TOP 15  News: १. ‘अर्थ खाते आमच्या हक्काचं, सुनेत्रा पवारांना द्या’, राष्ट्रवादीची मागणी 

उपमुख्यमंत्री सुनेत्रा पवार यांना अर्थ खाते देण्यात यावे, अशी मागणी राष्ट्रवादी काँग्रेसचे शहराध्यक्ष माजी आमदार सुनील टिंगरे यांनी महायुतीच्या समन्वय बैठकीत केली. ‘अर्थ खाते आमच्या हक्काचे होते,’ अशी ठाम भूमिका मांडून टिंगरे यांनी राष्ट्रवादीच्या मागण्या मुख्यमंत्री देवेंद्र फडणवीस यांच्यापर्यंत पोहोचविण्याची विनंती भाजप नेत्यांना केली आहे. ‘अर्थ खाते आमच्या हक्काचे होते, त्यामुळे ते मागितले. यामध्ये कोणताही वाद नव्हता, तर आमच्या मनातील भावना होत्या,’ असे टिंगरे यांनी सांगितले. दरम्यान, एकीकडे महायुतीत पुणे शिक्षक मतदारसंघावरून भाजप आणि शिवसेनेत संघर्ष सुरू असतानाच, आता राष्ट्रवादी काँग्रेसनेही अर्थ खात्यावर दावा केला आहे.

२. मुंबईत उकाडा कायम तर काही ठिकाणी पावसाचा अंदाज   (TOP 15 )

मान्सून महाराष्ट्राच्या सर्व भागांतून मागे फिरला आहे. तर दुसरीकडे, ऑक्टोबर हीटमुळे मुंबई, पुणे आणि नाशिकसह संपूर्ण महाराष्ट्र प्रचंड तापला आहे. याचदरम्यान आता पुन्हा पावसाची शक्यता वर्तवण्यात आली आहे. आज मुंबई, ठाणे आणि रायगड येथे उष्णतेसह दमट हवामान जाणवेल. सिंधुदुर्ग, सातारा, सांगली, कोल्हापूर, सोलापूर आणि धाराशिव जिल्ह्यांत वादळी वाऱ्यांसह पावसाची शक्यता आहे. पुणे, रत्नागिरी, लातूर आणि नांदेड येथेही काही ठिकाणी विजांच्या कडकडाटासह पाऊस पडू शकतो. उर्वरित राज्यात उकाडा कायम राहण्याचा अंदाज आहे.

 

३. ९ दिवस ना बसणे, ना झोपणे; पांडे गावातील ३५० वर्षांची अनोखी परंपरा

सातारा जिल्ह्यातील वाई तालुक्यात असलेल्या पांडे गावात नवरात्र साजरी करण्याची परंपरा अनोखी आहे. येथे नऊ दिवस आणि नऊ रात्री उभे राहून उपवास करण्याची प्रथा जपली जाते. ‘उभ्याची नवरात्र’ म्हणून याला ओळखले जाते. पांडे गावात तब्बल साडेतीनशे वर्षांपासून ‘उभ्या नवरात्र’ची परंपरा सुरू असल्याचे सांगितले जाते. या परंपरेनुसार, गावातील प्रत्येक घरातून किमान एक व्यक्ती नवरात्रीचा उपवास करते. उपवास करणाऱ्या व्यक्तीला नऊ दिवस जमिनीवर बसणे किंवा झोपणे टाळावे लागते. विश्रांतीची गरज भासल्यास मंदिरात तयार केलेल्या झोपाळ्यावर एका पायाचा आधार खाली ठेवून आडवे राहण्याची पद्धत असल्याचे सांगितले जाते.

४. रामदास आठवलेंकडून आडगाव सरक येथे दुष्काळी शेतीची पाहणी

पावसाने पाठ फिरवल्याने शेतातील उभी पिकं करपली असून, शेतकऱ्यांवर आर्थिक संकट ओढवलंय. छत्रपती संभाजीनगर तालुक्यातील आडगाव सरक येथे केंद्रीय सामाजिक न्याय व अधिकारिता राज्यमंत्री रामदास आठवले यांनी दुष्काळी शेतीची पाहणी करत शेतकऱ्यांच्या व्यथा जाणून घेतल्यात. यावेळी त्यांनी कपाशी, बाजरी आणि मका या पिकांच्या नुकसानीची पाहणी केली. पेरणी, बियाणं, औषधं आणि मशागतीवर खर्च करूनही पावसाअभावी पिकांची वाढ खुंटली आहे. पूर्वी कपाशीच्या उत्पादनातून एकरी सुमारे ८० हजार रुपयांचं उत्पन्न मिळत होतं; मात्र यंदा एकरी ५० हजार रुपयांहून अधिक खर्च होऊनही उत्पादनाची आशा धूसर झाली आहे.

५. मालेगावच्या नराधमाला अखेर फाशीची शिक्षा 

गेल्या वर्षी १६ नोव्हेंबरला नाशिकच्या मालेगाव तालुक्यातील डोंगराळे गावातून साडेचार वर्षांच्या चिमुरडीचे अपहरण करण्यात आले होते. त्यानंतर तिच्यावर लैंगिक अत्याचार करून, तिची हत्या करण्यात आली होती. संपूर्ण राज्याचे लक्ष लागून असलेल्या या प्रकरणातील आरोपीला फाशीची शिक्षा सुनावण्यात आली आहे. अपर जिल्हा सत्र न्यायालयातील जलदगती न्यायालयाचे न्यायाधीश के. जी. पालदेवार यांनी २४ वर्षीय आरोपी शेखर उर्फ विजय संजय खैरनार याला १६ ऑक्टोबर रोजी फाशीची शिक्षा सुनावली. तसेच दोन वेगवेगळ्या गुन्ह्यांत प्रत्येकी सात वर्षांची अतिरिक्त शिक्षा व दोन्ही गुन्ह्यांत प्रत्येकी दोन हजार रुपये दंडाची शिक्षा सुनावली आहे.

६. तिरंगा, संविधान आणि लोकशाहीच्या सन्मानासाठी नाशिकमध्ये प्रदर्शन

सीजेपी नाशिकमध्ये राष्ट्रध्वज अर्थात तिरंग्याच्या सन्मानार्थ प्रदर्शनाचे आयोजन करणार आहे. लोकशाही, भारतीय संविधान आणि राष्ट्रध्वजाबद्दल आदराची भावना वाढवणे हा या उपक्रमाचा उद्देश आहे. या प्रदर्शनात सहभागी होण्यासाठी पक्षाने समविचारी संघटना, राजकीय पक्ष, विद्यार्थी व युवा संघटना तसेच घटनात्मक मूल्यांवर विश्वास ठेवणाऱ्या नागरिकांना आवाहन केले आहे. तिरंग्याचा आदर करा, संविधानाचा आदर करा आणि लोकशाहीचा आदर करा! हा संदेश या प्रदर्शनाच्या माध्यमातून दिला जाणार आहे.

७. सांगली जिल्हा बँकेची निवडणूक जिंकण्याचा पडळकरांनी व्यक्त केला विश्वास

सांगली जिल्हा मध्यवर्ती बँक निवडणूक प्रकरणी गोपीचंद पडळकर यांचा अर्ज सर्वोच्च न्यायालयाकडून वैध ठरवण्यात आला आहे. काँग्रेसचे माजी आमदार विक्रम सावंत यांनी जिल्हा बँकेतील गोपीचंद पडळकर यांच्या उमेदवारीवर आक्षेप घेतला होता, ज्यामध्ये उच्च न्यायालयाच्या कोल्हापूर खंडपीठाने पडळकरांचा उमेदवारी अर्ज अवैध ठरवला होता, त्यानंतर पडळकरांनी सर्वोच्च न्यायालयामध्ये धाव घेतली होती. ज्यावर सर्वोच्च न्यायालयाने पडळकरांना दिलासा देत अर्ज वैध ठरवला आहे. सर्वोच्च न्यायालयाच्या निर्णयानंतर आता जिल्हा बँकेची निवडणूक ताकतीने लढू आणि जिंकू असा विश्वास पडळकर यांनी व्यक्त केला आहे.

८. “सरकार पाडण्यामध्ये यांना इंटरेस्ट”; दिल्ली आंदोलनावर निलेश राणेंचा हल्लाबोल

दिल्लीतील Gen-Z आंदोलनावरून भाजप नेते निलेश राणे यांनी आंदोलनकर्त्यांवर जोरदार निशाणा साधला आहे. “आंदोलन करण्यास कोणाचाच विरोध नाही, मात्र या आंदोलनाच्या नावाखाली देशाला घातक ठरणाऱ्या घटकांना एकत्र आणण्याचे काम सुरू आहे,” असा आरोप त्यांनी केला. “ज्यांना भारताची अवस्था नेपाळ किंवा बांगलादेशसारखी करायची आहे, त्यांचा मूळ हेतू सोशल मीडियावरील रील्समधून उघडा पडत आहे. या आंदोलनात एज्युकेशन सिस्टमबाबत कोणीही बोलत नसून, केवळ रस्ते अडवणे आणि लोकांना सरकारविरोधात भडकवणे हाच यांचा मुख्य उद्देश आहे. त्यांना अमेरिका किंवा चीन या देशातून फंडिंग मिळत आहे,” असा दावाही निलेश राणे यांनी केला आहे.

९. ‘नाना पाटेकर’ की ‘कॅप्टन मच्छार’ पुलाला कोणाचे नाव मिळणार?

ठाकरे गट आणि भाजप आमनेसामने

पूर्व आणि पश्चिम उपनगरांना जोडणारा विद्याविहार रेल्वे स्थानकावरील नवीन उड्डाणपूल वाहतुकीसाठी तयार झाला आहे. मात्र, पुलाचे लोकार्पण होण्यापूर्वीच त्याच्या नामकरणावरून उद्धव ठाकरे गट आणि भाजप यांच्यात राजकीय वाद पेटला आहे. उबाठा पक्षाच्या स्थानिक पदाधिकाऱ्यांनी शुक्रवारी सकाळी पुलावर पद्मश्री नाना पाटेकर यांच्या नावाचा फलक अचानक झळकावला. दुसरीकडे, विमान प्रवाशांचे जीव वाचवणारे कॅप्टन स्मित मच्छार यांचे नाव या पुलाला द्यावे, अशी आक्रमक मागणी भाजपचे आमदार पराग शहा यांनी यापूर्वीच महापालिकेकडे केली आहे. या वादावर प्रतिक्रिया देताना, “नामकरणाचे राजकारण कोणीही करू नये, याबाबत मुख्यमंत्री आणि आपण एकत्र बसून निर्णय घेऊ,” असे महापौर रितू तावडे यांनी स्पष्ट केले आहे.

१०. भाजपचे ज्येष्ठ नेते लालकृष्ण अडवाणींची तब्येत खालवली

भाजपचे ज्येष्ठ नेते आणि माजी उपपंतप्रधान लालकृष्ण अडवाणी यांची तब्येत खालवल्याने त्यांना दिल्लीतील अपोलो रुग्णालयात दाखल करण्यात आले आहे. ९८ वर्षीय अडवाणी यांना छातीत संसर्ग होत असल्यानं काल संध्याकाळी साडेसातच्या सुमारास रुग्णालयात आणण्यात आले. सध्या अडवाणी यांची प्रकृती स्थिर असल्याचं डॉक्टरांनी सांगितलं आहे. सध्या त्यांच्यावर फुफ्फुसविषयक विभागात (पल्मोनरी डिपार्टमेंट) उपचार सुरू आहेत. अलीकडेच ७ ऑक्टोबर रोजी पंतप्रधान नरेंद्र मोदी यांनी ज्येष्ठ नेते अडवाणी यांची नवी दिल्ली येथील निवासस्थानी भेट घेतली होती. त्यावेळी त्यांनी सरकारनं २५ वर्षे पूर्ण केल्यानिमित्त अडवाणींचे आशीर्वाद घेतले होते.

११. पुढील वर्षी होणाऱ्या सात राज्यातील निवडणुकांआधी पेट्रोल-डिझेल महागणार?

देशातील महत्त्वाच्या सात राज्यांच्या विधानसभा निवडणुका पुढील वर्षी होणार आहेत. मात्र त्यापूर्वी सरकार पेट्रोल- डिझेलच्या दरात वाढ करू शकते, असा दावा ‘ऑक्सफर्ड इकॉनॉमिक्स’च्या एका अहवालात करण्यात आला आहे. उत्तर प्रदेश, पंजाबसह प्रमुख ७ राज्यांमध्ये मार्च ते मे दरम्यान मतदान होणार आहे. त्याआधी आचारसंहिता लागू शकते. त्यामुळे सरकारसाठी हाच दरवाढीचा शेवटचा व्यवहार्य काळ असू शकतो, असे या अहवालात म्हटले आहे. मात्र, केंद्र सरकार किंवा तेल कंपन्यांनी यावर अद्याप कोणतीही प्रतिक्रिया दिलेली नाही.

१२. एलॉन मस्क यांच्या इशाऱ्यावर सीजेपीचे आंदोलन होत असल्याचा भाजप नेत्याचा दावा

सीजेपीच्या लहरा दो तिरंगा आंदोलनावर उत्तर प्रदेशच्या कैसरगंजचे माजी खासदार भाजप नेते बृजभूषण शरण सिंह यांनी टीका केली आहे. हे आंदोलन अमेरिकेतली उद्योजक एलॉन मस्कच्या इशाऱ्यावर होत असल्याचा दावा केला. सुप्रीम कोर्टाला धमकावण्यासाठी मोर्चा काढला गेला, असं देशात कधी झालं नव्हतं. आपल्या देशाविरोधात मोठं षडयंत्र आहे. आता देशाची तुलना बांगलादेश आणि पाकिस्तानसोबत होतं आहे. विदेशी उद्योजकांना त्यांच्या अटींवर भारतात व्यवसाय करायचा आहे, ते लोक या आंदोलनाला बळ देतोयत असा आरोप देखील भाजपच्या बृजभूषण शरण सिंह यांनी केला.

१३. ‘पाकिस्तानी मुलींपासून दूर राहा’ चीन सरकारचा इशारा

चीन सरकारने आपल्या नागरिकांना पाकिस्तान किंवा इतर कोणत्याही परदेशी देशांतील महिलांशी विवाह करण्यापासून सावध राहण्याचा अधिकृत इशारा जारी केला आहे. चीनच्या मते, अशा प्रकारच्या विवाहांमध्ये कोणताही भावनिक आधार नसून केवळ व्यावसायिक व्यवहार असतो. यामुळे चिनी नागरिकांची मोठ्या प्रमाणावर आर्थिक फसवणूक होत असून ते गंभीर कायदेशीर अडचणींत सापडत आहेत. एका रिपोर्टनुसार, चिनी सरकारच्या आदेशानंतर आंतरराष्ट्रीय विवाहाबाबत प्रांत स्तरावर हा इशारा देण्यात आला आहे. त्याचाच एक भाग म्हणून चीनमधील शिंटियन काऊंटीच्या स्थानिक पोलीस प्रशासनाने हा इशारा दिला आहे.

१४. भारत-विंडीजचा आज रंगणार निर्णायक पाचवा ट्वेन्टी-२० सामना

भारत आणि वेस्ट इंडिज संघांतील फलंदाजांनी सध्या सुरू असलेल्या ट्वेन्टी-२० मालिकेत वर्चस्व गाजवले असून चार सामन्यांनंतर मालिका २-२ अशी बरोबरीत आहे. या मालिकेतील निर्णायक पाचवा ट्वेन्टी-२० सामना आज, शनिवारी बंगळूरुच्या एम. चिन्नास्वामी स्टेडियमवर रंगणार आहे. आतापर्यंत चार सामन्यांत मिळून दोन्ही संघांनी अवघ्या ९१८ चेंडूंमध्ये ९८ षटकार ठोकले आहे. विंडीजचा कर्णधार शे होप आणि आक्रमक फलंदाज शेर्फेन रुदरफोर्ड यांनी भारतीय गोलंदाजीवर सातत्याने हल्ला चढवला आहे. त्यानंतर आता गेल्या दोन सामन्यांत संघाबाहेर राहिलेल्या चायनामन फिरकीपटू कुलदीप यादवचे पुनरागमन होऊ शकते.

१५. ऑस्करसाठी गेलेला ‘गोंधळ’ ६ भाषांमध्ये होणार रिलीज

फिल्म फेडरेशन ऑफ इंडियाने ‘गोंधळ’ची ऑस्करसाठी अधिकृत एंट्री म्हणून निवड केली. तेव्हापासून राष्ट्रीय स्तरावर गोंधळची चर्चा होत आहे. आता हा चित्रपट १३ नोव्हेंबर रोजी देशभरातील चित्रपटगृहांमध्ये रिलीज होणार आहे. ‘गोंधळ’ हा चित्रपट मराठीसह हिंदी, तमिळ, तेलगू, मल्याळम आणि कन्नड भाषांमध्ये रिलीज होणार आहे. महाराष्ट्राच्या लोककथा आणि परंपरांवर आधारित असलेला हा चित्रपट ग्रामीण जीवन, एका बिघडलेल्या नात्याची गोष्ट आणि एका रात्रीत समोर येणारी रहस्य यावर आधारित आहे. संतोष डावखर या चित्रपटाचे लेखन, दिग्दर्शन आणि निर्मिती केली आहे.

हेही वाचा: 

Phaltan: पाणी साठवण योजनेची प्रलंबित कामे पूर्ण करा; आमदार सचिन पाटील