राज्यात पुन्हा पावसाचा जोर;
२४ जिल्ह्यांना वादळी पावसाचा इशारा

Top 15 News : गेल्या काही दिवसांपासून गायब झालेल्या पावसाने पुन्हा जोर धरला असून, शेतकऱ्यांना दिलासा मिळण्याची शक्यता आहे. हवामान विभागाने आज राज्यातील २४ जिल्ह्यांमध्ये वादळी वाऱ्यासह पावसाचा अंदाज वर्तवला आहे. सातारा घाटमाथा आणि सांगलीसह रत्नागिरी, सिंधुदुर्गमध्ये मुसळधार पावसाची शक्यता आहे. मध्य महाराष्ट्रातील पुणे, नाशिक, अहिल्यानगर, कोल्हापूर, सोलापूर, तसेच मराठवाड्यातील परभणी, हिंगोली, धाराशिव, लातूर आणि नांदेडमध्येही पावसाचा अंदाज आहे. विदर्भातील आठ जिल्ह्यांना विजांच्या कडकडाटासह वादळी पावसाचा येलो अलर्ट देण्यात आला असून, नागरिक आणि शेतकऱ्यांना सतर्क राहण्याचे आवाहन करण्यात आले आहे.

तुकाराम मुंढेंनी बदलीच्या चर्चांवर सोडलं मौन;
म्हणाले, ‘सरकार देईल तिथे काम करेन’

राज्याच्या अन्न व औषध प्रशासन विभागाचे आयुक्त तुकाराम मुंढे यांनी आपल्या बदलीच्या चर्चांवर भाष्य केले आहे. पुढची बदली कुठे होईल, हे माझ्या हातात नसून सरकार जो विभाग देईल, तिथे काम करेन, असे त्यांनी सांगितले. भविष्याचा फारसा विचार न करता सध्या सोपवलेली जबाबदारी उत्तमपणे पार पाडण्यावर भर असल्याचे मुंढे म्हणाले. कामचुकारपणा किंवा चुकीचे काम करणाऱ्या अधिकारी-कर्मचाऱ्यांवर कारवाई केली जाऊ शकते, असा इशाराही त्यांनी दिला. तसेच वर्तमानात जगून आपली जबाबदारी प्रामाणिकपणे पार पाडली पाहिजे, असे त्यांनी स्पष्ट केले.

संजय जाधवांकडून मनोज जरांगेंची भेट;
म्हणाले, ‘आमचं नातं जिव्हाळ्याचं’

परभणीचे खासदार संजय जाधव यांनी छत्रपती संभाजीनगरमध्ये मराठा आरक्षण आंदोलक मनोज जरांगे पाटील यांची भेट घेतली. अंतरवाली सराटी हे गाव आपल्या लोकसभा मतदारसंघात येत असल्याने जरांगे आणि आपले नाते जिव्हाळ्याचे असल्याचे जाधव यांनी सांगितले. घरातील व्यक्ती आजारी असल्यास तिची विचारपूस करणे कर्तव्य असल्याचेही ते म्हणाले. जरांगेंच्या आंदोलनावरील आरोपांबाबत पुरावे शासनाकडे द्यावेत, त्यानंतर शहानिशा होईल, असे जाधव यांनी स्पष्ट केले. दुष्काळ जाहीर करून शेतकऱ्यांना तातडीने मदत करण्याची मागणी त्यांनी केली. दिशा सालियन प्रकरणाबाबत विचारले असता, हा विषय आपल्याला माहिती नसल्याचे सांगत त्यांनी प्रतिक्रिया देणे टाळले.

काँग्रेसला बुलढाण्यात मोठा धक्का;
राहुल बोंद्रे भाजपमध्ये प्रवेश करणार

बुलढाणा जिल्ह्यात काँग्रेसला मोठा राजकीय धक्का बसण्याची शक्यता आहे. चिखली विधानसभा मतदारसंघाचे माजी आमदार राहुल बोंद्रे यांनी फेसबुक लाईव्ह करत लवकरच भाजपमध्ये प्रवेश करणार असल्याची घोषणा केली. काँग्रेसने आपल्याला अनेक संधी आणि पदे दिली असून, पक्षातील कार्यकर्त्यांचे प्रेम कधीही विसरणार नसल्याचे बोंद्रे यांनी सांगितले. चिखलीच्या भाजप आमदार श्वेता महाले यांनी २२ सप्टेंबर रोजी मुख्यमंत्र्यांच्या उपस्थितीत पक्षप्रवेश होण्याची शक्यता व्यक्त केली. त्यामुळे काँग्रेस प्रदेशाध्यक्ष हर्षवर्धन सपकाळ यांच्या जिल्ह्यातील या राजकीय घडामोडीकडे लक्ष लागले आहे.

“कायदा साधन म्हणून वापरायचा असतो”
सतीश सालियन यांच्या त्या कृतीवर असीम सरोदे स्पष्टच बोलले Top 15 News : 

दिशा सालियन मृत्यूप्रकरणी सुरू असलेल्या घडामोडींवर ज्येष्ठ वकील असीम सरोदे यांनी सोशल मीडिया पोस्टद्वारे प्रतिक्रिया दिली आहे. सतीश सालियन यांनी आदित्य ठाकरे यांच्याविरोधात ५०० कोटी रुपयांचा मानहानीचा दावा दाखल केला असून, त्याची नोटीस देण्यासाठी ते मातोश्रीवर गेले होते. यावर सरोदे यांनी फौजफाटा घेऊन एखाद्याच्या घरी जाऊन नोटीस देण्याला कायदेशीर आधार आहे का, असा प्रश्न उपस्थित केला. फौजदारी प्रकरणात अशी नोटीस प्रत्यक्ष घरी जाऊन देण्याची प्रक्रिया नसल्याचे त्यांनी नमूद केले.

RNO- गणपती मिरवणुकीत भाजप-ठाकरे गटात मोठा गोंधळ;
३० ते ४० जणांवर गुन्हा दाखल

गणपती विसर्जन मिरवणुकीदरम्यान भाजप नगरसेविका उपेक्षा भोईर आणि ठाकरे गटाचे सुरेश भोईर यांच्या समर्थकांमध्ये वाद होऊन हाणामारी झाल्याची घटना घडली. या घटनेमुळे परिसरात काही काळ तणावाचे वातावरण निर्माण झाले. उपेक्षा भोईर यांनी निवडणुकीतील राजकीय वैमनस्यातून जाणूनबुजून वाद घातल्याचा आरोप केला आहे. गणपती विसर्जनासाठी जवळपास तीन तास ताटकळत उभे राहावे लागल्याचेही त्यांनी सांगितले. दरवर्षी सुरेश भोईर यांच्या कुटुंबीयांकडून त्रास दिला जात असल्याचा दावा करत, संबंधितांवर पोलिसांनी ठोस कारवाई करावी, अशी मागणी त्यांनी केली. पोलिसांकडून घटनेचा तपास सुरू आहे.

RNO- सात दिवसांच्या बाप्पाला निरोप;
कोकणवासीयांचा मुंबईकडे परतीचा प्रवास सुरू

सात दिवसांच्या गणरायाला भावपूर्ण निरोप दिल्यानंतर कोकणवासीयांचा मुंबईकडे परतीचा प्रवास सुरू झाला आहे. मडगावहून मुंबईकडे जाणाऱ्या कोकणकन्या एक्स्प्रेसला मोठी गर्दी पाहायला मिळाली. सकाळपासूनच मांडवी, जन्मशताब्दी, तुतारी एक्स्प्रेससह हॉलिडे स्पेशल गाड्यांमध्येही प्रवाशांची मोठी गर्दी झाली. त्यामुळे रेल्वे स्थानकांवर लगबग आणि गर्दीचे चित्र दिसत आहे. गणेशोत्सवासाठी कोकणात दाखल झालेले चाकरमानी आता कामानिमित्त मुंबईकडे परतत आहेत. आगामी दिवसांतही कोकणातून मुंबईकडे जाणाऱ्या रेल्वेगाड्यांमध्ये गर्दी कायम राहण्याची शक्यता आहे.

RNO- वडिलांचा त्याग अन् सोनमचा अचूक वेध;
जमीन विकून साकारलं आशियाई पदकाचं स्वप्न

कोल्हापूरच्या सोनम मस्करने आशियाई क्रीडा स्पर्धेत नेत्रदीपक कामगिरी करत भारताला रौप्यपदक मिळवून दिलं. जपानमधील आयची-नागोया येथे झालेल्या महिलांच्या १० मीटर एअर रायफल सांघिक प्रकारात सोनम, एलावेनिल वालारिवन आणि विदार्सा विनोद यांच्या भारतीय संघाने १८९८ गुणांसह रौप्यपदक पटकावलं. सोनमने ६३४.१ गुणांची उत्कृष्ट वैयक्तिक कामगिरी केली. तिच्या या यशामागे वडील उत्तम मस्कर यांचा मोठा त्याग आहे. मुलीच्या प्रशिक्षणासाठी त्यांनी जमीन विकली. अखेर सोनमने आंतरराष्ट्रीय स्तरावर पदक जिंकत वडिलांच्या त्यागाचं चीज केलं. तिच्या यशामुळे कोल्हापुरात आनंदाचं वातावरण आहे.

RNO- भक्तीसोबत शिक्षणसेवेचा संकल्प;
देणगीऐवजी वही-पेन स्वीकारणार

शिरपूरच्या सुभाष कॉलनी सांस्कृतिक मित्र मंडळाने गणेशोत्सवानिमित्त यंदा अनोखा सामाजिक उपक्रम राबवला आहे. मंडळाने स्वामी समर्थ महाराजांच्या मठ आणि गुंफेचा आकर्षक देखावा साकारला आहे. या देखाव्याच्या दर्शनासाठी येणाऱ्या भाविकांकडून पैसे देणगी म्हणून स्वीकारले जाणार नाहीत. त्याऐवजी नवीन वही आणि पेन आणण्याचे आवाहन करण्यात आले आहे. जमा झालेल्या वह्या-पेन आर्थिकदृष्ट्या दुर्बल विद्यार्थ्यांना देण्यात येणार आहेत. भक्तीला सामाजिक बांधिलकीची जोड देत विद्यार्थ्यांच्या शिक्षणाला हातभार लावण्याचा मंडळाचा प्रयत्न आहे. दरवर्षी मंडळाकडून सामाजिक संदेश देणारे आकर्षक देखावे साकारले जातात.

RNO- बुलढाण्यात शेतकरी संकटात;
हेक्टरी १ लाखांची मदत द्या – हर्षवर्धन सपकाळ Top 15 News : 

बुलढाणा जिल्ह्यात गेल्या ४० ते ४५ दिवसांपासून पावसाने खंड दिल्याने पिकांचे नुकसान झाल्याचा दावा काँग्रेस प्रदेशाध्यक्ष हर्षवर्धन सपकाळ यांनी केला. त्यांनी शेतकऱ्यांच्या बांधावर जाऊन परिस्थितीची पाहणी केली. एका शेतकऱ्याने २० एकर सोयाबीन पीक मोडीत काढण्याचा निर्णय घेतल्याचे सपकाळ यांनी सांगितले. शेतकऱ्यांना तातडीने हेक्टरी एक लाख रुपये मदत, सरसकट कर्जमाफी आणि मुलांचे शैक्षणिक शुल्क माफ करण्याची मागणी त्यांनी केली. शक्तीपीठ महामार्गासाठी प्रस्तावित ७८ हजार कोटींचा निधी शेतकऱ्यांसाठी वापरण्याची मागणीही त्यांनी केली. सरकारने तातडीने निर्णय घ्यावा, असे आवाहन सपकाळ यांनी केले.

दिल्ली SIR मोहिमेत दिग्गजांना नोटिसा;
आडवाणी, जयशंकर, निवडणूक आयुक्त संधूंचा समावेश

दिल्लीतील मतदार यादीच्या विशेष सखोल पुनरीक्षण प्रक्रियेदरम्यान अनेक दिग्गज मतदारांना नोटिसा बजावण्यात आल्या आहेत. माजी उपपंतप्रधान लालकृष्ण आडवाणी, परराष्ट्रमंत्री एस. जयशंकर, माजी उपराष्ट्रपती जगदीप धनखड आणि निवडणूक आयुक्त एस.एस. संधू यांचा नोटीस बजावलेल्या यादीत समावेश आहे. नाव, कुटुंबीयांची माहिती किंवा जुन्या मतदार यादीशी नोंद जुळत नसल्यासारख्या विसंगतींमुळे या नोटिसा देण्यात आल्याचे अधिकाऱ्यांनी सांगितले आहे. दिल्लीमध्ये अशा सुमारे ३३.१३ लाख नोटिसा जारी करण्यात आल्या आहेत.

राहुल गांधींसमोर मोदींची मिमिक्री;
पुलकित मणीचा नोएडातील कॉमेडी शो रद्द

इंदौरमधील ‘छात्रों की गूंज’ कार्यक्रमात राहुल गांधींसमोर पंतप्रधान नरेंद्र मोदींची मिमिक्री केल्यानंतर चर्चेत आलेला स्टँडअप कॉमेडियन पुलकित मणी आता पुन्हा चर्चेत आला आहे. त्याचा नोएडातील कॉमेडी शो रद्द करण्यात आला असून, ही माहिती त्याने सोशल मीडियावर दिली. शो रद्द करण्यामागचे अधिकृत कारण मात्र स्पष्ट झालेले नाही. दरम्यान, पुलकितने इन्स्टाग्राम स्टोरीवर ‘अब अंडरग्राऊंड होने का समय आ गया’ अशी पोस्ट केल्याचे सांगितले जात आहे. इंदौरमधील कार्यक्रमातील मिमिक्रीनंतर भाजपकडून राहुल गांधी आणि पुलकितवर टीका करण्यात आली होती. त्यामुळे शो रद्द होण्यामागे राजकीय वादाचा संबंध असल्याची सोशल मीडियावर चर्चा आहे.

उत्तर कोरियाकडून तीन तासांत दोन क्षेपणास्त्र चाचण्या;
दक्षिण कोरियाचा निषेध

उत्तर कोरियाने रविवारी आपल्या पूर्व किनाऱ्यावरून तीन तासांच्या अंतराने दोन बॅलिस्टिक क्षेपणास्त्रे डागल्याचा दावा दक्षिण कोरियाच्या लष्कराने केला आहे. पहिलं क्षेपणास्त्र वॉनसान परिसरातून समुद्राच्या दिशेने डागण्यात आलं आणि त्याने सुमारे ४५० किलोमीटर अंतर कापल्याचा अंदाज आहे. त्यानंतर तीन तासांनी आणखी एका क्षेपणास्त्राचं प्रक्षेपण करण्यात आलं. दक्षिण कोरिया आणि अमेरिकेच्या गुप्तचर यंत्रणा या हालचालींवर लक्ष ठेवून आहेत. दक्षिण कोरियाच्या राष्ट्रीय सुरक्षा परिषदेने या चाचण्यांचा निषेध करत, त्या संयुक्त राष्ट्रांच्या सुरक्षा परिषदेच्या ठरावांचं उल्लंघन असल्याचं म्हटलं आहे. जपानलाही या चाचणीची माहिती देण्यात आली आहे.

ऑस्ट्रेलियाचा थरारक विजय;
झिम्बाब्वेवर 3-0 ने क्लीन स्वीप

हरारे स्पोर्ट्स क्लबमध्ये रंगलेल्या तिसऱ्या वनडेत ऑस्ट्रेलियाने झिम्बाब्वेचा एका गडीने पराभव केला. झिम्बाब्वेने प्रथम फलंदाजी करत 271 धावा केल्या. सिकंदर रझाने 81, क्रेग एर्विनने 59 आणि इनोसेंट कायाने 55 धावा केल्या. प्रत्युत्तरात जोश इंग्लिसने 103 धावांची शतकी खेळी करत ऑस्ट्रेलियाला विजयाच्या जवळ नेले. मात्र, त्याच्या बाद झाल्यानंतर सामना रोमांचक झाला. ब्रॅड इव्हान्सने चार बळी घेत ऑस्ट्रेलियाला अडचणीत आणले. अखेर नेथन एलिसने नाबाद 36 धावांची संयमी खेळी करत 49.5 षटकांत संघाला विजय मिळवून दिला. मालिकेत ऑस्ट्रेलियाने 3-0 असा क्लीन स्वीप केला.

‘आम्ही कॅन्सरला घाबरत नाही’;
पत्नीच्या आजारावर मांजरेकरांची प्रतिक्रिया Top 15 News : 

अभिनेत्री मेधा मांजरेकर यांच्या कॅन्सरच्या आजाराबाबत महेश मांजरेकर यांनी प्रथमच प्रसारमाध्यमांशी भाष्य केले. ‘बंडखोर’ सिनेमाच्या प्रमोशनदरम्यान बोलताना त्यांनी मेधाची तब्येत आता ठीक असल्याचे सांगितले. कॅन्सरचे निदान झाल्यानंतर तिच्या थेरपी सुरू झाल्या आणि केस गळाले, मात्र आता तिचे केस पुन्हा छान वाढले असल्याचे त्यांनी सांगितले. ‘आम्ही कॅन्सरला घाबरत नाही, आम्हाला कुणीही सहानुभूती देऊ नये,’ असेही मांजरेकर म्हणाले. मेधा यांनी जुलैच्या सुरुवातीला सोशल मीडिया पोस्टद्वारे कॅन्सरचे निदान झाल्याची माहिती दिली होती.