धनंजय मुंडे पुन्हा मंत्री होणार? अमित शहांची घेतली भेट – नाशिक जिल्हा सत्र न्यायालयाने सदनिका घोटाळ्याप्रकरणी राज्याचे क्रीडामंत्री माणिकराव कोकाटे यांच्या 2 वर्षांच्या शिक्षेवर शिक्कामोर्तब केले आहे. यामुळे कोकाटेंचे मंत्रिपद जाणार हे जवळपास निश्चित झाले आहे. आता माजी मंत्री धनंजय मुंडे यांचे नाव पुन्हा एकदा मंत्रिपदाच्या शर्यतीत आले आहे. धनंजय मुंडे यांनी आज केंद्रीय गृहमंत्री अमित शहा यांची दिल्लीत जाऊन भेट घेतली. कोकाटेंवर अटकेची टांगती तलवार असताना मुंडेंनी शहांची भेट घेतली आहे. त्यामुळे कोकाटेंचे मंत्रिपद गेल्यास त्यांचे पद मुंडेंकडे सोपवण्यात येईल, अशी चर्चा राजकीय वर्तुळात रंगली आहे. क्रीडामंत्री माणिकराव कोकाटेंविरोधात अटक वॉरंट – कोणत्याही क्षणी अटक होणार – राज्याचे क्रीडामंत्री माणिकराव कोकाटे यांच्याविरोधात नाशिक जिल्हा न्यायालयाने अटक वॉरंट जारी केल्याने राज्याच्या राजकारणात मोठी खळबळ उडाली आहे. सदनिका घोटाळा प्रकरणात कनिष्ठ न्यायालयाने सुनावलेली दोन वर्षांची शिक्षा सत्र न्यायालयाने कायम ठेवल्यानंतर हा महत्त्वपूर्ण टप्पा समोर आला आहे. याच प्रकरणातील याचिकाकर्त्या अंजली दिघोळ राठोड यांनी कोकाटेंविरोधात अटक वॉरंट काढण्याची मागणी करत न्यायालयात अर्ज दाखल केला होता. या अर्जावर झालेल्या सुनावणीनंतर न्यायालयाने कोकाटेंविरोधात अटक वॉरंट जारी करत पोलिसांना कारवाईचे निर्देश दिले. या निर्णयामुळे राष्ट्रवादी काँग्रेससाठी हा मोठा धक्का मानला जात असून, आता पक्षप्रमुख अजित पवार काय भूमिका घेणार याकडे सर्वांचे लक्ष लागले आहे. वाल्मिक कराडला हायकोर्टाचा मोठा झटका – संतोष देशमुख हत्या प्रकरणात जामीन फेटाळला – मस्साजोग गावचे सरपंच संतोष देशमुख यांच्या हत्येप्रकरणातील मुख्य आरोपी वाल्मिक कराडला मुंबई उच्च न्यायालयाच्या औरंगाबाद खंडपीठाकडून मोठा धक्का बसला आहे. या प्रकरणात कराडने दाखल केलेला जामीन अर्ज न्यायालयाने फेटाळून लावला असून, त्यामुळे तो पुढील काळासाठीही कोठडीतच राहणार आहे. या निकालामुळे संतोष देशमुख यांच्या कुटुंबीयांना मोठा दिलासा मिळाला असून, गावासह संपूर्ण परिसरात न्यायालयाच्या निर्णयाचे स्वागत होत आहे. या संवेदनशील प्रकरणाकडे राज्यभराचे लक्ष लागले होते आणि आजचा निकाल महत्त्वाचा मानला जात आहे. १४५ कोटींचे ड्रग्ज प्रकरण – प्रकाश शिंदेंनी दावे फेटाळले – सातारा जिल्ह्यातील सावरी गावात १४५ कोटींचे ड्रग्ज सापडल्याचा दावा करत शिवसेना ठाकरे गटाच्या नेत्या सुषमा अंधारे यांनी उपमुख्यमंत्री एकनाथ शिंदे यांचे भाऊ प्रकाश शिंदे यांच्यावर गंभीर आरोप केले आहेत. “ज्या शेडमध्ये ४५ किलो ड्रग्ज सापडले, तेथील कामगारांना प्रकाश शिंदेंच्या रिसॉर्टमधून जेवण पुरवले जात होते,” असा दावा अंधारे यांनी पत्रकार परिषदेत केला. दुसरीकडे, प्रकाश शिंदे यांनी हे सर्व आरोप फेटाळून लावत याला ‘राजकीय षडयंत्र’ म्हटले आहे. “ती जागा माझी नसून सहा महिन्यांपूर्वीच रणजीत शिंदे यांना दिली आहे. ड्रग्ज सापडलेल्या ठिकाणाशी माझा कोणताही संबंध नाही,” असे स्पष्टीकरण शिंदे यांनी दिले. या प्रकरणावरून आता राज्यातील राजकीय वातावरण चांगलेच तापले असून, पोलिसांनी यावर अधिकृत भाष्य करणे अपेक्षित आहे. मुंबई मनपासाठी अजित पवारांचा ‘मास्टरस्ट्रोक’ – भाजपच्या विरोधानंतरही नवाब मलिकांकडेच कमान – मुंबई महानगरपालिका निवडणुकीच्या पार्श्वभूमीवर उपमुख्यमंत्री अजित पवार यांनी भाजप आणि शिवसेनेचा विरोध डावलून मुंबईची जबाबदारी नवाब मलिक यांच्याकडेच कायम ठेवली आहे. मलिक यांच्यावरील गंभीर आरोपांमुळे भाजपने त्यांच्यासोबत काम करण्यास स्पष्ट नकार दिला असला, तरी अजित पवारांनी त्यांना झुकते माप दिले आहे. नवाब मलिक यांच्या मदतीसाठी अदिती तटकरे आणि सना मलिक यांची समन्वय समिती स्थापन होण्याची शक्यता आहे. दरम्यान, भाजप नेते अमित साटम यांनी ‘मलिक सोबत असतील तर युती अशक्य’ असल्याचा इशारा दिला आहे. मात्र, मुंबईतील मुस्लिम आणि दलित मतांचे समीकरण पाहता राष्ट्रवादीने मलिकांच्या नेतृत्वावर विश्वास कायम ठेवला आहे. यामुळे महायुतीत मुंबईच्या जागेवरून पेच निर्माण होण्याची चिन्हे आहेत. राहुल गांधी जर्मनीला पोहोचले – बर्लिनमध्ये कार्यक्रमात होणार सहभागी – लोकसभेतील विरोधी पक्षनेते राहुल गांधी बुधवारी जर्मनीची राजधानी बर्लिन येथे पोहोचले. विमानतळावर भारतीय परदेशी काँग्रेसच्या कार्यकर्त्यांनी त्यांचे स्वागत केले. राहुल गांधी आज बर्लिनमध्ये IOC कार्यक्रमात सहभागी होतील. IOC नुसार, राहुल गांधी भारतीय प्रवासी समुदायाशी संवाद साधतील आणि युरोपमधील पक्षाच्या विविध अध्यक्षांना भेटून अनिवासी भारतीय समस्या आणि पक्षाची विचारधारा पसरवण्यावर चर्चा करतील. राहुल गांधी 20 डिसेंबरपर्यंत तेथेच राहतील. त्यांचा जर्मनी दौरा अशा वेळी होत आहे, जेव्हा देशात संसदेचे हिवाळी अधिवेशन सुरू आहे. यावरून भाजपने राहुल गांधींच्या जर्मनी दौऱ्यावर निशाणा साधला होता. गेल्या 6 महिन्यांतील राहुल गांधींचा हा चौथा परदेश दौरा आहे. यापूर्वी जुलै ते सप्टेंबर दरम्यान ते लंडन, मलेशिया, ब्राझील-कोलंबियाच्या दौऱ्यावर गेले होते. एपस्टाइन फाइल्स उघडण्यास 2 दिवस बाकी- जगभरातील नेते-उद्योगपतींमध्ये भीती- ट्रम्प प्रशासन १९ डिसेंबर रोजी कुख्यात लैंगिक गुन्हेगार जेफ्री एपस्टाईनशी संबंधित जुने सरकारी रेकॉर्ड जाहीर करण्याची अपेक्षा आहे. एपस्टाईनच्या प्रकरणाशी संबंधित सर्व ईमेल, फोटो आणि कागदपत्रे सार्वजनिक केली जातील. या नेटवर्कमध्ये अल्पवयीन मुलींचे शोषण केले जात होते आणि जगातील अनेक शक्तिशाली लोक त्यात सामील होते असा आरोप आहे. यापूर्वी, १२ डिसेंबर रोजी या प्रकरणाशी संबंधित १९ छायाचित्रे सार्वजनिक करण्यात आली होती. यापैकी तीन छायाचित्रे ट्रम्प यांची होती. याव्यतिरिक्त, माजी राष्ट्राध्यक्ष बिल क्लिंटन आणि अब्जाधीश बिल गेट्स यांसारख्या प्रमुख व्यक्तींचे छायाचित्रेदेखील सार्वजनिक करण्यात आली होती. भारतीय राजकारणी सुब्रमण्यम स्वामी, पृथ्वीराज चव्हाण यांनी असा दावा केला आहे की या फायलींमधून काही भारतातील विद्यमान खासदार, मंत्री, माजी मंत्र्यांची नावे उघड होऊ शकतात. RBIचा महाराष्ट्रातील आणखी एका बँकेला दणका – लोकनेते आर.डी. क्षीरसागर सहकारी बँके’वर निर्बंध – रिझर्व्ह बँक ऑफ इंडियाने नाशिकच्या निफाड येथील ‘लोकनेते आर. डी. अप्पा क्षीरसागर सहकारी बँक लिमिटेड’ वर कडक निर्बंध लादले आहेत. बँकेची खालावलेली आर्थिक स्थिती पाहता १६ डिसेंबर २०२५ पासून पुढील सहा महिन्यांसाठी ही कारवाई करण्यात आली आहे. या निर्बंधांनुसार, आरबीआयच्या परवानगीशिवाय बँकेला नवीन कर्ज वाटप, गुंतवणूक किंवा ठेवी स्वीकारता येणार नाहीत. तसेच, ठेवीदारांना सध्या त्यांच्या खात्यातून रक्कम काढता येणार नाही. मात्र, कर्मचाऱ्यांचे पगार व भाड्यासारख्या अत्यावश्यक खर्चास मुभा देण्यात आली आहे. दरम्यान, पात्र ठेवीदारांना DICGC कडून ५ लाख रुपयांपर्यंतच्या ठेवींचा विमा संरक्षण दावा करता येईल. बँकेचा परवाना रद्द झाला नसून, परिस्थितीनुसार निर्बंधांचा आढावा घेतला जाईल, असे आरबीआयने स्पष्ट केले आहे. वरुण चक्रवर्तीची ऐतिहासिक झेप – बुमराहचा विक्रम मोडीत – भारतीय फिरकीपटू वरुण चक्रवर्ती याने आयसीसी टी-२० गोलंदाजी क्रमवारीत ८१८ रेटिंग पॉइंट्स मिळवून इतिहास रचला आहे. त्याने जसप्रीत बुमराहचा ७८३ रेटिंगचा भारतीय विक्रम मोडला असून, टी-२० इतिहासातील ‘ऑल टाईम’ सर्वोत्तम रेटिंगच्या जागतिक टॉप-१० यादीत स्थान मिळवणारा तो पहिला भारतीय ठरला आहे. दुसरीकडे, फलंदाजी क्रमवारीत अभिषेक शर्मा ९०९ रेटिंगसह पहिल्या स्थानावर कायम आहे, तर तिलक वर्माने चौथ्या स्थानी झेप घेतली आहे. मात्र, कर्णधार सूर्यकुमार यादव १० व्या क्रमांकावर घसरला आहे. गोलंदाजीत अर्शदीप सिंग १६ व्या स्थानावर पोहोचला असून, अष्टपैलू क्रमवारीत शिवम दुबेने १६ वे स्थान पटकावले आहे. “हा फक्त एक चित्रपट नाही…”- प्रीती झिंटाची ‘धुरंधर’बद्दल प्रतिक्रिया – आदित्य धर दिग्दर्शित ‘धुरंधर’ चित्रपट सध्या बॉक्स ऑफिसवर सुसाट असून, प्रेक्षकांसह सेलिब्रिटींकडूनही यावर कौतुकाचा वर्षाव होत आहे. नुकताच अभिनेत्री प्रीती झिंटाने हा चित्रपट पाहिला असून सोशल मीडियावर आपली प्रतिक्रिया दिली आहे. प्रीती म्हणाली की, “अनेक दिवसांनंतर मी थिएटरमध्ये हाऊसफुल्ल शोचा आनंद घेतला. साडेतीन तासांचा हा चित्रपट कधी संपला कळलेच नाही.” तिने रणवीर सिंह, अक्षय खन्ना आणि संजय दत्त यांच्यासह सर्व कलाकारांच्या अभिनयाचे भरभरून कौतुक केले. या चित्रपटाला तिने ‘देशरक्षकांसाठीचे प्रेमपत्र’ असे संबोधले आहे. ५ डिसेंबरला प्रदर्शित झालेल्या या चित्रपटाने आतापर्यंत कोट्यवधींची कमाई केली असून, प्रेक्षकांचा उदंड प्रतिसाद मिळत आहे.
