महायुतीत चौथा पक्ष येणार?
पवारांच्या एन्ट्रीनं शिंदेंचं टेन्शन वाढणार?

Top 10 News : राज्यात संसदेच्या पावसाळी अधिवेशनापूर्वी राजकीय हालचालींना वेग आला असून शरद पवारांची राष्ट्रवादी एनडीएमध्ये सहभागी होण्याची चर्चा रंगली आहे. या संभाव्य घडामोडींमुळे महायुतीतील राजकीय समीकरणे बदलू शकतात, अशी चर्चा सुरू आहे. पवार एनडीएत आल्यास महायुतीचे संख्याबळ वाढेल आणि एकनाथ शिंदे यांचे राजकीय महत्त्व कमी होण्याची शक्यता व्यक्त केली जात आहे. तसेच जागावाटप, मंत्रीपदे आणि सत्ता समीकरणांवरही त्याचा परिणाम होऊ शकतो. मात्र, या चर्चांबाबत कोणतीही अधिकृत घोषणा झालेली नसून अंतिम निर्णय केंद्रीय नेतृत्वाकडून होणार असल्याचे मानले जात आहे.

तुकाराम मुंढे यांचा सिया गोयलच्या वडिलांना दणका;
पुण्यातील दुकानावर FDA ची मोठी कारवाई

केतन अग्रवाल हत्या प्रकरणातील मुख्य आरोपी सिया गोयलच्या वडिलांच्या पुण्यातील मार्केटयार्ड परिसरातील मसाल्याच्या दुकानावर अन्न व औषध प्रशासनाने (FDA) कारवाई केली आहे. तपासणीदरम्यान हळद पावडर, तीळ आणि सोयाबीन चंकचे नमुने जप्त करण्यात आले. लेबलमधील त्रुटी आणि भेसळीच्या संशयावरून सुमारे ८ लाख रुपये किमतीचा ४ हजार किलो माल जप्त करण्यात आला असून दुकानही सील करण्यात आले आहे. काही दिवसांपूर्वी लोहगड किल्ल्यावर केतन अग्रवालची हत्या झाल्याप्रकरणी सिया गोयल आणि तिच्या प्रियकराला अटक करण्यात आली होती.

राज्यभरात विश्रांती घेतलेल्या पावसाला पुन्हा सुरुवात
काही जिल्ह्याना यलो अलर्ट जारी

राज्यात गेल्या काही दिवसांपासून विश्रांती घेतलेल्या मान्सूनने पुन्हा हजेरी लावण्यास सुरुवात केली आहे. आज पुणे, सातारा, घाटमाथा, सांगली, सोलापूर आणि धाराशिव जिल्ह्यांना यलो अलर्ट देण्यात आला असून, 20 जुलैनंतर संपूर्ण राज्यात मान्सून पुन्हा सक्रिय होण्याचा अंदाज आहे. रायगड, हिंगोली, बीड आणि परभणीसह अनेक भागांत पावसाने हजेरी लावून नागरिकांना दिलासा दिला आहे. मात्र, अनेक ठिकाणी पाऊस अद्याप अपुरा असल्याने शेतकरी दमदार पावसाच्या प्रतीक्षेत असून दुबार पेरणीचे संकट कायम आहे.

मराठवाड्यात पिकांनी माना टाकल्या ;
जगण्याचे प्रश्नही ऐरणीवर

गेल्या वर्षी अतिवृष्टीने उद्ध्वस्त झालेल्या मराठवाड्यात यंदा पावसाअभावी शेतकरी नव्या संकटात सापडला आहे. लातूर, धाराशिव, बीड, नांदेडसह अनेक जिल्ह्यांत पिके कोमेजू लागली असून दुबार पेरणीचे संकट उभे ठाकले आहे. गेल्या वर्षी पूर आणि अतिवृष्टीमुळे मोठे नुकसान सहन केलेल्या शेतकऱ्यांना अद्याप पुरेशी मदत मिळालेली नसतानाच यंदा दुष्काळसदृश परिस्थितीची चिंता वाढली आहे. हवामान विभागाकडून तातडीने दमदार पावसाची शक्यता नसल्याने बळीराजा चिंतेत असून, मराठवाड्यात हवामान बदलाचा प्रश्न पुन्हा ऐरणीवर आला आहे.

ZP ची बनावट कागदपत्रं बनवून उभारली इमारत;
शिंदे गटाच्या दोन नेत्यांना अटक Top 10 News : 

डोंबिवलीतील सागाव परिसरातील कथित बेकायदा इमारतीतील सदनिका विक्रीत नागरिकांची फसवणूक केल्याप्रकरणी शिंदे सेनेचे कल्याण ग्रामीण उपतालुकाप्रमुख रामचंद्र माने, महाराष्ट्र जनरल मजदूर संघटनेचे अध्यक्ष लक्ष्मण मिसाळ यांच्यासह चौघांना मानपाडा पोलिसांनी अटक केली आहे. फिर्यादीच्या तक्रारीनुसार, बनावट बांधकाम परवानगी आणि खोट्या कागदपत्रांच्या आधारे सदनिका विकून लाखो रुपयांची फसवणूक करण्यात आली. गुन्हा दाखल झाल्यानंतर आरोपी फरार होते. या कारवाईमुळे डोंबिवलीतील राजकीय आणि बांधकाम क्षेत्रात मोठी खळबळ उडाली असून, प्रकरणाचा पुढील तपास सुरू आहे.

EPFO ची मोठी खुशखबर!
PF वर 8.25% व्याज जमा

खासगी क्षेत्रातील नोकरदारांसाठी आनंदाची बातमी आहे. कर्मचारी भविष्य निर्वाह निधी संघटना (EPFO) आर्थिक वर्ष 2025-26 साठीचे 8.25 टक्के व्याज सदस्यांच्या पीएफ खात्यात जमा करण्याची प्रक्रिया सुरू करणार आहे. खात्यात व्याज जमा झाले आहे की नाही, हे सदस्य घरबसल्या सहज तपासू शकतात. यासाठी EPFO च्या Passbook Lite पोर्टलवर UAN द्वारे लॉग-इन करणे, 7738299899 वर UANसह SMS पाठवणे, UMANG ॲपचा वापर करणे किंवा 011-22901406 या क्रमांकावर मिस कॉल देणे, हे चार सोपे पर्याय उपलब्ध आहेत.

‘प्राण गेले तरी मागे हटणार नाही’;
उपोषणावर ठाम सोनम वांगचुक

नीट पेपरफुटी प्रकरणाविरोधात दिल्लीतील जंतर-मंतरवर सुरू असलेल्या आंदोलनात सहभागी झालेले शिक्षणतज्ज्ञ आणि पर्यावरण कार्यकर्ते सोनम वांगचुक यांच्या आमरण उपोषणाचा आज १९वा दिवस आहे. उपोषणादरम्यान त्यांचे साडेआठ किलो वजन घटले असून प्रकृती खालावली असली, तरी त्यांनी उपोषण मागे घेण्यास स्पष्ट नकार दिला आहे. “माझी तब्येत बिघडली आहे, पण मी मरणार नाही. माझ्याऐवजी २० जुलै रोजी होणाऱ्या ‘चलो संसद’ आंदोलनात सहभागी व्हा,” असे आवाहन त्यांनी देशवासीयांना केले. केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी हे आंदोलन सुरू आहे.

अमेरिकेचे इराणवर 7 तास बॉम्ब हल्ले;
होर्मुझ सामुद्रधुनीत पुन्हा युद्धाचा भडका

अमेरिका-इराण संघर्षामुळे आखातातील तणाव आणखी वाढला आहे. अमेरिकेने इराणमधील लष्करी ठिकाणांवर नव्याने हवाई हल्ले केल्यानंतर इराणने बहरीन, कुवैत आणि जॉर्डनमधील अमेरिकी तळांवर क्षेपणास्त्र व ड्रोन हल्ले केल्याचा दावा केला आहे. संघर्षादरम्यान होर्मुझ सामुद्रधुनीत व्यापारी जहाजांवर झालेल्या हल्ल्यात एका भारतीय खलाशाचा मृत्यू झाला, तर अनेक जण जखमी झाले. या घटनेनंतर भारताने इराणच्या राजनैतिक अधिकाऱ्यांना बोलावून तीव्र निषेध नोंदवला आहे. होर्मुझमधील वाढत्या तणावामुळे भारतीय खलाशी आणि व्यापारी जहाजांच्या सुरक्षेबाबत चिंता वाढली आहे.

मेस्सीने पुन्हा एकदा करुन दाखवलं!
अर्जेंटिना सलग दुसऱ्यांदा फायनलमध्ये

गतविजेत्या अर्जेंटिनाने फिफा वर्ल्डकप २०२६च्या दुसऱ्या उपांत्य फेरीत इंग्लंडचा २-१ असा नाट्यमय पराभव करत सलग दुसऱ्यांदा अंतिम फेरीत प्रवेश केला. इंग्लंडने अँथनी गॉर्डनच्या ५५व्या मिनिटातील गोलमुळे आघाडी घेतली होती. मात्र, अखेरच्या क्षणी अर्जेंटिनाने दमदार पुनरागमन करत ८५व्या मिनिटाला फर्नेंडाज आणि अतिरिक्त वेळेत ९२व्या मिनिटाला मार्टिनेजने गोल करत सामना फिरवला. लिओनेल मेस्सीला गोल करता आला नाही, तरी अर्जेंटिनाने ऐतिहासिक विजय मिळवत अंतिम फेरीत स्पेनशी भिडण्याचे तिकीट मिळवले.

‘द कपिल शर्मा शो’ स्रिप्टेड शो
किकू शारदानं दिली माहिती Top 10 News : 

‘द कपिल शर्मा शो’ स्क्रिप्टेड आहे की नाही, याबाबत अभिनेता आणि विनोदी कलाकार किकू शारदाने मोठा खुलासा केला आहे. त्याच्या मते, शोचा सुमारे 70 टक्के भाग आधीच लिहिलेल्या स्क्रिप्टनुसार सादर केला जातो, तर उर्वरित 30 टक्के भाग उत्स्फूर्त संवाद आणि परिस्थितीनुसार घडतो. पाहुण्यांना विनोद किंवा पंचलाईन्सची पूर्वकल्पना दिली जात नसल्याने त्यांच्या नैसर्गिक प्रतिक्रिया मिळतात. एखादी चर्चा अनपेक्षित वळण घेतल्यास कपिल शर्मा आपल्या हजरजबाबी शैलीत ती सहज सांभाळतो, असेही किकूने सांगितले.