‘शेतकऱ्यांना त्रास झालेला चालेल पण उद्योजकांना नको’;
गुलाबराव पाटील यांच्या वक्तव्यावरून वाद

Top 10 News : राज्याचे मंत्री गुलाबराव पाटील यांच्या “शेतकऱ्यांना त्रास झाला तरी चालेल, पण उद्योजकांना नको” या वक्तव्यावरून मोठा वाद निर्माण झाला आहे. जळगावातील कार्यक्रमात केलेल्या या विधानावर विरोधकांनी तीव्र टीका केली असून शेतकरी संघटनांनीही संताप व्यक्त केला आहे. स्मार्ट मीटर, अपुरा वीजपुरवठा आणि वाढत्या अडचणींनी शेतकरी आधीच त्रस्त असताना मंत्र्यांच्या वक्तव्यामुळे नाराजी वाढली आहे. शेतकऱ्यांच्या समस्या सोडवण्याऐवजी उद्योगपतींची बाजू घेतल्याचा आरोप विरोधकांनी सरकारवर केला आहे.

NEET आंदोलनातील विद्यार्थ्यांना दिलासा;
गुन्हे मागे घेण्याचे फडणवीसांचे आदेश

NEET पेपरफुटीविरोधी आंदोलनात सहभागी झालेल्या विद्यार्थ्यांवरील गुन्हे तातडीने मागे घेण्याचे निर्देश मुख्यमंत्री देवेंद्र फडणवीस यांनी गृह विभाग आणि पोलिसांना दिले आहेत. बेकायदेशीर जमावासह विविध कलमांखाली दाखल गुन्हे मागे घेतले जाणार असल्याने विद्यार्थ्यांना मोठा दिलासा मिळाला आहे. यापूर्वी सर्वोच्च न्यायालयानेही गुन्हेगारी पार्श्वभूमी नसलेल्या आंदोलकांवर सौम्य भूमिका घेण्याचे निर्देश दिले होते. दरम्यान, पोलिसांकडून त्रास सुरू राहिल्यास पुन्हा आंदोलन छेडण्याचा इशारा कॉकरोच जनता पार्टीने दिला आहे.

राज्यभरात ३ दिवस मुसळधार पावसाची शक्यता
नागपूरसह अनेक जिल्ह्यांत अलर्ट

बंगालच्या उपसागरातील कमी दाबाच्या पट्ट्यामुळे महाराष्ट्रात पावसाचा जोर वाढला आहे. भारतीय हवामान विभागाने चंद्रपूर, गडचिरोली आणि गोंदियाला रेड, तर नागपूर, वर्धा आणि भंडाऱ्याला ऑरेंज अलर्ट जारी केला आहे. विद्यार्थ्यांच्या सुरक्षिततेसाठी नागपूर, चंद्रपूर आणि गडचिरोली जिल्ह्यातील शाळा, महाविद्यालये, अंगणवाड्या व कोचिंग क्लासेसना 29 जुलै रोजी सुट्टी जाहीर करण्यात आली आहे. अतिवृष्टीमुळे पूर, पाणी साचणे, दरडी कोसळणे आणि वाहतूक विस्कळीत होण्याचा इशारा प्रशासनाने दिला आहे.

मुंबईतील नामांकित क्लबांवर FDAची धडक कारवाई;
CCIचा परवाना निलंबित

अन्न व औषध प्रशासनाने मुंबईतील नामांकित क्लब, रेस्टॉरंट्स आणि कॅन्टीनवर धडक कारवाई करत ‘द क्रिकेट क्लब ऑफ इंडिया’चा अन्न सुरक्षा परवाना तात्काळ निलंबित केला. तपासणीत अस्वच्छ स्वयंपाकगृह, झुरळांचा प्रादुर्भाव आणि अन्न सुरक्षा नियमांचे गंभीर उल्लंघन आढळले. एमआयजी क्रिकेट क्लबसह विलिंग्डन स्पोर्ट्स क्लब, बीके जुहू जिमखाना, अपर्णा जुहू जिमखाना आणि गोरेगाव स्पोर्ट्स क्लबवरही कारवाई झाली. राज्यभरातील विशेष मोहिमेत 81 आस्थापनांची तपासणी करण्यात आली. 11 परवाने निलंबित, तर 12 संस्थांना कारणे दाखवा नोटिसा बजावण्यात आल्या.

बुलढाण्यात पोलीस हेडकॉन्स्टेबल ACBच्या जाळ्यात;
5 हजारांची लाच घेताना अटक Top 10 News :

बुलढाणा जिल्ह्यात लाचलुचपत प्रतिबंधक विभागाने मोठी कारवाई करत बिबी पोलीस ठाण्यातील हेडकॉन्स्टेबल सतीश नागरे यांना ₹5 हजारांची लाच स्वीकारताना रंगेहाथ पकडले. एका गुन्ह्यात मदत करण्यासाठी आणि पोलीस कोठडी वाढू न देण्यासाठी त्यांनी लाचेची मागणी केल्याची तक्रार होती. पडताळणीनंतर एसीबीने लोणार तालुक्यातील किनगाव जट्टू बसथांब्यावर सापळा रचून कारवाई केली. आरोपीविरुद्ध भ्रष्टाचार प्रतिबंधक कायद्यान्वये गुन्हा दाखल करण्यात आला असून नागरिकांनी लाचेच्या मागणीची तक्रार तातडीने एसीबीकडे करावी, असे आवाहन करण्यात आले आहे.

E20 पेट्रोलविरोधात वाहनचालकांचा मोर्चा
4 ऑगस्टला संसदेकडे करणार कूच

दिल्लीत E20 इथेनॉलमिश्रित पेट्रोलविरोधात वातावरण तापण्याची चिन्हे आहेत. दिल्ली टॅक्सी अँड टुरिस्ट ट्रान्सपोर्ट अँड टूर असोसिएशनने 4 ऑगस्ट रोजी संसदेवर मोर्चाची घोषणा केली आहे. इथेनॉलचे प्रमाण वाढल्याने वाहने बिघडत असून मोठे आर्थिक नुकसान होत असल्याचा दावा वाहनचालकांनी केला आहे. दरम्यान, केंद्रीय मंत्री नितीन गडकरी यांनी E20 संदर्भातील कथित डीपफेक आणि बदनामीकारक पोस्ट हटविण्याची मागणी करत मेटा, एक्स आणि गुगलविरोधात मुंबई उच्च न्यायालयात याचिका दाखल केली असून 5 ऑगस्टला सुनावणी होणार आहे.

‘जनरेशन गटार’ वक्तव्यावरून कंगना वादात;
कॉकरोच जनता पार्टीचा पलटवार

जंतर-मंतर आंदोलनातील तरुणांना ‘जनरेशन गटार’ असे संबोधल्याने खासदार कंगना रणौत पुन्हा वादात सापडल्या आहेत. त्यांच्या वक्तव्यावर कॉकरोच जनता पार्टीने तीव्र प्रतिक्रिया देत, ‘जनरेशन Z’चे देशासाठीचे योगदान कंगनापेक्षा अधिक असल्याचा दावा केला. पक्षाचे प्रवक्ते सौरव दास यांनी कंगनामध्ये गांभीर्याचा अभाव असून तिचा स्वतःचा पक्षही तिला गांभीर्याने घेत नसल्याची टीका केली. कंगनाने आंदोलकांच्या वर्तन, भाषा आणि संस्कारांवरही प्रश्न उपस्थित करत सोशल मीडियावर कठोर शब्दांत नाराजी व्यक्त केली.

चीनला रोखण्यासाठी अमेरिकेचा नवा डाव;
समुद्राखालील केबलसह मोठ्या प्रकल्पांना निधी

चीनचा वाढता प्रभाव रोखण्यासाठी ट्रम्प प्रशासनाने अनेक चीनविरोधी प्रकल्पांना पुन्हा गती दिली आहे. कॅरेबियन आणि मध्य अमेरिकेतील समुद्राखालील इंटरनेट व दूरसंचार केबल्स बदलण्यासाठी 17.58 कोटी डॉलर खर्च करण्यात येणार आहेत. याशिवाय आशिया व आफ्रिकेतील चीनविरोधी उपक्रमांसाठी सुमारे 50 कोटी डॉलर निधीची तरतूद करण्यात आली आहे. बंदरे, सायबर सुरक्षा, दुर्मीळ खनिजे आणि अंतराळ क्षेत्रात चीनचा प्रभाव कमी करण्यासाठीही अमेरिका विविध रणनीती राबवणार असल्याची माहिती समोर आली आहे.

पाकिस्तानची लाजीरवाणी कामगिरी
परदेशात सलग आठवा पराभव

वेस्ट इंडिजने पहिल्या कसोटीत पाकिस्तानचा 90 धावांनी पराभव करत मालिकेत 1-0 अशी आघाडी घेतली. 211 धावांच्या लक्ष्याचा पाठलाग करताना पाकिस्तानचा दुसरा डाव अवघ्या 120 धावांत संपुष्टात आला. जायडन सील्सने 5 बळी घेत निर्णायक भूमिका बजावली. बाबर आझमच्या नेतृत्वाखालील पाकिस्तानचा परदेशातील सलग आठवा कसोटी पराभव ठरला. या सामन्यातील सर्व 40 बळी वेगवान गोलंदाजांनी घेत इतिहास रचला. तसेच पाकिस्तानविरुद्ध एका कसोटीत वेस्ट इंडिजच्या वेगवान गोलंदाजांनी सर्व 20 बळी घेण्याची ही पहिलीच वेळ ठरली.

‘बंटवारा 1947’चा ट्रेलर प्रदर्शित;
सनी देओलचा दमदार अंदाज चर्चेत Top 10 News :

सनी देओलच्या बहुप्रतीक्षित ‘बंटवारा 1947’ चित्रपटाचा ट्रेलर प्रदर्शित झाला असून प्रेक्षकांकडून त्याला उत्स्फूर्त प्रतिसाद मिळत आहे. 1947 च्या फाळणीच्या पार्श्वभूमीवरील या चित्रपटात सनी देओल धैर्यवान भूमिकेत दिसत आहेत. शबाना आझमी आणि प्रिती झिंटाच्या प्रभावी अभिनयाने ट्रेलरला भावनिक उंची मिळाली आहे. राजकुमार संतोषी दिग्दर्शित या चित्रपटात करण देओल आणि अभिमन्यू सिंग यांच्या महत्त्वाच्या भूमिका आहेत. ए. आर. रहमान यांचे संगीत लाभलेला हा चित्रपट 14 ऑगस्ट 2026 रोजी प्रदर्शित होणार आहे.