Usha Uthup : बॉलिवूड संगीतविश्वात स्वतःची वेगळी ओळख निर्माण करणे ही सोपी गोष्ट नाही. अनेक कलाकारांना प्रसिद्धी मिळवण्यासाठी वर्षानुवर्षे संघर्ष करावा लागतो. मात्र, काही कलाकारांची वेगळी ओळखच त्यांच्या यशाचे सर्वात मोठे कारण ठरते. अशाच कलाकारांपैकी एक म्हणजे प्रसिद्ध गायिका उषा उत्थुप.

आपल्या दमदार, भारदस्त आणि वैशिष्ट्यपूर्ण आवाजाने त्यांनी भारतीय संगीतविश्वात स्वतःचे अढळ स्थान निर्माण केले आहे. विशेष म्हणजे, ज्या आवाजामुळे आज त्या जगभर प्रसिद्ध आहेत, त्याच आवाजामुळे एकेकाळी त्यांना शाळेतील संगीत वर्गातून बाहेर काढण्यात आले होते. नेमकं काय घडलं होतं ते जाणून घेऊयात.

मुंबईत झाला जन्म, घरातूनच मिळाले संगीताचे धडे

उषा उत्थुप यांचा जन्म ८ नोव्हेंबर १९४७ रोजी मुंबईतील एका तमिळ कुटुंबात झाला. त्यांचे बालपण संगीताच्या वातावरणात गेले. त्यांच्या आई-वडिलांना भारतीय शास्त्रीय संगीताबरोबरच पाश्चात्त्य संगीताचीही आवड होती. त्यामुळे लहानपणापासूनच विविध प्रकारची गाणी ऐकण्याची आणि संगीताची आवड त्यांच्यात निर्माण झाली आणि त्यांनीही हीच कला आत्मसात केली.

जड आवाजामुळे संगीत वर्गातून काढले!

उषा यांनी मुंबईतील एका प्रसिद्ध महाविद्यालयात शिक्षण घेतले आहे. शालेय जीवनापासूनच त्यांना गाण्याची आवड होती. मात्र, त्यांचा आवाज इतर मुलींपेक्षा खूप वेगळा आणि भारदस्त होता. याच कारणामुळे एकदा त्यांना शाळेतील संगीत वर्गातून बाहेर काढले होते. या प्रसंगानंतर उषा यांनी संगीताची साथ सोडली नाही. वयाच्या ९ व्या वर्षापासून त्यांनी गाणे गाण्यास सुरुवात केल्याचे सांगितले जाते.

नाइटक्लबमधून सुरू झाली व्यावसायिक कारकीर्द

उषा उत्थुप यांच्या व्यावसायिक संगीत कारकिर्दीला १९६९ मध्ये चेन्नई येथून सुरुवात झाली. तेथील ‘नाइन जेम्स’ या नाइटक्लबमध्ये त्यांनी गायन करण्यास सुरुवात केली. त्यांच्या पहिल्याच कार्यक्रमाला प्रेक्षकांचा उत्स्फूर्त प्रतिसाद मिळाला. त्यामुळे क्लबच्या मालकाने त्यांना सलग आठवडाभर कार्यक्रम सादर करण्याची संधी दिली. यानंतर त्यांनी कोलकाता, दिल्ली आणि मुंबई येथील विविध नाइटक्लबमध्ये आपल्या आवाजाची जादू दाखवली.

बॉलिवूडमध्येही उमटवली आवाजाची छाप

१९७० मध्ये ‘बॉम्बे टॉकी’ या चित्रपटातून पार्श्वगायनाच्या क्षेत्रातून त्यांनी बॅालिवूडमध्ये पदार्पण केले. त्यानंतर ‘हरे रामा हरे कृष्णा’ या गाण्यासाठी त्यांनी पार्श्वगायण केले. आर. डी. बर्मन आणि बप्पी लाहिरी यांसारख्या दिग्गज संगीतकारांसोबत काम करण्याची संधी त्यांना मिळाली. ‘रंभा हो हो हो’, ‘मेहबूबा मेहबूबा’ आणि ‘डार्लिंग’ त्यांच्या यांसारखी गाणी हिट ठरली आणि संगीत क्षेत्रात त्यांच्या नावाचा दबदबा निर्माण झाला.

आवाजाची खिल्ली उडवणाऱ्यांनाच दिले यशातून उत्तर

एकेकाळी आपल्या जड आवाजामुळे टीकेचा सामना करणाऱ्या उषा उत्थुप यांनी त्याच आवाजाला आपली सर्वात मोठी ताकद बनवले. भारतासह परदेशातील अनेक कार्यक्रमांमधून त्यांनी चाहत्यांची मने जिंकली. त्यांच्या संगीत क्षेत्रातील उल्लेखनीय योगदानाची दखल घेत त्यांना २०११ मध्ये पद्मश्री आणि २०२४ मध्ये पद्मभूषण या प्रतिष्ठित पुरस्कारांनी सन्मानित करण्यात आले.

Chitale Bandhu: ऑनलाइन मिठाई विक्रीचा बनाव