Riteish and Genelia :  दिल्लीतील जंतरमंतरवर गेल्या काही दिवसांपासून सुरू असलेल्या आंदोलनाच्या पार्श्वभूमीवर ‘कॉकरोच जनता पार्टी’ने सोमवारी, २० जुलै रोजी ‘चलो संसद’ची हाक दिली. त्यासाठी संसदेच्या दिशेने निघालेल्या आणि जंतरमंतरवरील आंदोलकांवर दिल्ली पोलीसांनी बेछूट लाठीमार केला.

ज्यात अनेक विद्यार्थी जखमी झालेत. मात्र आजही शिक्षणमंत्री धर्मेंद्र प्रधान यांच्या राजीनाम्याच्या मागणीवर सीजेपी आंदोलक ठाम आहेत. दरम्यान, अनेक सेलिब्रिटींनी विद्यार्थ्यांच्या या आंदोलनाला पाठींबा दिला. अशातच आता रितेश देशमुख आणि जिनेलिया देशमुख यांनी विद्यार्थ्यांच्या आंदोलनाला पाठींबा दिला आहे.

रितेश देशमुखनं आपल्या अधिकृत इन्स्टाग्राम हँडलवरुन स्टोरी पोस्ट करत तरूणांच्या आंदोलनाला जाहीर पाठींबा दिला. त्याने पोस्ट करत म्हटले की, “आम्ही आपल्या देशातील तरुणांच्या पाठीशी खंबीरपणे उभे आहोत. त्यांचा आवाज मोठ्यानं, स्पष्टपणे आणि निर्भयपणे ऐकला गेला पाहिजे, हे तरुणच आपल्या लोकशाहीचं स्पंदन आणि आपल्या राष्ट्राच्या भविष्याचे खरे शिल्पकार आहेत.”

“चला, आपण त्यांचं ऐकुयात त्यांना पाठिंबा देऊया आणि त्यांना सक्षम करूया… आपल्या तरुणांची ऊर्जा, धैर्य आणि स्वप्न आपण घडवू इच्छित असलेल्या भारताला आकार देतील, जय हिंद,” असं रितेश देशमुखनं आपल्या पोस्टमध्ये आवाहनही केले आहे. या पोस्टच्या शेवटी रितेशनं ‘जिनेलिया आणि रितेश देशमुख’ असं लिहिले आहे.

दरम्यान, विद्यार्थ्यांच्या आंदोलनाला देशभरातून अनेकांचा पाठिंबा मिळत आहे. रितेशसह अनेक मराठी कलाकारांनीही सोशल मीडियाच्या माध्यमातून विद्यार्थ्यांच्या आंदोलनावर भाष्य केले. ज्येष्ठ अभिनेत्री शबाना आझमी, अभिनेते नसरुद्दीन शाह, अभिनेते प्रकाश राज यांच्यासोबतच अनेक सेलिब्रिटी आंदोलनात प्रत्यक्ष सहभागी देखील झाले आहेत.

हेही वाचा:  

Abhijit Dipke : “मी सर्व समर्थकांची माफी मागतो”; अभिजीत दिपकेंनी आंदोलनाच्या दुसऱ्या दिवशी केलं आवाहन…