Ashish Shelar | राज्याचे सांस्कृतिक कार्यमंत्री आशिष शेलार हे काल पुणे दौऱ्यावर आले होते. त्यांनी पुण्यातील विविध कार्यक्रमांना हजेरी लावली होती. श्रीमंत मल्हारराव होळकर आणि पुण्यश्लोक अहिल्यादेवी होळकर यांच्या त्रिशताब्दी जयंती वर्षानिमित्त सांस्कृतिक कार्य विभागाच्या वतीने आयोजित पुण्यश्लोक फाऊंडेशन निर्मित पुण्यश्लोक या ऐतिहासिक महानाट्याच्या पहिल्या प्रयोगाच्या उद्घाटनासाठी शेलार आले होते. या कार्यक्रमातून शेलार यांनी महाराष्ट्र नवनिर्मान सेनेचे अध्यक्ष राज ठाकरे यांच्यावर टीका केली.

गेल्या काही दिवसांपूर्वी राज ठाकरे यांनी खोके घेणारे सगळे विधानसभेत आणि विधानपरिषदेत बसले आहेत, अशी टीका केली होती. राज यांनी केलेल्या टीकेला मंत्री आशिष शेलार यांनी प्रत्युतर दिले आहे. अस्तित्व दाखवून देण्यासाठी या पद्धतीने विधाने करून घेण्याचा हा प्रकार आहे. राज्यातील जनतेला ते सर्व कळाले आहे. राज्यातील जनतेने निवडून दिलेले विधानसभेत किंवा विधानपरिषदेत बसले आहेत. ते सर्वच पक्षांचे आहेत. मात्र, ज्यांना लोक निवडून देत नाही ते विधानसभेत न जाता विधान करण्याच्या कार्यक्रमात बसतात, अशी टीका शेलार यांनी यावेळी बोलताना केली.

पुण्यश्लोक अहिल्यादेवी होळकर यांच्या स्वाभिमानी आणि आदर्श वाटचालीचे तेजस्वी दर्शन पुण्यश्लोक या ऐतिहासिक महानाट्याच्या माध्यमातून लोकांसमोर येईल, असे त्यांनी यावेळी बोलताना सांगितले. या कार्यक्रमाला माजी आमदार रामहरी रुपनवर, विधानपरिषद सभापती राम शिंदे यांच्या पत्नी आशा, अहिल्याबाई होळकर यांचे वंशज स्वप्नील राजे होळकर, अमरजित राजे बारगळ, नितीन वाघमोडे यावेळी उपस्थित होते.

कलाकेंद्राच्या नावाखाली डान्सबार: सुरेखा पुणेकर

कलाकेंद्राच्या नावाखाली डान्सबार सुरू असल्याची खंत लावणीसम्राज्ञी सुरेखा पुणेकर यांनी व्यक्त केली होती. यावर बोलताना आशिष शेलार म्हणाले त्यांनी माझ्याकडेही तक्रार केली आहे. यासंदर्भात समोर आलेली माहिती खूप धक्कादायक आहे. त्यामुळे लोकनाट्य, लोकसंगीत सोडून अन्य काही प्रकार होत असतील तर कारवाई करावी, अशा सूचना जिल्हाधिकाऱ्यांना दिल्या असल्याचे त्यांनी यावेळी बोलताना सांगितले.