अजित पवार महायुतीची साथ सोडणार होते? अतुल लोंढेंचा मोठा दावा;
दोन्ही राष्ट्रवादींच्या विलीनीकरणाच्या चर्चांना वेग

Top 15 News:  महाराष्ट्राच्या राजकारणात दोन्ही राष्ट्रवादी काँग्रेसच्या विलीनीकरणाच्या चर्चांनी जोर धरला आहे. अशातच काँग्रेस प्रवक्ते अतुल लोंढे यांनी अजित पवार महायुतीची साथ सोडणार होते, असा मोठा दावा केला आहे. दुसरीकडे, विलीनीकरणाबाबत अद्याप शरद पवार यांच्याकडे कोणताही औपचारिक प्रस्ताव आलेला नसल्याची माहिती सूत्रांनी दिली आहे. दरम्यान, सुनील तटकरे यांनी उपमुख्यमंत्री सुनेत्रा पवार आणि मुख्यमंत्री देवेंद्र फडणवीस यांची भेट घेतल्याने चर्चांना आणखी वेग आला आहे. सुनेत्रा पवार यांनीही ‘जशी वेळ येईल, तशा गोष्टी कळतील,’ असे सूचक विधान केले आहे. तर संजय राऊत यांनी अजित पवारांच्या राष्ट्रवादीचे २० ते २२ आमदार बाहेर पडण्याच्या तयारीत असल्याचा दावा केला आहे. त्यामुळे राष्ट्रवादीच्या भविष्यातील राजकीय भूमिकेकडे सर्वांचे लक्ष लागले आहे.

अजितदादांच्या मृत्यूवर पुन्हा संशय!
आता स्वकीयांकडूनच घातपाताचा दावा

अजित पवार यांच्या अपघाती मृत्यूला १० महिने उलटले असतानाही या घटनेवरील संशय कायम आहे. आता राष्ट्रवादी काँग्रेसचे राष्ट्रीय प्रवक्ते उमेश पाटील यांनीच अजितदादांचा अपघात नसून घातपात असण्याची शंका व्यक्त केली आहे. याआधी शिवसेनेचे रामदास कदम यांनी सुनील तटकरे यांच्यावर गंभीर आरोप केले होते. मात्र, तटकरेंनी हे आरोप फेटाळत कायदेशीर कारवाईचा इशारा दिला होता. आता स्वकीय पक्षातील नेत्यानेच घातपाताची शंका उपस्थित केल्याने राष्ट्रवादीतील अंतर्गत राजकारण पुन्हा चर्चेत आले आहे. उमेश पाटील यांच्या विधानामुळे तटकरे आणि पार्थ पवार गटातील मतभेदांची चर्चाही रंगू लागली आहे. मात्र, या आरोपांना अद्याप अधिकृत तपासातून दुजोरा मिळालेला नाही.

रब्बी हंगामासाठी केंद्र सरकारची मोठी घोषणा!
खत अनुदानात २४ हजार कोटींची वाढ

रब्बी हंगाम २०२६-२७ पूर्वी केंद्र सरकारने शेतकऱ्यांसाठी मोठा निर्णय घेतला आहे. रासायनिक खतांच्या अनुदानासाठी ६२ हजार ३७० कोटी रुपयांच्या तरतुदीला केंद्रीय मंत्रिमंडळाने मंजुरी दिली आहे. गेल्या हंगामाच्या तुलनेत अनुदानात २४ हजार ४१७ कोटी रुपयांची वाढ करण्यात आली आहे. पंतप्रधान नरेंद्र मोदी यांच्या अध्यक्षतेखाली झालेल्या बैठकीत हा निर्णय घेण्यात आला. यामुळे डीएपी आणि एनपीकेएससह फॉस्फेट व पोटॅशयुक्त खतांचा पुरवठा सुरळीत ठेवण्यास मदत होणार आहे. महाराष्ट्रातील गहू, हरभरा, ज्वारी आणि करडई उत्पादक शेतकऱ्यांनाही याचा फायदा अपेक्षित आहे. मात्र, प्रत्यक्ष दिलासा खतांची उपलब्धता आणि वितरण व्यवस्थेवर अवलंबून असेल.

‘पुढच्या दिवाळीला भाऊ मंत्री असणार!’;
सुषमा अंधारेंच्या वक्तव्याने राजकीय चर्चांना उधाण

परळीतील दिवाळी पाडव्याच्या कार्यक्रमात माजी मंत्री धनंजय मुंडे आणि शिवसेना ठाकरे गटाच्या उपनेत्या सुषमा अंधारे एकाच व्यासपीठावर आले. यावेळी अंधारे यांनी धनंजय मुंडे यांना भाऊबीजेच्या शुभेच्छा देताना मिश्किल वक्तव्य केले. ‘इडा-पिडा जाऊ दे आणि भाऊचं राज येऊ दे. पुढच्या दिवाळीला तुमचा उल्लेख मंत्री म्हणूनच करेन,’ असे त्या म्हणाल्या. परळीला सत्ताकेंद्र असण्याची सवय असल्याचेही त्यांनी नमूद केले. त्यांच्या या वक्तव्यामुळे धनंजय मुंडेंच्या राजकीय पुनरागमनाच्या चर्चांना उधाण आले असून, राजकीय वर्तुळात या विधानाचे वेगवेगळे अर्थ लावले जात आहेत.

महाराष्ट्राच्या शिरपेचात मानाचा तुरा!
कोकणातील ३ समुद्रकिनाऱ्यांना आंतरराष्ट्रीय ब्ल्यू फ्लॅग पुरस्कार Top 15 News:  

महाराष्ट्राच्या किनारपट्टीसाठी अभिमानाची बातमी समोर आली आहे. रत्नागिरी जिल्ह्यातील लाडघर, गुहागर आणि रायगडमधील श्रीवर्धन या तीन समुद्रकिनाऱ्यांना २०२६-२७ साठी प्रतिष्ठेचा आंतरराष्ट्रीय ‘ब्ल्यू फ्लॅग’ पुरस्कार जाहीर झाला आहे. प्रथमच महाराष्ट्रातील समुद्रकिनाऱ्यांना हा सन्मान मिळाला आहे. स्वच्छता, पाण्याची गुणवत्ता, पर्यावरण संवर्धन, पर्यटकांची सुरक्षितता आणि शाश्वत पर्यटनाच्या निकषांवर या किनाऱ्यांची निवड झाली. या तिन्ही समुद्रकिनाऱ्यांवरील ब्ल्यू फ्लॅग हंगाम १५ नोव्हेंबरपासून सुरू होणार आहे. या पुरस्कारामुळे कोकणातील पर्यटनाला आंतरराष्ट्रीय ओळख मिळण्यासह स्थानिक रोजगार आणि अर्थव्यवस्थेलाही चालना मिळण्याची अपेक्षा पर्यावरणमंत्री पंकजा मुंडे यांनी व्यक्त केली.

RNO – आदिवासी महिलांसोबत प्रवीण दरेकरांची भाऊबीज;
भेटवस्तू देत जाणून घेतल्या समस्या!

भाऊबीजेच्या निमित्ताने आमदार प्रवीण दरेकर यांनी संजय गांधी राष्ट्रीय उद्यानातील आदिवासी पाड्यांवरील महिलांसोबत भाऊबीज साजरी केली. यावेळी महिलांनी पारंपरिक पद्धतीने त्यांचे औक्षण केले. दरेकर यांनीही महिलांना दिवाळीच्या शुभेच्छा देत भेटवस्तूंचे वाटप केले. यावेळी त्यांनी आदिवासी बांधवांच्या समस्या जाणून घेतल्या. पाणी, मूलभूत सुविधा आणि पुनर्वसनाच्या प्रश्नांवर महिलांशी चर्चा केली. तसेच हे प्रश्न सोडवण्यासाठी शासनदरबारी पाठपुरावा करण्याचे आश्वासन दिले. त्यामुळे भाऊबीजेच्या निमित्ताने सणासोबतच आदिवासी बांधवांच्या प्रश्नांनाही महत्त्व मिळाले.

RNO – अजितदादांच्या अपघाताचा तपास सुरूच;
घातपाताच्या चर्चेवर गुलाबराव पाटील म्हणाले…

अजित पवार यांच्या अपघातातील घातपाताच्या संशयाबाबत तपास यंत्रणा चौकशी करत आहे. तपास पूर्ण होण्याआधी नेत्यांनी यावर बोलणे उचित नाही. एकमेकांवर आरोप करण्यापेक्षा तपास यंत्रणेला काम करू द्यावे, असे मंत्री गुलाबराव पाटील म्हणाले. दरम्यान, अजित पवार गटाच्या आमदारांच्या शरद पवार भेटीवर त्यांनी हा वैयक्तिक प्रश्न असल्याचे सांगितले. तसेच ठाकरे-शिंदे एकत्र येण्याच्या चर्चेवर ‘शिंदेसाहेब इंजिन आहेत आणि मी त्यांच्या इंजिनचा डबा आहे,’ अशी मिश्किल प्रतिक्रिया दिली.

RNO – २८ वर्षांची भाऊबीजेची परंपरा कायम!
मानलेल्या बहिणीच्या घरी पोहोचले अब्दुल सत्तार

राजकारणातील व्यस्ततेतही आमदार अब्दुल सत्तार यांनी २८ वर्षांची भाऊबीजेची परंपरा जपली. सिल्लोड तालुक्यातील सावखेडा येथे ते आपल्या मानलेल्या बहिणीच्या घरी भाऊबीज साजरी करण्यासाठी पोहोचले. यावेळी बहिणीने औक्षण करून त्यांचे स्वागत केले, तर सत्तार यांनी बहिणीला साडी भेट दिली. रक्ताचे नाते नसतानाही गेल्या २८ वर्षांपासून जपलेले हे बंध पाहायला मिळाले. राजकीय धावपळीतही नात्यांमधील आपुलकी आणि माणुसकी जपण्याचा संदेश या भेटीतून अधोरेखित झाला.

RNO – भाऊबीजेचा अनोखा उपक्रम!
भाजप नेते संजय केनेकरांकडून एकल महिलांना शिधावाटप

भाऊबीजेच्या निमित्ताने भाजप नेते संजय केनेकर यांच्या उपस्थितीत एकल महिला महासंघाच्या वतीने शिधावाटप कार्यक्रमाचे आयोजन करण्यात आले. या उपक्रमातून गरजू आणि एकल महिलांना शिध्याचे वाटप करण्यात आले. सणासुदीच्या काळात या महिलांना आधार मिळावा आणि त्यांची भाऊबीज आनंदात साजरी व्हावी, हा या उपक्रमाचा उद्देश होता. तसेच एकल महिलांचा सन्मान राखत त्यांच्या चेहऱ्यावर आनंद फुलवण्याचा प्रयत्न यावेळी करण्यात आला.

RNO – नवी मुंबईचा देशभरात डंका!
सर्वोत्तम स्वच्छ शहराचा मान पटकावला

नवी मुंबई महानगरपालिकेने पुन्हा एकदा देशपातळीवर स्वच्छतेचा ठसा उमटवला आहे. देशातील सर्वोत्तम स्वच्छ शहर म्हणून नवी मुंबईने प्रथम क्रमांक मिळवला आहे. या उल्लेखनीय यशाबद्दल राष्ट्रपती महोदयांच्या हस्ते महापौर सुजाता पाटील यांनी मानाचा पुरस्कार स्वीकारला. या पुरस्कारामुळे नवी मुंबईच्या शिरपेचात आणखी एक मानाचा तुरा रोवला गेला आहे. महानगरपालिकेने राबवलेल्या स्वच्छता मोहिमेचे देशभरातून कौतुक होत असून, शहराच्या स्वच्छतेसाठी केलेल्या प्रयत्नांना राष्ट्रीय स्तरावर मोठी पावती मिळाली आहे.

मोदी सरकारचा मोठा निर्णय!
भारतीय व्हिसा प्रक्रिया होणार सोपी Top 15 News: 

परदेशी नागरिकांसाठी केंद्र सरकारने भारतीय व्हिसा प्रणाली अधिक सुलभ करण्याचा निर्णय घेतला आहे. पंतप्रधान नरेंद्र मोदी यांच्या नेतृत्वाखाली गृह मंत्रालयाने व्हिसा श्रेणी आणि अर्ज प्रक्रियेत महत्त्वाचे बदल केले आहेत. नव्या व्यवस्थेनुसार मुख्य व्हिसा श्रेणी १३ वरून ९, तर उपश्रेणी ४९ वरून २३ करण्यात आल्या आहेत. हे बदल २७ ऑगस्ट २०२६ पासून लागू होणार आहेत. विशेष म्हणजे, व्हिसा अर्जातील माहिती भरण्यासाठी आवश्यक असलेले रकाने ६५ ते ७० टक्क्यांनी कमी करण्यात आले आहेत. यामुळे परदेशी पर्यटक, वैद्यकीय उपचारांसाठी येणारे रुग्ण, विद्यार्थी, संशोधक आणि व्यावसायिकांना दिलासा मिळणार आहे. सध्या १७२ देशांच्या नागरिकांना भारतासाठी ई-व्हिसाची सुविधा उपलब्ध आहे. या बदलांमुळे व्हिसा अर्ज प्रक्रिया अधिक जलद आणि सोयीस्कर करण्याचा सरकारचा प्रयत्न आहे.

सोनिया गांधींच्या आत्मचरित्राची चर्चा;
जावई रॉबर्ट वाड्रा म्हणाले, ‘मला त्यांचा खूप अभिमान!’

काँग्रेसच्या माजी अध्यक्षा सोनिया गांधी यांचे ‘बिलाँगिंग : अ जर्नी ऑफ लव्ह’ हे आत्मचरित्र १० नोव्हेंबर रोजी प्रकाशित झाले. या पुस्तकाची राजकीय वर्तुळात चर्चा सुरू असतानाच त्यांचे जावई रॉबर्ट वाड्रा यांनी सोनिया गांधींचे कौतुक केले आहे. ‘मला त्यांचा खूप अभिमान वाटतो. त्यांची ताकद, दृष्टिकोन आणि देशासाठीचे योगदान मोठे आहे,’ अशी प्रतिक्रिया त्यांनी दिली. राजीव गांधी यांच्या निधनानंतर सोनिया गांधी यांनी कठीण परिस्थितीचा खंबीरपणे सामना केल्याचेही वाड्रा म्हणाले. त्यांनी अद्याप पुस्तक वाचले नसले तरी सोनिया गांधी यांनी त्यांच्यासाठी पुस्तकावर खास संदेश लिहिल्याचे सांगितले. तसेच अधिकाधिक लोकांनी हे पुस्तक वाचावे, असे आवाहनही त्यांनी केले.

पाकिस्तानात पोलिसांवर भीषण हल्ला!
डीएसपीसह ११ पोलिसांचा मृत्यू, ५ वाहने जाळली

पाकिस्तानच्या खैबर पख्तुनख्वा प्रांतात पोलिसांच्या पथकावर बंदूकधाऱ्यांनी हल्ला केला. कोहाट आणि करक जिल्ह्यांदरम्यान जलंधर बांदा परिसरात ही घटना घडली. या हल्ल्यात एका डीएसपीसह ११ पोलिसांचा मृत्यू झाला असून, १२ जण जखमी झाले आहेत. मिळालेल्या माहितीनुसार, अवैध सोन्याच्या खाणकामाविरोधात छापा टाकण्यासाठी पोलीस पथक जात असताना दबा धरून बसलेल्या हल्लेखोरांनी अंदाधुंद गोळीबार केला. त्यानंतर पोलिसांची पाच वाहनेही पेटवून दिली. हल्लेखोरांची ओळख अद्याप समोर आलेली नाही. या घटनेमुळे परिसरातील सुरक्षा व्यवस्थेचा प्रश्न पुन्हा ऐरणीवर आला आहे.

हार्दिक पांड्याची पंजाबमध्ये एंट्री;
कर्णधारपदाबाबतचा सस्पेन्स संपवला

आयपीएल २०२७ पूर्वी मुंबई इंडियन्स आणि पंजाब किंग्ज यांच्यात मोठा ट्रेड झाला. हार्दिक पांड्या पंजाबमध्ये, तर वेगवान गोलंदाज अर्शदीप सिंग मुंबई इंडियन्समध्ये दाखल झाला आहे. हार्दिकच्या एंट्रीनंतर पंजाबचे कर्णधारपद कोणाकडे जाणार, याची चर्चा सुरू होती. मात्र, हार्दिकने इन्स्टाग्राम पोस्ट करत या चर्चांना पूर्णविराम दिला. ‘माझा कर्णधार श्रेयस, माझा कोच रिकी आणि माझी टीम पूर्ण पंजाब,’ असे त्याने पोस्टमध्ये म्हटले आहे. त्यामुळे श्रेयस अय्यरच पंजाबचे नेतृत्व करणार असल्याचे स्पष्ट झाले आहे. २०२२ नंतर प्रथमच हार्दिक आयपीएलमध्ये कर्णधाराऐवजी खेळाडू म्हणून मैदानात उतरणार आहे.

काव्या मारन आणि अनिरुद्ध रविचंदर विवाहबंधनात;
ग्रीसमध्ये पार पडला शाही विवाहसोहळा! Top 15 News: 

आयपीएलमधील सनरायझर्स हैदराबादची सह-मालक काव्या मारन आणि प्रसिद्ध संगीतकार अनिरुद्ध रविचंदर विवाहबंधनात अडकले आहेत. ११ नोव्हेंबर २०२६ रोजी ग्रीसमध्ये त्यांचा शाही विवाहसोहळा पार पडला. अनिरुद्धने इन्स्टाग्रामवर लग्नाचा फोटो शेअर करत ‘आज ती आयुष्यभरासाठी माझी झाली. ११.११’ असे लिहिले. या विवाहाला रजनीकांत, ऐश्वर्या रजनीकांत यांच्यासह निवडक पाहुणे उपस्थित होते. दरम्यान, २१ नोव्हेंबरला चेन्नईत भव्य रिसेप्शन आयोजित करण्यात येणार असल्याची माहिती आहे.