आम्हीही जिद्दी, आता माघार नाही,

रोहित पवारांचं विधान
Top 10 News : शेतकऱ्यांच्या कर्जमाफीसाठी राष्ट्रवादी शरद पवार गटाचे आमदार रोहित पवार यांनी कालपासून पंढरपुरात अन्नत्याग आंदोलन सुरु केलंय. रोहित पवारांच्या अन्नत्याग आंदोलनाचा आज दुसरा दिवस आहे. दरम्यान, आम्हीही जिद्दी आहोत. जोपर्यंत कर्जमाफीमधील जाचकाठी निघत नाही आणि त्याचा फायदा सर्व शेतकऱ्यांना मिळत नाही, तोपर्यंत अन्नत्याग आंदोलन मागे घेणार नाही, असा इशारा रोहित पवार यांनी दिलाय. त्यासोबतच अतिरिक्त पोलीस अधीक्षकांच्या पुढाकाराने रोहित पवार यांची कृषिमंत्री आणि सहकार मंत्र्यांशी सविस्तर चर्चा झालीय. राज्याच्या कॅबिनेट मंत्र्यांनी 2019 च्या कर्जमाफीची जाचक अट मागे घेण्याबाबत सरकार सकारात्मक असल्याचे माध्यमांसमोर जाहीर करावे, तरच आम्ही हे अन्नत्याग आंदोलन स्थगित करण्याचा विचार करू, अशी भूमिका रोहित पवारांनी घेतलीय.

एसटी प्रवाशांसाठी महत्त्वाची बातमी!

‘या’ नागरिकांसाठी NCMC स्मार्ट कार्ड बंधनकारक

महाराष्ट्र राज्य मार्ग परिवहन महामंडळानं एसटी बसच्या प्रवाशांसाठी एक मोठा निर्णय घेतलाय. येत्या 1 ऑगस्ट 2026 पासून महिला, ज्येष्ठ नागरिक आणि अमृत ज्येष्ठ नागरिक प्रवाशांसाठी NCMCस्मार्ट कार्ड बंधनकारक करण्यात आले आहे. महाराष्ट्र राज्य मार्ग परिवहन महामंडळाच्या प्रवासी सेवांमध्ये अधिक पारदर्शकता, सुलभता आणि डिजिटल व्यवहारांना चालना देण्याचा प्रयत्न या माध्यमातून केला जाणार आहे. महिला, ज्येष्ठ नागरिक आणि अमृत ज्येष्ठ नागरिक प्रवाशांसाठी एनसीएमसी स्मार्ट कार्ड बंधनकारक करण्यात येणार असल्याची माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली. राज्यभरात एनसीएमसी स्मार्ट कार्ड नोंदणी आणि वितरण मोहिमेला वेग आला आहे.

राज्यातील महिला शेतकऱ्यांना मिळणार वैधानिक ‘शेतकरी’ दर्जा;

विधिमंडळात येणार विधेयक, मुख्यमंत्र्यांचे निर्देश
मुख्यमंत्री देवेंद्र फडणवीस यांच्या अध्यक्षतेखाली मुंबईत ‘महाराष्ट्र महिला शेतकरी सक्षमीकरण विधेयक, 2026’ संदर्भात बैठक पार पडली. राज्यातील महिला शेतकऱ्यांना स्वतंत्र शेतकरी म्हणून कायदेशीर मान्यता मिळावी यासाठी ‘महाराष्ट्र महिला शेतकरी सक्षमीकरण विधेयक 2026’ पावसाळी अधिवेशनात सादर केले जाणार आहे. महिला शेतकऱ्यांच्या हक्कांचे संरक्षण होऊन त्यांच्या सर्वांगीण सक्षमीकरणाला चालना मिळावी यासाठी सर्वसमावेशक धोरण तयार करण्याचे निर्देश मुख्यमंत्री फडणवीस यांनी यावेळी दिले. तसेच राज्यातील कृषी क्षेत्रात 81% हून अधिक महिलांचा सहभाग आहे. कृषी योजनांचा लाभ महिलांना मिळावा यासाठी जमिनीची मालकी ही अट असल्याने मोठ्या संख्येने महिला शेतकरी योजनांपासून वंचित राहतात. कुटुंबाच्या किंवा सामुदायिक जमिनीवर शेती करणाऱ्या महिला, तसेच मत्स्यव्यवसाय, पशुपालन, कुक्कुटपालन, वनउपज संकलन यांसारख्या पूरक व्यवसायांमध्ये कार्यरत महिलांनाही शेतकरी म्हणून मान्यता मिळत नाही. या पार्श्वभूमीवर हे विधेयक तयार करण्यात आलंय.

मान्सूनच्या वाटेत नवे संकट,

कोकणात येऊन रखडला

मुंबईसह संपूर्ण महाराष्ट्रात मान्सूनचा प्रवास मंदावला असून आगमन रखडले आहे. नैऋत्य मोसमी पाऊस हरणे-दापोली परिसरापर्यंत पोहोचून पुढे सरकण्यास अनुकूल परिस्थिती नसल्यामुळे त्याची प्रगती थांबली आहे. मुंबईत तापमानाचा पारा 35 अंश सेल्सिअसच्या आसपास असून नागरिक उकाड्याने त्रस्त आहेत. आता पुढील आठवड्यात पावसाची शक्यता हवामान विभागाकडून वर्तवण्यात आली आहे. मान्सून हा देशाच्या अर्थचक्राचा प्राणवायू मानला जातो. अशावेळी एल निनोची वाढती ताकद चिंतेचे कारण ठरत आहे. पावसाच्या वाटेत एल निनोचं नवं संकट आल्याचं दिसून येत आहे. हवामान तज्ज्ञांच्या मते, काही भागांत पाऊस लांबणीवर पडू शकतो. काही भागांत अपेक्षेपेक्षा कमी पाऊस होऊ शकतो. तर काही ठिकाणी अल्पावधीत मुसळधार पावसाचे तडाखे बसू शकतात.

यंदा त्रिभाषा सूत्राची अंमलबजावणी नाही;

शालेय शिक्षण विभागाकडून पहिली ते आठवीसाठी वेळापत्रक जाहीर Top 10 News : 
5 जूनपासून सुरु होणाऱ्या नव्या शैक्षणिक वर्षापासून त्रिभाषा सूत्राची अंमलबजावणी करण्यात येणार नसल्याचे स्पष्ट झाले आहे. शालेय शिक्षण विभागाकडून इयत्ता तिसरी ते आठवीसाठी विषय योजना, शालेय कामाचे दिवस, विषय निहाय तालिका विभागणी व शालेय वेळापत्रक जाहीर करण्यात आले आहे. त्रिभाषा धोरण अंमलबजावणीबाबत समितीच्या शिफारशी व त्यावरील होणाऱ्या शासनाचे निर्णयास अनुसरुन तिसऱ्या भाषेबाबत निर्णय होईपर्यंत प्रचलित अभ्यासक्रमानुसार पाठ्यपुस्तकांचा उपयोग करण्यात येणार,असा निर्णय राज्यस्तरीय सुकाणू समिती बैठकीत घेण्यात आला आहे. प्रचलित पद्धतीनुसार तिसरी भाषा बाबत विद्यमान धोरण कायम असल्याने इ.5वीपासून पुढील वर्गासाठी यापूर्वी लागू असलेली तिसरी भाषा पद्धती नवीन धोरण व नवीन अभ्यासक्रम लागू होईपर्यंत तशीच लागू राहील. पूर्वीचा कार्यानुभव हा विषय यापुढे कार्यशिक्षण या नावाने ओळखला जाईल.

ठाकरेंचे खासदार शिंदेच्या संपर्कात

असल्याचा चर्चेला दानवेंचा दुजोरा

लोकसभेची निवडणूक होऊन दोन वर्ष झाले आहेत. या दोन वर्षात अशी चर्चा आहे. शिवाय महिन्याला, दर दोन महिन्याला अशी चर्चा होतच असते. काही खासदार एकनाथ शिंदे यांच्या संपर्कात असतील, तर काही तर उघड उघड बोलत आहेत. आम्हालाही सर्व माहित आहे. मात्र दर महिना दोन महिन्याला संपर्कात असल्याची चर्चा होते आता हे अधिकृत कबूल करायला हवं, असं मोठं विधान शिवसेना उद्धव बाळासाहेब ठाकरे पक्षाचे आमदार अंबादास दानवे यांनी केलंय. अंबादास दानवे हे मराठवाडा दौऱ्यावर असताना काही खासदार शिंदे यांच्या संपर्कात असतील या चर्चेला दुजोरा दिला आहे.धाराशिवमध्ये शिवसेना उद्धव बाळासाहेब पक्षाचे आमदार अंबादास दानवे यांच्या उपस्थितीत प्रमुख पदाधिकाऱ्यांची बैठक आयोजित करण्यात आली होती. या बैठकीला आमदार कैलास पाटील, आमदार प्रवीण स्वामी यांच्यासह अनेक पदाधिकारी हजर होते. मात्र ओमराजे निंबाळकर अनुपस्थित असल्याने चर्चांना उधाण आलंय.

सरकारी इमारत आगीच्या भक्ष्यस्थानी;

4000 EVM मशीन जळून खाक
पश्चिम बंगालमध्ये एका सरकारी इमारतीला लागलेल्या आगीमध्ये तब्बल 4000 EVM मशीन जाळून खाक झाल्या. पश्चिम बंगालमध्ये झालेल्या विधानसभा निवडणुकीत याच EVM मशीन वापरण्यात आल्या होत्या. याबाबत मंत्री कौशिक चौधरी यांनी माहिती दिली. तसेच या प्रकरणी एफआयआर दाखल झाली असून पोलिसांनी चौकशी सुरू केली आहे. दक्षिण कोलकाताच्या अलीपूर येथील इमारत बुधवारी आगीच्या भक्षस्थानी पडली. या इमारतीमध्ये इतर विभागांव्यतिरिक्त जिल्हा परिषदेचे कार्यालयही होते. यामध्ये तब्बल 4000 EVM जळून खाक झाले. यावर्षी झालेल्या विधानसभा निवडणुकीदरम्यान 10 मतदारसंघांमध्ये या EVM चा वापर करण्यात आला होता, असे आपत्कालीन मंत्री कौशिक चौधरी यांनी सांगितले. तसेच मंत्री चौधरी यांनी घटनास्थळाची पाहणी देखील केली, ही आग सामान्य वाटत नाही, यामध्ये काही घातपात झाला होता का, याचा आम्ही तपास करत आहोत असे ते म्हणाले.

‘भारतीय जहाजांवरील ड्रोन हल्ले अमान्य’,

भारतीय जहाजांवरील हल्ल्यांसाठी ट्रम्पनी इराणला धरलं जबाबदार
अमेरिका आणि इराणमधील युद्धाबाबत तीन महिन्यानंतर देखील ठोस तोडगा निघालेला नाही. या युद्धाचा परिणाम होर्मुझ सामुद्रधुनीतून ये-जा करणाऱ्या जहाजांवर होत असून याचा फटका अनेक देशांच्या जागतिक व्यापाराला बसतोय. अमेरिकेच्या लष्कराने ओमान किनारपट्टीजवळ अनेक जहाजांवर हल्ले केले. या हल्ल्यात आतापर्यंत तीन भारतीय खलाशांचा मृत्यू झाला आहे.मात्र, असं असतानाही आता डोनाल्ड ट्रम्प यांनी भारतीय जहाजांवरील हल्ल्यांसाठी इराणला जबाबदार धरलंय. “फेक न्यूज (खोट्या बातम्या) संदर्भात इराणने ज्या गोष्टींचा उल्लेख केला, त्याचा लेखी स्वरूपात मान्य करण्यात आलेल्या अटींशी काहीही संबंध नाही. त्यांच्याशी प्रामाणिकपणे व्यवहार करणं अशक्य आहे. हे अविश्वसनीय आहे”, असं डोनाल्ड ट्रम्प यांनी म्हटलंय. “शिवाय, काल रात्री ‘स्ट्रेट ऑफ होर्मुझ’मधून जाणाऱ्या भारतीय जहाजांवर त्यांनी केलेला ड्रोन हल्ला पूर्णपणे हाणून पाडण्यात आला. अशा कारवाया अजिबात स्वीकारल्या जाणार नाहीत. त्यांनी (इराणने) आपली वागणूक त्वरित सुधारली पाहिजे”, असं डोनाल्ड ट्रम्प यांनी म्हटलंय.

केन विल्यमसनची आंतरराष्ट्रीय क्रिकेटमधून अचानक निवृत्तीची घोषणा;

कसोटी मालिकेदरम्यान मोठा निर्णय

 

न्यूझीलंडचा दिग्गज खेळाडू केन विल्यमसनने अचानक आंतरराष्ट्रीय क्रिकेटमधून निवृत्ती जाहीर केली आहे. केन विल्यसमनच्या निवृत्तीची माहिती न्यूझीलंड क्रिकेटचं सोशल मीडिया अकाऊंट ब्लॅककॅप्सवरून देण्यात आली आहे. केनने तात्काळ निवृत्ती जाहीर केल्याची पोस्ट संघाने शेअर केली आहे. याचबरोबर केन विल्यसमनचा एक मोठा व्हीडिओदेखील त्यांनी शेअर केला आहे. न्यूझीलंड आणि इंग्लंड यांच्यातील तीन सामन्यांची कसोटी मालिका सुरू असतानाच विल्यमसनने हा मोठा निर्णय जाहीर केला आहे. केन विल्यसमनच्या निवृत्तीच्या घोषणेसह त्याच्या तब्बल १६ वर्षांच्या गौरवशाली आंतरराष्ट्रीय कारकिर्दीला पूर्णविराम लागला आहे. २०१० मध्ये न्यूझीलंडकडून पदार्पण करणाऱ्या विल्यमसनने आपल्या देशासाठी ३७८ आंतरराष्ट्रीय सामने खेळले. या काळात त्याने फलंदाजीत अनेक विक्रम आपल्या नावावर केले आणि जगभरातील क्रिकेटप्रेमींचा आदर व प्रशंसा मिळवली.

प्रणित मोरेच्या शोमध्ये मृतदेहाच्या प्रायव्हेट पार्टबद्दल बरळली,

आता डॉ.सेजल पवारचा लेखी माफीनामा Top 10 News : 

प्रणित मोरेच्या कॉमेडी शो दरम्यान मृतदेहा संदर्भात आक्षेपार्ह वक्तव्य करणाऱ्या डॉ सेजल पवार संदर्भात एक मोठी अपडेट समोर आली आहे. डॉ. सेजल पवारने KEM रुग्णालय प्रशासनाकडे लेखी माफीनामा सादर केला. याप्रकरणी स्थापन करण्यात आलेल्या समितीने संबंधित कॉमेडी शोचं संपूर्ण रेकॉर्डिंग पाहून विद्यार्थिनीशी सविस्तर चर्चा केली असल्याची माहिती आहे. दरम्यान, या प्रकरणी आज डॉक्टरच्या पालकांना हजर राहण्यास सांगण्यात आले असून त्यांच्यासमोर विद्यार्थिनी डॉक्टरच समुपदेशन करण्यात येणार असल्याचीही माहिती आहे. याप्रकरणी वरिष्ठ प्राध्यापकांचा समावेश असलेलेली प्राथमिक तथ्यशोधन समिती तातडीने स्थापन करण्यात आली असून आज समिती आपला अहवाल देणार आहे. त्यामुळे KEM रुग्णालय प्रशासन डॉक्टरवर काय कारवाई करते? याकडे सगळ्यांच लक्ष लागलंय.