण्याची गरज नाही. सलमानने ‘विकेंड का वार’मध्ये वय, लूक आणि बॉडी शेमिंगवरून ट्रोल करणाऱ्यांना फटकारले होते. कतरिना कैफच्या वाढलेल्या वजनावर होणाऱ्या ट्रोलिंगचाही त्याने मुद्दा उपस्थित केला होता. त्यामुळे विवेकची ही प्रतिक्रिया विशेष चर्चेत आली आहे.