Petrol – Diesel: देशात पेट्रोल आणि डिझेलची कोणतीही कमतरता नाही. काही किरकोळ विक्री केंद्रांवर इंधनाचा तुटवडा जाणवत असला तरी, तो प्रादेशिक मागणी-पुरवठ्यातील तफावत आणि बदलत्या विक्री पद्धतींमुळे स्थानिक आणि तात्पुरता असल्याचे देशातील सर्वात मोठी तेल कंपनी, इंडियन ऑइल कॉर्पोरेशनने (आयओसी) सांगितलेे.

कापणीच्या हंगामात डिझेलच्या वापरात होणारी हंगामी वाढ, जिथे किरकोळ दर तुलनेने जास्त होते अशा खासगी पंपांवरून ग्राहकांचे स्थलांतर आणि सार्वजनिक क्षेत्रातील आउटलेट्सवर कंपन्याकडूद खरेदीत झालेली वाढ, यांमुळे काही विशिष्ट आउटलेट्सवर मागणी वाढली आहे.

1 ते 22 मे दरम्यान पेट्रोलची विक्री वार्षिक तुलनेत 14 टक्क्यांनी वाढली, तर डिझेलची विक्री सुमारे 18 टक्क्यांनी वाढली. हे देशभरात मागणीत होत असलेल्या वाढीचे द्योतक आहे, जी कंपनी पूर्ण करत आहे.

त्यांच्या 42,000 हून अधिक इंधन केंद्रांच्या नेटवर्कमधील अतिशय कमी केंद्रांवर पुरवठ्यात व्यत्यय आला होता. तर बहुतांश पंपांवरील साठा आणि पुरवठा सामान्य आणि पुरेसा होता.

सरकारी मालकीच्या तेल विपणन कंपन्यांनी देशभरात इंधनाचा पुरेसा साठा कायम ठेवला आहे आणि तुरळक व्यत्यय दूर करून अखंड पुरवठा सुनिश्चित करण्यासाठी उपाययोजना करत आहेत.

अनावश्यक खरेदी टाळावी –
देशभरात इंधनाची अखंड उपलब्धता कायम ठेवण्याच्या आपल्या वचनबद्धतेचा पुनरुच्चार करत, कंपनीने ग्राहकांना घाबरून खरेदी करणे टाळण्याचे आवाहनही केले. कंपनी परिस्थितीवर बारकाईने लक्ष ठेवून आहे आणि या तुरळक घटनांना हाताळण्यासाठी व ग्राहकांना इंधनाचा अखंड पुरवठा सुनिश्चित करण्यासाठी योग्य उपाययोजना करत आहे.