ठाकरेंच्या फुटलेल्या सहा खासदारांची खासदारकी वाचली,
शिंदेंच्या शिवसेनेत विलिनीकरणाला मंजुरी

Top 10 News : लोकसभा सचिवालयाने उद्धव ठाकरे यांच्या शिवसेनेतून फुटून एकनाथ शिंदे यांच्या शिवसेनेत गेलेल्या सहा खासदारांच्या विलिनीकरणाला अधिकृत मंजुरी दिली आहे. ओमराजे निंबाळकर, संजय दिना पाटील, संजय देशमुख, संजय जाधव, भाऊसाहेब वाकचौरे आणि नागेश पाटील आष्टीकर हे आता शिंदे गटाचे अधिकृत खासदार झाले आहेत. उपमुख्यमंत्री एकनाथ शिंदे यांनी या खासदारांना मतदारसंघाच्या विकासासाठी मोठा निधी देण्याचे संकेत दिले. या निर्णयामुळे उद्धव ठाकरे गटाला मोठा धक्का बसला असून लोकसभेत त्यांचे केवळ तीन खासदार उरले आहेत.

सुप्रिया सुळेंचा ‘व्हाईस रेस्ट’!
दोन आठवडे भाषण वा मुलाखत नाही

राष्ट्रवादी काँग्रेस (शरद पवार)च्या खासदार सुप्रिया सुळे यांना घशाला सूज आल्याने डॉक्टरांनी पुढील एक ते दोन आठवडे पूर्ण ‘व्हॉइस रेस्ट’ घेण्याचा सल्ला दिला आहे. त्यांनी सोशल मीडियावर ही माहिती देत, भाषणे, मुलाखती आणि दीर्घकाळ बोलणे टाळणार असल्याचे सांगितले. डॉ. मिलिंद कीर्तने यांच्या सल्ल्यानुसार त्या व्हॉइस थेरपीही घेणार आहेत. नुकतेच त्यांनी दिल्लीत सोनम वांगचुक यांच्या आंदोलनाला पाठिंबा देत हा मुद्दा संसदेत मांडण्याचे आश्वासन दिले होते. संसदेच्या पावसाळी अधिवेशनापूर्वी त्यांच्या प्रकृतीबाबतची ही महत्त्वाची अपडेट समोर आली आहे.

ज्येष्ठ समाजवादी नेते, माजी आमदार डॉ. कुमार सप्तर्षी यांचं निधन
पुण्यात सोमवारी होणार अंत्यसंस्कार

ज्येष्ठ समाजवादी नेते, पुरोगामी विचारवंत, ‘युवक क्रांती दल’ (युक्रांद)चे संस्थापक आणि महाराष्ट्र गांधी स्मारक निधीचे अध्यक्ष डॉ. कुमार सप्तर्षी यांचे रविवारी वयाच्या ८५व्या वर्षी निधन झाले. मधुमेहाच्या त्रासामुळे प्रकृती अस्वस्थ झाल्याने त्यांना पुण्यातील एरंडवणे येथील खासगी रुग्णालयात दाखल करण्यात आले होते. मात्र, उपचारापूर्वीच त्यांची प्राणज्योत मालवली. सामाजिक न्याय, लोकशाही मूल्ये आणि पुरोगामी विचारांसाठी त्यांनी आयुष्यभर कार्य केले. त्यांचे पार्थिव सोमवारी सकाळी १० ते १२ या वेळेत कोथरूड येथील गांधी भवनमध्ये अंत्यदर्शनासाठी ठेवण्यात येणार असून, त्यानंतर अंत्यसंस्कार होणार आहेत.

आज वादळी वाऱ्यासह तुफान पाऊस, २३ जिल्ह्यांना अलर्ट;
नागरिकांना सतर्कतेचा इशारा

राज्यात विश्रांती घेतलेल्या पावसाने पुन्हा जोरदार पुनरागमन केले असून आज अनेक भागांत मुसळधार पावसाचा इशारा देण्यात आला आहे. हवामान विभागाने राज्यातील २३ जिल्ह्यांसाठी पावसाचा अलर्ट जारी केला आहे. काही ठिकाणी वादळी वारे, विजांचा कडकडाट आणि जोरदार सरींची शक्यता वर्तवण्यात आली आहे. त्यामुळे नागरिकांनी आवश्यक तेवढेच घराबाहेर पडावे, नदी-नाले व पूरग्रस्त भागांपासून दूर राहावे आणि प्रशासनाच्या सूचनांचे पालन करावे, असे आवाहन करण्यात आले आहे. काही भागांत वाहतूक आणि जनजीवनावरही परिणाम होण्याची शक्यता व्यक्त करण्यात आली आहे.

हातावर लिहून मागितली लाच, पण डाव फसला!
भाजप नगराध्यक्षाला ACB ने रंगेहाथ पकडलं Top 10 News :

गोंदिया जिल्ह्यातील तिरोडा नगरपरिषदेचे भाजप नगराध्यक्ष अशोक असाटी आणि खासगी व्यक्ती कैलास वाघमारे यांच्याविरुद्ध लाचलुचपत प्रतिबंधक विभागाने गुन्हा दाखल केला आहे. निवडणुकीतील डेकोरेशन व केटरिंगच्या २५.२२ लाख रुपयांच्या बिलासाठी सुरुवातीला ३.२० लाख, तर नंतर १.२० लाख रुपयांची लाच मागितल्याचा आरोप आहे. तक्रारीनंतर एसीबीने पडताळणी करून सापळा रचला. कारवाईदरम्यान संशय आल्याने आरोपींनी रक्कम स्वीकारली नाही. मात्र, लाचेची मागणी सिद्ध झाल्याने भ्रष्टाचार प्रतिबंधक कायद्यान्वये गुन्हा दाखल करून पुढील तपास सुरू आहे.

‘सहनशक्तीची परीक्षा घेऊ नका’
अण्णा हजारेंनी मौन सोडलं

सामाजिक कार्यकर्ते अण्णा हजारे यांनी उपोषणकर्ते सोनम वांगचुक यांच्याबाबत केंद्र सरकारने मौन सोडून तातडीने संवाद साधावा, असे आवाहन केले आहे. वांगचुक २० दिवसांपासून उपोषणावर असून त्यांच्या संयमाची परीक्षा घेणे योग्य नसल्याचे हजारे म्हणाले. प्रकृती खालावल्याने दिल्ली पोलिसांनी त्यांना सफदरजंग रुग्णालयात दाखल केले असून ते शुद्धीवर असल्याची माहिती रुग्णालयाने दिली. वांगचुक यांनी नीट परीक्षेतील कथित अनियमिततेची चौकशी, एनटीएमध्ये सुधारणा आणि केंद्रीय शिक्षणमंत्री धर्मेंद्र प्रधान यांच्या राजीनाम्यासह विविध मागण्या केल्या आहेत.

“आवाज उठवणाऱ्यांना दडपण्याचा प्रयत्न अयोग्य”
सोनम वांगचुक प्रकरणी राहुल गांधींची पहिली प्रतिक्रिया

उपोषणकर्ते सोनम वांगचुक यांना प्रकृती खालावल्याने दिल्ली पोलिसांनी सफदरजंग रुग्णालयात दाखल केल्यानंतर काँग्रेस नेते राहुल गांधी यांनी केंद्र सरकारवर टीका केली आहे. शांततापूर्ण आंदोलनातून वांगचुक यांना हटवणे चुकीचे असल्याचे सांगत त्यांनी विद्यार्थ्यांच्या प्रश्नांकडे दुर्लक्ष होत असल्याचा आरोप केला. पेपरफुटी, शिक्षणाचा वाढता खर्च आणि विद्यार्थ्यांच्या आत्महत्यांसारख्या गंभीर मुद्द्यांवर सरकारने लक्ष द्यावे, असे त्यांनी म्हटले. दरम्यान, वांगचुक यांच्या प्रकृतीवर डॉक्टरांचे लक्ष असून रुग्णालय परिसरात कडेकोट सुरक्षा व्यवस्था तैनात करण्यात आली आहे.

‘होर्मुझ’च्या नियंत्रणावरून संघर्ष तीव्र;
अमेरिका-इराणचे एकमेकांवर हल्ले

होर्मुझ सामुद्रधुनीवरील नियंत्रणाच्या मुद्द्यावरून अमेरिका आणि इराण यांच्यातील संघर्ष अधिक तीव्र झाला आहे. दोन्ही देशांनी एकमेकांच्या लष्करी व पायाभूत सुविधांवर हल्ले केल्याचा दावा केला आहे. अमेरिकेने इराणमधील लष्करी तळ, रसद केंद्रे आणि शस्त्रसाठ्यांवर हवाई कारवाई केली, तर इराणने होर्मुझवरील नियंत्रणाचा दावा कायम ठेवला आहे. कुवेत, इराक, जॉर्डन आणि बहारीनमध्येही हवाई इशारे देण्यात आले. या संघर्षामुळे जागतिक तेलपुरवठा, जहाजवाहतूक आणि व्यापारावर मोठा परिणाम होण्याची शक्यता वाढली असून मध्यपूर्वेतील तणाव आणखी वाढला आहे.

लॉर्ड्स वनडेपूर्वी भारतीय संघात अचानक बदल!
‘या’ विदर्भाच्या खेळाडूची निवड

इंग्लंडविरुद्धच्या निर्णायक तिसऱ्या वनडेपूर्वी भारतीय संघात महत्त्वाचा बदल करण्यात आला आहे. दुखापतग्रस्त वॉशिंग्टन सुंदरच्या जागी विदर्भाचा अष्टपैलू खेळाडू **हर्ष दुबे** याची संघात निवड करण्यात आली आहे. कार्डिफ येथे झालेल्या दुसऱ्या वनडेदरम्यान सुंदरच्या उजव्या हॅमस्ट्रिंगला दुखापत झाली होती. २३ वर्षीय हर्ष दुबेने नुकतेच भारताकडून वनडे पदार्पण करत प्रभावी कामगिरी केली असून अफगाणिस्तानविरुद्ध दोन सामन्यांत चार विकेट्स घेतल्या होत्या. भारत-इंग्लंड मालिकेतील तिसरा आणि निर्णायक सामना रविवारी लॉर्ड्स मैदानावर रंगणार असून मालिका सध्या १-१ अशी बरोबरीत आहे.

मराठी सिनेसृष्टीचा मान उंचावला!
‘मु.पो. बोंबिलवाडी’ ठरला सर्वोत्कृष्ट मराठी चित्रपट Top 10 News :

72 व्या राष्ट्रीय चित्रपट पुरस्कारांची घोषणा करण्यात आली असून, ‘आर्टिकल 370’या चित्रपटाला सर्वोत्तम चित्रपटाचा मान मिळाला आहे. सर्वोत्कृष्ट अभिनेत्याचा पुरस्कार संयुक्तपणे कार्तिक आर्यन (‘चंदू चॅम्पियन’) आणि मामूट्टी (‘ब्रमायुगम’) यांना जाहीर झाला, तर*यामी गौतम हिला ‘आर्टिकल 370’साठी सर्वोत्कृष्ट अभिनेत्रीचा पुरस्कार मिळाला. मराठी चित्रपट ‘मु.पो. बोंबिलवाडी’ सर्वोत्कृष्ट मराठी चित्रपट ठरला. ‘घरत गणपती’तील ‘रंगा गंधा’ गाण्यासाठी अभय जोधपूरकर यांना सर्वोत्कृष्ट पार्श्वगायकाचा राष्ट्रीय पुरस्कार जाहीर झाला.