साखरेपाठोपाठ तांदूळही महागला;
महिन्याभरात भावात ११ टक्क्यांची वाढ 

Top 10 News :साखरेनंतर आता सर्वसामान्यांच्या ताटातील तांदळाचे भावही वाढले आहेत. मागील महिन्याभरात तांदळाच्या घाऊक भावात सुमारे ११ टक्क्यांची वाढ झाल्याने किरकोळ बाजारातही त्याचा परिणाम दिसू लागला आहे. वाढती मागणी, काही राज्यांमधून घटलेली आवक आणि निर्यातीचा परिणाम यामुळे भाव वाढल्याचे व्यापाऱ्यांचे म्हणणे आहे. दिवाळीपर्यंत मागणी आणखी वाढण्याची शक्यता असल्याने तांदळाचे दर वाढण्याची भीती व्यक्त केली जात आहे. आधीच महागाईने त्रस्त असलेल्या सर्वसामान्यांना ऐन सणासुदीत आणखी आर्थिक झळ बसण्याची शक्यता आहे.

चाकणच्या खड्ड्यांवर सरकारची मलमपट्टी;
उद्योजकांच्या समस्या सोडवण्यासाठी शिंदेंचा पुढाकार

चाकण-शिक्रापूर औद्योगिक क्षेत्रातील खड्डे, वाहतूक कोंडी आणि मूलभूत सुविधांच्या प्रश्नांवर उपमुख्यमंत्री एकनाथ शिंदे यांनी शनिवारी चाकणला भेट देत सुरू असलेल्या कामांचा आढावा घेतला. एम-60 हार्डनरचा वापर करून खड्डे बुजवण्याच्या कामाचीही त्यांनी पाहणी केली. उद्योजकांसोबत संवाद साधताना रस्ते दुरुस्ती, विशेष तक्रार कक्ष, अंतर्गत रस्त्यांचे काम आणि मेट्रो मार्गांच्या विकास आराखड्यासह विविध उपाययोजनांची घोषणा करण्यात आली. समस्यांमुळे 20 कंपन्यांनी स्थलांतराचा इशारा दिला होता. मात्र सरकारच्या हस्तक्षेपानंतर उद्योग बाहेर नेण्याबाबत उद्योजकांचे मतपरिवर्तन झाल्याचा दावा शिंदे यांनी केला.

अमरावती जिल्हा स्त्री रुग्णालयात भीषण आग;
तीन नवजात बालकांचा मृत्यू

अमरावतीच्या जिल्हा स्त्री रुग्णालयातील नवजात शिशु अतिदक्षता विभागात सोमवारी पहाटे भीषण आग लागून तीन नवजात बालकांचा धुरामुळे गुदमरून मृत्यू झाला. प्राथमिक माहितीनुसार, पहाटे साडेतीनच्या सुमारास व्हेंटिलेटरमध्ये स्फोट झाल्याने आग लागली. कक्षात 12 बालके उपचार घेत होती. डॉक्टर, नर्सेस आणि कर्मचाऱ्यांनी बालकांना बाहेर काढून बचावकार्य केले. सहा अर्भकांवर सुपर स्पेशालिटी रुग्णालयात उपचार सुरू असून काही बालकांना भाजल्याची माहिती आहे. आग कशामुळे लागली आणि अग्निशामक यंत्रणा कार्यान्वित का झाली नाही, याची चौकशी केली जात आहे. या दुर्घटनेने रुग्णालयाच्या सुरक्षाव्यवस्थेवर गंभीर प्रश्न उपस्थित झाले आहेत.

नागपूरमध्ये क्लोरिन गॅस गळती;
40 हून अधिक नागरिकांना त्रास

नागपूरच्या गोधनी परिसरातील महाराष्ट्र जीवन प्राधिकरणाच्या प्लांटमध्ये रविवारी मध्यरात्री क्लोरिन गॅसची गळती झाल्याने खळबळ उडाली. गॅस परिसरात पसरल्याने 40 हून अधिक स्थानिकांना मळमळ आणि उलट्यांचा त्रास झाला, तर 15 पेक्षा जास्त जणांना श्वास घेण्यास त्रास होत असल्याने रुग्णालयात दाखल करण्यात आले आहे. खबरदारी म्हणून प्लांटच्या 200 मीटर परिसरातील नागरिकांना सुरक्षितस्थळी हलवण्यात आले. घटनास्थळी NDRF आणि महानगरपालिकेच्या अग्निशमन विभागाकडून बचावकार्य सुरू असून परिस्थिती नियंत्रणात आणण्याचे प्रयत्न सुरू आहेत. गॅसगळतीचे नेमके कारण अद्याप स्पष्ट झालेले नाही.

महाराष्ट्रात पुन्हा पावसाचा जोर वाढणार;
पुणे-सातारा घाटमाथ्यावर जोरदार सरींचा अंदाज Top 10 News :

बंगालच्या उपसागरात निर्माण झालेल्या कमी दाबाच्या क्षेत्रामुळे महाराष्ट्रात पावसासाठी पोषक वातावरण तयार झाले आहे. आज पुणे आणि सातारा जिल्ह्यांच्या घाटमाथ्यावर जोरदार पावसाच्या सरींची शक्यता हवामान विभागाने वर्तविली आहे. पुणे शहरासह परिसरातही ढगाळ वातावरण आणि पावसाचा अंदाज आहे. दरम्यान, परभणी, हिंगोली, नांदेड तसेच भंडारा, गोंदिया, चंद्रपूर आणि गडचिरोली जिल्ह्यांत विजांसह वादळी पावसाची शक्यता असल्याने येलो अलर्ट जारी करण्यात आला आहे. धुळे, जळगाव आणि नाशिकमध्येही विजांसह पावसाचा अंदाज व्यक्त करण्यात आला आहे.

दिल्लीमध्ये CNG सिलेंडरचा स्फोट;
दोन आमदारांसह 6 जण जखमी

राजधानी दिल्लीतील आयटीओ परिसरात रविवारी रात्री धावत्या स्विफ्ट कारमधील सीएनजी सिलेंडरचा स्फोट झाल्यानंतर भीषण अपघात घडला. स्फोटामुळे चालकाचे नियंत्रण सुटल्याने कारने डिव्हायडरला धडक देत समोरून येणाऱ्या इनोव्हा एसयूव्हीला जोरदार धडक दिली. इनोव्हा गाडीत किराडीचे आमदार अनिल झा आणि कर्नाटकचे आमदार अभय पटेल प्रवास करत होते. दोन्ही आमदारांसह स्विफ्टमधील चार जण असे एकूण सहा जण जखमी झाले. सर्वांना एलएनजेपी रुग्णालयात दाखल करण्यात आले असून त्यांची प्रकृती स्थिर आहे. स्फोटाचे नेमके कारण शोधण्यासाठी पोलीस तपास सुरू आहे.

केरळची काझिया लिझ मेजो ठरली ‘मिस युनिव्हर्स इंडिया 2026’;
आता जागतिक मंचावर भारताचे प्रतिनिधित्व

केरळच्या 19 वर्षीय काझिया लिझ मेजो हिने ‘मिस युनिव्हर्स इंडिया 2026’चा प्रतिष्ठेचा मुकुट पटकावला आहे. जयपूरमध्ये झालेल्या भव्य अंतिम सोहळ्यात गतविजेती मानिका विश्वकर्मा हिने तिला मुकुट परिधान केला. तमिळनाडूची वैष्णवी गणेश आणि गुजरातची अनुश्री सातवळेकर यांनी अनुक्रमे इतर अव्वल स्थान मिळवले. स्पर्धेत देशभरातील 52 स्पर्धक सहभागी झाले होते. अंतिम फेरीत महाराष्ट्राची तेजस्विनी श्रीवास्तव हिचाही टॉप-5 मध्ये समावेश होता. काझिया आता नोव्हेंबरमध्ये प्युर्टो रिको येथे होणाऱ्या 75 व्या ‘मिस युनिव्हर्स’ स्पर्धेत भारताचे प्रतिनिधित्व करणार आहे.

गिनीमध्ये भीषण दुर्घटना;
कचऱ्याचा डोंगर झोपड्यांवर कोसळला

गिनीची राजधानी कोनाक्रीमध्ये मुसळधार पावसामुळे कचऱ्याचा डोंगर कोसळून भीषण दुर्घटना घडली. रविवारी पहाटे सुमारे 3 वाजता झालेल्या या दुर्घटनेत किमान 22 जणांचा मृत्यू झाला असून अनेकजण जखमी झाले आहेत. पावसामुळे कचराभूमीतील ढिगारा आणि चिखल जवळील झोपड्यांवर कोसळल्याने अनेक घरे गाडली गेली. सहा जखमींची प्रकृती गंभीर असल्याची माहिती आहे. घटनास्थळी बचावकार्य सुरू असून ढिगाऱ्याखाली अडकलेल्यांचा शोध घेतला जात आहे. प्रशासनाने परिसर रिकामा करण्याच्या सूचना यापूर्वी दिल्या होत्या, मात्र काही नागरिक तिथेच राहत होते.

कोलंबो कसोटीत यशस्वी-असिथा भिडले;
मैदानावर राडा, ICC कारवाईची शक्यता

भारत आणि श्रीलंका यांच्यातील दुसऱ्या कसोटी सामन्याच्या पहिल्या दिवशी यशस्वी जैस्वाल आणि श्रीलंकेचा वेगवान गोलंदाज असिथा फर्नांडो यांच्यात जोरदार वाद झाला. 17व्या षटकात फर्नांडोने जैस्वालला 45 धावांवर बाद केल्यानंतर दोघांमध्ये शाब्दिक चकमक झाली. परिस्थिती इतकी तापली की दोन्ही खेळाडू एकमेकांच्या अगदी जवळ आले आणि शारीरिक संपर्कही झाला. इतर खेळाडूंनी हस्तक्षेप करत दोघांना दूर केले. या घटनेचा सामना अधिकाऱ्यांकडून आढावा घेतला जाण्याची शक्यता असून, जैस्वालवर शिस्तभंगाची कारवाई होणार का याकडे क्रिकेटविश्वाचे लक्ष लागले आहे.

यशच्या ‘टॉक्सिक’ प्री-रिलीज इव्हेंटमध्ये मोठी दुर्घटना;
साउंड सिस्टीम कोसळून दोघे जखमी Top 10 News :

साऊथ सुपरस्टार यशच्या बहुप्रतीक्षित ‘टॉक्सिक’ चित्रपटाच्या प्री-रिलीज कार्यक्रमादरम्यान हैदराबादमध्ये मोठी दुर्घटना घडली. मल्ला रेड्डी युनिव्हर्सिटीमध्ये आयोजित कार्यक्रमात साउंड सिस्टीमचा मोठा सेटअप अचानक कोसळल्याने दोन जण जखमी झाले. त्यांना तातडीने रुग्णालयात दाखल करण्यात आले असून प्रकृती स्थिर असल्याची माहिती आहे. यश मंचावर भाषण करत असताना हा प्रकार घडला. दुर्घटनेनंतर त्याने भाषण थांबवून जखमींची माहिती घेतली. परिस्थिती नियंत्रणात आल्यानंतर कार्यक्रम पुन्हा सुरू करण्यात आला. गीतू मोहनदास दिग्दर्शित ‘टॉक्सिक’ २६ ऑगस्टला प्रदर्शित होणार आहे.