Top 10 News :

1. महाराष्ट्रात मुसळधार पावसाचा रेड अलर्ट –

बंगालच्या उपसागरातील कमी दाबाचे क्षेत्र पश्चिमेकडे सरकल्याने आणि अरबी समुद्रातून मोठ्या प्रमाणात आर्द्रता येत असल्याने राज्यातील अनेक भागांत मुसळधार पावसाची परिस्थिती निर्माण झाली आहे. पुणे, सातारा, नाशिकच्या घाटमाथ्यासह धुळे आणि जळगाव जिल्ह्यांना रेड अलर्ट देण्यात आला असून रायगड, ठाणे, पालघर आणि नंदुरबारमध्ये ऑरेंज अलर्ट जारी करण्यात आला आहे. मुंबई, कोकण, मराठवाडा आणि विदर्भातही वादळी वाऱ्यांसह जोरदार पावसाचा अंदाज व्यक्त करण्यात आला असून पुढील 48 तास नागरिकांनी सतर्क राहण्याचे आवाहन करण्यात आले आहे.

2. डिसेंबरमध्ये स्थानिक स्वराज्य संस्थांच्या निवडणुकांची शक्यता –

राज्यातील 22 जिल्हा परिषद, 105 नगरपंचायती आणि सुमारे 12 हजार ग्रामपंचायतींच्या निवडणुका डिसेंबरमध्ये होण्याची शक्यता व्यक्त केली जात आहे. सर्वोच्च न्यायालयात राज्य सरकारने 50 टक्के आरक्षणाच्या घटनात्मक मर्यादेनुसार निवडणुका घेण्याची तयारी दर्शवली आहे. या बदलामुळे अनेक जिल्ह्यांतील आरक्षणाचे गणित बदलणार असून विदर्भ, मराठवाडा आणि ठाणे-पालघरसारख्या भागांत राजकीय चुरस वाढण्याची चिन्हे आहेत.

3. भिवंडीत चार मजली इमारत कोसळून 9 जणांचा मृत्यू –

भिवंडीतील ‘कोहिनूर अपार्टमेंट’ ही चार मजली इमारत मध्यरात्री कोसळून मोठी दुर्घटना घडली. या घटनेत नऊ जणांचा मृत्यू झाला. धोकादायक घोषित केल्यानंतर इमारत रिकामी करण्यात आली होती. मात्र काही नागरिक सामान काढण्यासाठी आत गेल्यानंतर इमारत कोसळली. एनडीआरएफ आणि स्थानिक प्रशासनाने युद्धपातळीवर बचावकार्य राबवले. मुख्यमंत्री देवेंद्र फडणवीस यांनी घटनेची गंभीर दखल घेत दोषींवर कठोर कारवाईचे निर्देश दिले असून मृतांच्या कुटुंबीयांना आर्थिक मदतीची घोषणा केली आहे.

4. 15 ऑगस्टपासून स्मार्ट रेशनकार्डचे वितरण –

राज्यात क्यूआर कोड आधारित स्मार्ट रेशनकार्ड योजना 15 ऑगस्टपासून सुरू होणार आहे. गडचिरोली आणि सिंधुदुर्ग जिल्ह्यांतून या योजनेची सुरुवात केली जाणार असून पहिल्या टप्प्यात केसरी आणि पिवळ्या शिधापत्रिकाधारकांना मोफत स्मार्ट कार्ड दिले जाणार आहे. सुमारे 1 कोटी 86 लाख कुटुंबांना या योजनेचा लाभ मिळणार असून आधार आणि फेस ऑथेंटिकेशनद्वारे वितरण प्रक्रिया पारदर्शक केली जाणार आहे.

सविस्तर वृत्त – 15 ऑगस्टपासून स्मार्ट रेशनकार्डचे वितरण –

5. देशातील 20 हून अधिक राज्यांना मुसळधार पावसाचा इशारा –

भारतीय हवामान विभागाने येत्या आठवड्यात देशभरात मान्सून पुन्हा सक्रिय होणार असल्याचा अंदाज व्यक्त केला आहे. महाराष्ट्र, गुजरात, मध्य प्रदेश, कोकण, गोवा, मराठवाडा यांसह दिल्ली, उत्तर प्रदेश, पंजाब, राजस्थान, बिहार, कर्नाटक आणि केरळमध्ये पुढील सहा ते सात दिवस मुसळधार पावसाची शक्यता वर्तवण्यात आली आहे.

सविस्तर वृत्त – देशातील 20 हून अधिक राज्यांना मुसळधार पावसाचा इशारा –

6. ओमर अब्दुल्ला आणि पायल यांचा घटस्फोट परस्पर संमतीने –

जम्मू-काश्मीरचे मुख्यमंत्री ओमर अब्दुल्ला आणि त्यांच्या विभक्त पत्नी पायल अब्दुल्ला यांनी परस्पर संमतीने विवाहबंधन समाप्त करण्याचा निर्णय सर्वोच्च न्यायालयात कळवला. दोन्ही पक्षांनी सर्व प्रलंबित वाद मागे घेण्यासही सहमती दर्शवली असून न्यायालय लवकरच या कराराच्या आधारे अंतिम आदेश देणार आहे. 1994 मध्ये विवाह झालेले हे दांपत्य 2009 पासून वेगळे राहत होते.

सविस्तर वृत्त – ओमर अब्दुल्ला आणि पायल यांचा घटस्फोट परस्पर संमतीने

7. E-20 पेट्रोलबाबत नितीन गडकरींचे स्पष्टीकरण –

राज्यसभेत बोलताना केंद्रीय मंत्री नितीन गडकरी यांनी 2005 ते 2016 दरम्यानच्या बीएस-3 वाहनांमध्ये ई-20 पेट्रोल वापरल्यास काही रबर सील्स, गॅस्केट्स आणि इंधन पाईप्सवर परिणाम होऊ शकतो, असे सांगितले. मात्र हे भाग सहज बदलता येतात आणि इंजिनमध्ये मोठे बदल करण्याची गरज नसल्याचे त्यांनी स्पष्ट केले. वाहनाच्या एकूण कार्यक्षमतेवर मोठा परिणाम होत नसल्याचाही दावा त्यांनी केला.

8. स्पेन-मोरक्को सीमेवर घुसखोरीचा प्रयत्न; 18 जणांचा मृत्यू –

स्पेनच्या सेउटा सीमाभागात मोरक्कोमधून हजारो स्थलांतरितांनी समुद्रमार्गे घुसण्याचा प्रयत्न केला. या प्रयत्नादरम्यान पाण्यात बुडून 18 जणांचा मृत्यू झाला. परिस्थिती नियंत्रणात आणण्यासाठी स्पेनने लष्कर तैनात केले असून युरोपियन युनियननेही मदतीचे आश्वासन दिले आहे. रोजगाराच्या शोधात मोठ्या प्रमाणावर ही घुसखोरी होत असल्याचे समोर आले आहे.

9. ‘मिर्झापूर द मूव्ही’चा ट्रेलर 11 ऑगस्टला –

लोकप्रिय क्राईम ड्रामा ‘मिर्झापूर’ आता चित्रपटाच्या रूपात प्रेक्षकांच्या भेटीला येणार आहे. ‘मिर्झापूर द मूव्ही’चा ट्रेलर 11 ऑगस्ट रोजी प्रदर्शित होणार असून चित्रपट 4 सप्टेंबर 2026 रोजी रिलीज होणार आहे. कालीन भैया, मुन्ना भैया आणि नव्या भूमिकेत जितेंद्र कुमार यांची उपस्थिती प्रेक्षकांसाठी विशेष आकर्षण ठरणार आहे.

10. अजिंक्य रहाणेवर अन्याय झाल्याची वेंगसरकरांची प्रतिक्रिया –

भारतीय क्रिकेटपटू अजिंक्य रहाणेने आंतरराष्ट्रीय क्रिकेटला निरोप दिल्यानंतर माजी कर्णधार दिलीप वेंगसरकर यांनी त्याच्यावर अन्याय झाल्याची प्रतिक्रिया दिली. ऑस्ट्रेलियातील ऐतिहासिक विजयात महत्त्वाची भूमिका बजावूनही त्याला सातत्याने संघाबाहेर ठेवण्यात आल्याने त्याच्या आत्मविश्वासावर परिणाम झाल्याचे त्यांनी म्हटले. रहाणेने निवृत्ती जाहीर करताना चाहत्यांचे आभार मानत आपल्या आंतरराष्ट्रीय कारकिर्दीचा भावनिक शेवट केला.

सविस्तर वृत्त – अजिंक्य रहाणेवर अन्याय झाल्याची वेंगसरकरांची प्रतिक्रिया