देवेंद्र फडणवीस अन् विखे पाटील आपल्याला फसवतायत
मराठा सेवा संघाचा आरोप

Top 10 News : मराठा सेवा संघाचे मुख्य प्रवक्ते डॉ. शिवानंद भानुसे यांनी बुलढाण्यात मनोज जरांगे यांच्या भूमिकेवर टीका केली. हैदराबाद गॅझेटीअरच्या आधारे आरक्षण मिळणार नसल्याचा इशारा 2 सप्टेंबरच्या जीआरपूर्वीच दिला होता, मात्र सरकारने मराठा समाजाची दिशाभूल केल्याचा आरोप त्यांनी केला. SEBC आरक्षणाला स्थैर्य देण्यासाठी ते ओबीसी आरक्षणाप्रमाणे करण्याची मागणी त्यांनी केली. तसेच सारथी संस्थेला 3,000 कोटी आणि अण्णासाहेब पाटील महामंडळाला 5,000 कोटी रुपयांचा निधी देण्याची मागणीही भानुसे यांनी केली.

संजय शिरसाट अडचणीत,
मंत्रिपद धोक्यात आल्याची चर्चा
CJP चे संस्थापक अभिजीत दिपके यांच्या कुटुंबीयांची भेट घेतल्याने शिंदेसेनेचे मंत्री संजय शिरसाट यांच्या अडचणी वाढल्याची चर्चा राजकीय वर्तुळात सुरू आहे. या भेटीमुळे महायुती सरकारमध्ये, विशेषतः भाजपमध्ये नाराजी निर्माण झाल्याचे बोलले जात आहे. कॅबिनेट बैठकीत उपमुख्यमंत्री एकनाथ शिंदे यांनीही या प्रकरणावर नाराजी व्यक्त केल्याची माहिती समोर आली आहे. दिपके यांच्या आंदोलनामुळे शिक्षणमंत्र्यांचा राजीनामा झाल्यानंतर शिरसाट यांनी त्यांच्या कुटुंबीयांची भेट घेतली होती. भाजप नेते चंद्रशेखर बावनकुळे यांनीही यावर आक्षेप घेत कारवाईची मागणी केल्याचे सांगितले जात आहे. त्यामुळे शिरसाट यांच्या मंत्रिपदाबाबत चर्चांना उधाण आले आहे.

निवडणूक आयोगाचा मोठा निर्णय!
SIR प्रक्रियेसाठी मुदतवाढ; नागरिकांना दिलासा

राज्यातील मतदार याद्यांच्या विशेष सखोल पुनरीक्षण (SIR) प्रक्रियेला निवडणूक आयोगाने मुदतवाढ दिली आहे. सुधारित वेळापत्रकानुसार, बूथ लेव्हल अधिकारी (BLO) यांची घराघरांत पडताळणी मोहीम १७ ऑगस्ट २०२६ पर्यंत सुरू राहणार आहे. प्रारूप मतदार यादी २४ ऑगस्ट रोजी प्रसिद्ध होईल, तर दावे व हरकतींसाठी २४ ऑगस्ट ते २३ सप्टेंबरपर्यंत मुदत असेल. सर्व अर्जांवरील सुनावणी व निर्णय २२ ऑक्टोबरपर्यंत पूर्ण करून २७ ऑक्टोबर २०२६ रोजी अंतिम मतदार यादी प्रकाशित करण्यात येणार आहे. आयोगाने नागरिकांना वेळेत अचूक माहिती व आवश्यक कागदपत्रांसह अर्ज करण्याचे आवाहन केले आहे.

राज्यावर अल निनोचं संकट!
कोकण-घाटमाथ्यावर मुसळधार पावसाचा इशारा

राज्यातील अनेक भागांत पावसाने काहीशी उघडीप दिली असली तरी कोकण आणि मध्य महाराष्ट्रातील घाटमाथा परिसरात जोरदार पावसाची शक्यता कायम आहे. भारतीय हवामान विभागाने रायगड व पुणे घाटमाथ्यासाठी ऑरेंज, तर रत्नागिरी, सिंधुदुर्ग, नाशिक, सातारा, कोल्हापूर तसेच गोंदिया, गडचिरोली आणि चंद्रपूर जिल्ह्यांसाठी येलो अलर्ट जारी केला आहे. दरम्यान, पुढील दोन महिन्यांत अल निनोचा प्रभाव वाढण्याची शक्यता असून ५ ऑगस्टनंतर राज्यातील पावसाचा जोर हळूहळू कमी होऊ शकतो. त्यामुळे ऑगस्टमध्ये उकाडा वाढण्याची शक्यता हवामान तज्ज्ञांनी व्यक्त केली आहे.

मुलाला इंजेक्शन देऊन डॉक्टरांनी सुई कमरेतच ठेवली
केडीएमसीच्या रुग्णालयातील धक्कादायक प्रकार Top 10 News :

कल्याणमधील केडीएमसीच्या रुक्मिणीबाई रुग्णालयातील धक्कादायक निष्काळजीपणाचा प्रकार समोर आला आहे. भटक्या कुत्र्याने चावा घेतलेल्या अडीच वर्षीय कावेश पांडे याला रेबीजचे इंजेक्शन दिले आणि सुई त्याच्या कमरेतच राहिली. मुलाला तीव्र वेदना सुरू झाल्यानंतर एक्स-रेमध्ये हा प्रकार उघड झाला. त्यानंतर खासगी रुग्णालयात शस्त्रक्रिया करून सुई बाहेर काढण्यात आली. या प्रकरणी मुख्य आरोग्य अधिकारी डॉ. दीपा शुक्ला यांनी चौकशीचे आदेश दिले असून दोषींवर कारवाईची मागणी कुटुंबीयांनी केली आहे.

५० टक्क्यांहून अधिक आमदार NDAची साथ सोडणार
बड्या नेत्याच्या दाव्यानं खळबळ

तृणमूल काँग्रेसचे ज्येष्ठ नेते कुणाल घोष यांनी देशाच्या राजकारणात मोठ्या घडामोडींचा दावा केला आहे. एनडीएमध्ये गेलेले ६ बंडखोर खासदार आणि ५० टक्क्यांहून अधिक आमदार पुन्हा पक्षात परतण्याच्या तयारीत असून ते पक्षप्रमुख ममता बॅनर्जी यांच्या संपर्कात असल्याचे त्यांनी म्हटले. या लोकप्रतिनिधींवर पोलीस आणि केंद्रीय यंत्रणांच्या माध्यमातून दबाव टाकला जात असल्याचा आरोपही त्यांनी केला. दरम्यान, विधानसभा निवडणुकीतील पराभवानंतर तृणमूल काँग्रेसमध्ये अंतर्गत संघर्ष तीव्र झाला असून बंडखोर गटाचे नेतृत्व रितब्रत बॅनर्जी करत असल्याचे सांगितले जात आहे.

विमा नाही तर पेट्रोल-डिझेल मिळणार नाही!
सुप्रीम कोर्टाचा मोठा निर्णय

देशातील विमाविरहित वाहनांवर आळा घालण्यासाठी सर्वोच्च न्यायालयाने ‘नो इन्शुरन्स, नो फ्युएल’ मोहीम प्रायोगिक तत्त्वावर राबवण्याचा प्रस्ताव मांडला आहे. यासाठी IRDAI आणि रस्ते वाहतूक मंत्रालयाला प्रकल्प तयार करण्याचे निर्देश देण्यात आले आहेत. प्रस्तावानुसार, पेट्रोल पंपांवर इंधन भरण्यापूर्वी वाहनाचा वैध विमा तपासला जाईल आणि विमा नसल्यास इंधन नाकारले जाऊ शकते. तसेच ANPR कॅमेरे विमा डेटाबेसशी जोडून विमाविरहित वाहनांना ई-चलान पाठवण्याची व्यवस्था करण्यात येणार आहे. नवीन कार आणि दुचाकींसाठी अनिवार्य थर्ड-पार्टी विम्याचा कालावधीही वाढवण्याचे निर्देश न्यायालयाने दिले आहेत.

डोनाल्ड ट्रम्प यांच्या जीवाला धोका
गोल्फ कोर्सबाहेरन अज्ञात शस्त्राधाऱ्यास अटक

अमेरिकेचे राष्ट्राध्यक्ष डोनाल्ड ट्रम्प  यांच्या लॉस एंजेलिसमधील गोल्फ कोर्सबाहेर शस्त्रे आणि दारूगोळ्यासह एका संशयिताला अटक करण्यात आली आहे. ३८ वर्षीय जीनिन जॉन टेले याच्याकडून भरलेले पिस्तूल, दारूगोळा आणि १६-फेऱ्यांचे मॅगझिन जप्त करण्यात आले. अधिकाऱ्यांच्या माहितीनुसार, कार्यक्रमाच्या दोन दिवस आधी तो सुरक्षा व्यवस्थेचे फोटो आणि व्हिडिओ काढताना दिसला होता. संशयिताच्या घराच्या झडतीतही मोठ्या प्रमाणात शस्त्रे, दारूगोळा, बुलेटप्रूफ जॅकेट्स आणि संशयास्पद नोंदी आढळल्या. मात्र, हल्ल्याचा कोणताही ठोस कट होता का, याबाबत अधिकाऱ्यांनी अद्याप माहिती दिलेली नाही.

रेसिंग ट्रॅकवरही ‘माही’चा जलवा
मद्रास सर्कीटवर धोनीने चालवली सुपरबाईक

भारताचा माजी कर्णधार महेंद्रसिंग धोनी पुन्हा एकदा आपल्या बाईकप्रेमामुळे चर्चेत आला आहे. चेन्नईजवळील मद्रास इंटरनॅशनल सर्किटवर तो सुपरबाईक चालवताना दिसला असून त्याचे फोटो आणि व्हिडिओ सोशल मीडियावर व्हायरल झाले आहेत. टीव्हीएस युरोग्रिपच्या कार्यक्रमादरम्यान धोनीने रेसिंग ट्रॅकवर हाय-स्पीड फेऱ्या मारत टायर्सची चाचणी घेतली. यानंतर त्याने चाहत्यांशीही संवाद साधला. दरम्यान, २०२० मध्ये आंतरराष्ट्रीय क्रिकेटमधून निवृत्ती घेतलेल्या धोनीने आयपीएल २०२६ मध्ये दुखापतीमुळे एकही सामना खेळला नाही, त्यामुळे त्याच्या आयपीएल निवृत्तीच्या चर्चांनाही पुन्हा उधाण आले आहे.

अमृता-हिमांशू घटस्फोट घेणार?
नात्याबद्दल केला मोठा खुलासा Top 10 News :

मराठी अभिनेत्री अमृता खानविलकर आणि अभिनेता हिमांशु मल्होत्रा यांच्या नात्याबाबत महत्त्वाची माहिती समोर आली आहे. गेल्या दीड वर्षांपासून दोघे वेगळे राहत असल्याची चर्चा असली, तरी त्यांनी घटस्फोटाबाबत कोणताही निर्णय घेतलेला नसल्याचे सांगितले जात आहे. स्वतः अमृता आणि हिमांशु यांनी “आम्ही अजूनही विवाहित आहोत” असे स्पष्ट केले आहे. सूत्रांच्या माहितीनुसार, करिअर, आर्थिक बाबी आणि कौटुंबिक जबाबदाऱ्यांमुळे त्यांनी स्वतंत्र राहण्याचा निर्णय घेतला आहे. मात्र, दोघांमध्ये आजही मैत्रीपूर्ण संबंध असून ते नियमित संपर्कात असल्याचे सांगितले जाते.