T20 World Cup 2024 (USA vs IRE) : टी–20 विश्वचषकात आज(14 जून,शुक्रवार,8 वाजता)अमेरिका (USA) आणि आयर्लंड (आयर्लंड) यांच्यात सामना आहे. हा सामना सेंट्रल ब्रॉवर्ड रिजनल पार्क स्टेडियम टर्फ ग्राउंड लॉडरहिल, फ्लोरिडा येथे खेळवला जाईल. गेल्या अनेक दिवसांपासून येथे पाऊस पडत आहे. अशा परिस्थितीत आजचा सामनाही पावसामुळे रद्द होऊ शकतो.

दरम्यान अमेरिका आणि आयर्लंड यांच्यातील सामन्यात मैदान ओले असल्यामुळे नाणेफेक उशीराने होत आहे. फ्लोरिडामध्ये पाऊस थांबला आहे, पण मैदान खूप ओले आहे त्यामुळे टॉस वेळेवर होऊ शकलेला नाही. सामना 8 वाजता सुरू होणार होता मात्र पावसामुळे मैदान ओले असल्याने 8.48 वाजले असतानाही अद्याप नाणेफेक झालेली नाही.

फ्लोरिडामध्ये काही वेळेपासून पाऊस पडत नाही आहे आणि कर्मचारी मैदान लवकरात लवकर कोरडे करण्याचा प्रयत्न करत आहेत जेणेकरून सामना सुरू होईल. काही वेळानंतर पंच खेळपट्टीची पाहणी करतील, त्यानंतर नाणेफेकीबाबत निर्णय घेतला जाऊ शकतो, अशी अपडेट समोर येत आहे.

Lauderhill, Florida 📍

The toss between USA and Ireland has been delayed due to a wet outfield.#T20WorldCup | #USAvIRE | 📝: https://t.co/WpJ6oVQFeu pic.twitter.com/urByXDc0TF

— ICC (@ICC) June 14, 2024

आजचा सामना पावसामुळे रद्द झाला तर काय होईल?

सध्या, भारत हा गट-अ मधील एकमेव संघ आहे जो सुपर-एटसाठी पात्र ठरला आहे. याशिवाय उर्वरित चार संघ अजूनही शर्यतीत आहेत. तथापि, अमेरिका आणि पाकिस्तान हे सुपर-8 साठी पात्र होण्यासाठी प्रबळ दावेदार आहेत. अमेरिकेचे चार गुण आहेत. त्याचबरोबर पाकिस्तानचे दोन गुण आहेत. दोन्ही संघांचा प्रत्येकी एक सामना बाकी आहे.

अमेरिकेला 14 जूनला आयर्लंडविरुद्ध सामना खेळायचा आहे, तर पाकिस्तानचा संघ 16 जूनला आयर्लंडविरुद्ध खेळणार आहे. दोन्ही सामने फ्लोरिडा येथील लॉडरहिल येथे होणार आहेत. सध्या अ गटात भारताचे सहा गुण आहेत. त्याच वेळी, अमेरिकेचे तीन सामन्यांनंतर चार गुण आहेत आणि त्यांचा निव्वळ धावगती 0.127 आहे. त्याच वेळी, पाकिस्तान संघाचे तीन सामन्यांनंतर दोन गुण आहेत आणि त्यांचा निव्वळ धावगती 0.191 आहे.

जर अमेरिकेच्या संघाने आयर्लंडला पराभूत केले किंवा सामना पावसामुळे रद्द झाला तर अमेरिकन संघ सहज सुपर-8 मध्ये पोहोचेल. त्याचवेळी, जर अमेरिका आयर्लंडकडून पराभूत झाल्यास आणि पाकिस्तान संघ आयर्लंडला पराभूत करण्यात यशस्वी झाला तर पाकिस्तान संघ सुपर-8 मध्ये पोहोचेल. मात्र, गेल्या काही दिवसांपासून फ्लोरिडामध्ये भरपूर पाऊस झाला आहे. एवढेच नाही तर 14, 15 आणि 16 जून रोजी मुसळधार पाऊस पडण्याची शक्यता आहे.

यूएस-आयर्लंड किंवा पाकिस्तान-आयर्लंड यापैकी एक जरी सामना रद्द झाल्यास यूएस संघ पात्र ठरेल. या दोन सामन्यांमध्ये पाऊस पडणार नाही आणि विजय-पराजय असा निकाल लागेल, अशी आशा पाकिस्तान संघ आणि चाहत्यांना करावी लागेल. पावसामुळे सामना वाहून गेल्यास पाकिस्तानी संघ आणि चाहत्यांच्या स्वप्नावर पाणी पडेल.

T20 World Cup 2024 (BAN vs NED) : बांगलादेशच्या नेदरलँड्सवरील विजयामुळे ‘या’ संघाचे भंगले स्वप्न, सुपर 8 च्या शर्यतीतून बाहेर…

पाकिस्तानसोबत ‘हे’ संघही पडतील बाहेर 

2024 टी-20 विश्वचषकातील सुपर-8 सामने 19 जूनपासून खेळवले जाणार आहेत. जर यूएसए संघ आज जिंकला तर तो सुपर-8 मध्ये प्रवेश करेल. आजचा सामना पावसामुळे रद्द झाला तरीही अमेरिकन संघ पुढच्या फेरीत पोहोचेल. अशा स्थितीत पाकिस्तान, कॅनडा आणि आयर्लंड बाहेर होतील.

फ्लोरिडामध्ये पुरासारखी परिस्थिती

फ्लोरिडामध्ये गेल्या अनेक दिवसांपासून मुसळधार पाऊस पडत आहे. आजही येथे पावसाची शक्यता आहे. येथे आधीच पुरासारखी परिस्थिती आहे. पावसामुळे रस्त्यावर पाणी तुंबले आहे. 11 जून रोजी येथे श्रीलंका आणि नेपाळ यांच्यातील सामना होणार होता. मात्र, पावसामुळे तो रद्द करण्यात आला. या सामन्यात नाणेफेकही होऊ शकली नव्हती.