Top 10 News : १) शेतकऱ्यांसाठी मोठी खुशखबर; कर्जमाफीचा पहिला हप्ता जमा

राज्यातील लाखो शेतकऱ्यांची कर्जमाफीची प्रतीक्षा अखेर संपलीय. मुख्यमंत्री देवेंद्र फडणवीस यांनी एका क्लिकद्वारे 6 लाख 22 हजार शेतकऱ्यांच्या कर्जखात्यांमध्ये 5,029 कोटी रुपयांचा पहिला हप्ता हस्तांतरित केलाय. आधार प्रमाणीकरण पूर्ण झालेल्या पात्र शेतकऱ्यांच्या कर्जखात्यांवर ही रक्कम थेट जमा करण्यात आलीय. ज्या शेतकऱ्यांचे आधार प्रमाणीकरण अद्याप बाकी आहे, त्यांचे प्रमाणीकरण पूर्ण होताच टप्प्याटप्प्याने लाभ दिला जाणार आहे. राज्य सरकारने बँकांना पात्र शेतकऱ्यांना तातडीने खरीप पीक कर्ज उपलब्ध करून देण्याचे निर्देश दिलेत. तसेच, 12 लाख खाती दुरुस्तीसाठी बँकांकडे पाठवण्यात आली असून दुसऱ्या टप्प्यात प्रोत्साहनपर अनुदान वितरित केले जाणार असल्याची माहिती मुख्यमंत्री फडणवीस यांनी दिलीय. (Top 10 News)

२) ..तर प्रदेशाध्यक्षांबाबत निर्णय घ्या; प्रशांत किशोरांची राष्ट्रवादीला अट?

राष्ट्रवादी काँग्रेसमध्ये मोठ्या संघटनात्मक बदलांच्या चर्चांना उधाण आले आहे. सूत्रांच्या माहितीनुसार, निवडणूक रणनीतीकार प्रशांत किशोर यांनी मुंबईतील सहा तासांच्या बैठकीत सुनेत्रा पवार यांच्यासमोर प्रदेशाध्यक्ष सुनील तटकरे यांच्या कार्यपद्धतीबाबत नाराजी व्यक्त केलीय. भविष्यात राष्ट्रवादीसोबत काम करायचे असेल तर प्रदेशाध्यक्ष पदाबाबत निर्णय घ्यावा, अशी स्पष्ट भूमिका त्यांनी मांडल्याचे सांगितले जातेय. बैठकीला पार्थ पवार आणि प्रशांत किशोर यांच्या टीमचे सदस्यही उपस्थित होते, तर जय पवार ऑनलाइन सहभागी झाले होते. यापूर्वी सुचवलेल्या संघटनात्मक बदलांची अंमलबजावणी न झाल्याने काम करणे कठीण असल्याचेही किशोर यांनी सांगितल्याची चर्चा आहे. (Top 10 News)

3) राष्ट्रवादी काँग्रेसच्या युवती प्रदेशाध्यक्षपदी निर्मला नवले यांची निवड

राष्ट्रवादी काँग्रेसने पुण्यातील कारेगावच्या माजी सरपंच आणि सोशल मीडियावर लोकप्रिय असलेल्या निर्मला नवले यांच्यावर मोठी संघटनात्मक जबाबदारी सोपवलीय. त्यांची राष्ट्रवादी काँग्रेस युवती प्रदेशाध्यक्ष म्हणून नियुक्ती करण्यात आलीय. नुकत्याच झालेल्या जिल्हा परिषद निवडणुकीत भाजपच्या मनिषा पाचंगे यांच्याकडून पराभव झाल्यानंतरही पक्षाने त्यांच्यावर विश्वास दाखवत महत्त्वाचे पद दिले आहे. उपमुख्यमंत्री आणि पक्षाच्या राष्ट्रीय अध्यक्षा सुनेत्रा पवार यांनी मुंबईतील ‘देवगिरी’ शासकीय निवासस्थानी त्यांना नियुक्तीपत्र प्रदान केले. २०२१ मध्ये कारेगावच्या सरपंचपदाची धुरा सांभाळलेल्या उच्चशिक्षित निर्मला नवले आता राज्यभरात युवती संघटना मजबूत करण्याची जबाबदारी पार पाडणार आहेत. (Top 10 News)

4) गणेशोत्सवासाठी एसटी सज्ज! कोकणात धावणार 5,220 जादा बसेस

गौरी-गणपतीसाठी कोकणात जाणाऱ्या चाकरमान्यांसाठी एसटी महामंडळाने मोठी तयारी केलीय. 7 ते 25 सप्टेंबर या कालावधीत 5,220 जादा बसेस मुंबई, ठाणे आणि पालघरमधून कोकणातील विविध मार्गांवर धावणार असल्याची माहिती परिवहन मंत्री प्रताप सरनाईक यांनी दिलीय. या बसेसचे आरक्षण अधिकृत संकेतस्थळ आणि MSRTC Bus Reservation ॲपवर उपलब्ध आहे. 10 ऑगस्टपासून किमान 40 प्रवाशांसाठी गट आरक्षण सुरू होणार असून महिला व ज्येष्ठ नागरिकांना 50 टक्के, तर अमृत ज्येष्ठ नागरिकांना 100 टक्के भाडे सवलत मिळणार आहे. गणेशोत्सवादरम्यान प्रमुख बसस्थानकांवर अतिरिक्त कर्मचारी आणि कोकणातील महामार्गांवर वाहनदुरुस्ती पथके तैनात करून प्रवाशांना सुरक्षित व सुरळीत सेवा देण्याची व्यवस्था करण्यात आलीय. (Top 10 News)

५) राहुल गांधींनी सांगितले भाजपमधील आवडत्या नेत्याचं नाव; चर्चांना उधाण

काँग्रेसचे खासदार आणि विरोधी पक्षनेते राहुल गांधी यांनी इन्स्टाग्रामवरील ‘Ask Me Anything’ सत्रात भाजपमधील आपल्या आवडत्या नेत्याचे नाव सांगत राजकीय चर्चांना उधाण आणलेय. भाजपमधील तुमचा आवडता नेता कोण? या प्रश्नावर त्यांनी पंजाबचे माजी मुख्यमंत्री कॅप्टन अमरिंदर सिंह यांचे नाव घेतले. अमरिंदर सिंह यांच्याशी आपले कौटुंबिक संबंध असून ते लष्करी इतिहासाचे अभ्यासक आणि दिलखुलास व्यक्तिमत्त्व असल्याचे राहुल गांधी म्हणाले. या विधानानंतर राजकीय वर्तुळात विविध तर्क-वितर्क सुरू झाले आहेत. याच संवादात त्यांनी विद्यार्थी आंदोलन, शिक्षण व्यवस्था आणि आरएसएसवरही टीका केली. तर “तुम्ही बॅटमॅन आहात का?” या प्रश्नावर त्यांनी विनोदी शैलीत उत्तर देत उपस्थितांची दाद मिळवली. (Top 10 News)

६) आता मोबाईलवरूनच दारूची बुकिंग करता येणार; CM विजयचा मोठा निर्णय

तामिळनाडू सरकारच्या मालकीच्या TASMAC ने मद्य विक्रीत मोठा डिजिटल बदल करत नवीन मोबाईल अ‍ॅप सुरू केलेय. या अ‍ॅपद्वारे ग्राहकांना राज्यातील सुमारे 4,038 दुकानांमधील दारूचा स्टॉक, किंमत आणि जवळच्या दुकानांची माहिती मोबाईलवरच मिळणार आहे. पुढील टप्प्यात ऑनलाइन ऑर्डर आणि QR Code द्वारे दुकानातून दारू घेण्याची सुविधाही सुरू होणार आहे. या उपक्रमाचा उद्देश MRP पेक्षा जास्त पैसे आकारण्याच्या तक्रारी रोखणे आणि व्यवहारात पारदर्शकता आणणे हा आहे. डिजिटल पेमेंटमुळे खरेदी प्रक्रिया अधिक जलद होणार असून दुकानांबाहेरील लांब रांगांनाही आळा बसणार आहे. (Top 10 News)

७) Kia 4 सप्टेंबरला लाँच करणार दमदार ‘Sorento Hybrid’

किआ भारतात आपली सर्वात प्रीमियम 7-सीटर Sorento Hybrid SUV 4 सप्टेंबर 2026 रोजी लाँच करणार असून, लॉन्चपूर्वीच बुकिंगला सुरुवात झालीय. या एसयूव्हीची संभाव्य किंमत 35 ते 40 लाख रुपये दरम्यान असू शकते. Sorento मध्ये 1.6-लीटर हायब्रिड पेट्रोल आणि 2.2-लीटर डिझेल इंजिनचे पर्याय मिळण्याची शक्यता आहे. फीचर्समध्ये ड्युअल 12.3-इंच डिस्प्ले, पॅनोरामिक सनरूफ, वायरलेस Android Auto-Apple CarPlay, HUD, ड्युअल-झोन क्लायमेट कंट्रोल यांसारख्या प्रीमियम सुविधा असतील. भारतीय बाजारात या एसयूव्हीची थेट स्पर्धा Toyota Fortuner, Skoda Kodiaq, Volkswagen Tayron, Jeep Meridian आणि MG Majestor सारख्या प्रीमियम एसयूव्हींशी होणार आहे. (Top 10 News)

८) Flipkart Freedom Sale धमाका! Samsung Galaxy S25 FE वर मिळतेय मोठी सूट

फ्लिपकार्टचा Freedom Sale 8 ऑगस्टपासून सुरू होत असून, Samsung Galaxy S25 FE मोठ्या सवलतीत उपलब्ध होणार आहे. सेलदरम्यान हा स्मार्टफोन ₹47,999 मध्ये खरेदी करता येणार असून, या किमतीत फ्लॅट डिस्काउंट आणि बँक ऑफर्सचा समावेश आहे. फ्लिपकार्ट प्लस आणि ब्लॅक सदस्यांना 7 ऑगस्टपासून 24 तासांचा अर्ली ॲक्सेस मिळेल. तसेच Galaxy S25 ची किंमतही ₹57,999 पर्यंत कमी करण्यात आलीय. SBI क्रेडिट कार्डवर 10 टक्के इन्स्टंट डिस्काउंट, नो-कॉस्ट EMI आणि एक्सचेंज ऑफर्सचाही लाभ मिळणार आहे. Galaxy S25 FE मध्ये 6.7-इंच AMOLED 120Hz डिस्प्ले, Exynos 2400 प्रोसेसर, 50MP ट्रिपल कॅमेरा आणि 4,900mAh बॅटरी अशी प्रीमियम वैशिष्ट्ये आहेत. (Top 10 News)

९) अभिनेते मिथुन चक्रवर्तींवर तातडीची शस्त्रक्रिया; डॉक्टरांकडून प्रकृतीबाबत दिलासादायक अपडेट

बॉलिवूडचे ज्येष्ठ अभिनेते आणि भाजप नेते मिथुन चक्रवर्ती यांच्यावर कोलकात्यातील खासगी रुग्णालयात तातडीची शस्त्रक्रिया करण्यात आली. त्यांच्या रुग्णालयातील व्हिडिओनंतर चाहत्यांमध्ये चिंतेचे वातावरण निर्माण झाले होते. पश्चिम बंगालचे विरोधी पक्षनेते शुभेंदू अधिकारी यांनी रुग्णालयात जाऊन त्यांची भेट घेतली आणि शस्त्रक्रिया यशस्वी झाल्याची माहिती दिली. डॉक्टरांच्या देखरेखीखाली मिथुन चक्रवर्ती यांची प्रकृती सध्या स्थिर असून त्यांच्यात सुधारणा होत असल्याचे सांगण्यात आले आहे. मात्र, नेमकी कोणती शस्त्रक्रिया करण्यात आली याबाबत अधिकृत माहिती अद्याप जाहीर करण्यात आलेली नाही. त्यांच्या प्रकृतीत लवकर सुधारणा व्हावी, अशी प्रार्थना चाहते आणि चित्रपटसृष्टीतील अनेक कलाकार करत आहेत. (Top 10 News)

10) निवृत्तीनंतर अजिंक्य रहाणेचा मोठा निर्णय; युरोपियन टी-२० लीगमध्ये ‘एम्स्टर्डम फ्लेम्स’कडून खेळणार!

३० जुलै रोजी आंतरराष्ट्रीय क्रिकेटमधून निवृत्ती जाहीर करणारा भारताचा माजी उपकर्णधार अजिंक्य रहाणे आता प्रथमच एका परदेशी टी-२० लीगमध्ये खेळताना दिसणार आहे. २६ ऑगस्टपासून सुरू होणाऱ्या ‘युरोपियन टी-२० प्रीमियर लीग’मध्ये त्याची ‘एम्स्टर्डम फ्लेम्स’ संघात ‘मार्की खेळाडू’ म्हणून निवड झालीय. या संघात रहाणेसह स्टीव्ह स्मिथ, टिम डेव्हिड आणि मिचेल मार्श यांसारखे स्टार खेळाडू आहेत, तर ऑस्ट्रेलियाचे दिग्गज स्टीव्ह वॉ सह-संस्थापक आहेत. युरोपमधील नवोदित खेळाडूंना प्रेरित करण्यासाठी रहाणे या स्पर्धेत उतरणार आहे. (Top 10 News)