Indapur News : आखाती देशांतील युद्धजन्य परिस्थितीचा परिणाम देशांतर्गत गॅसपुरवठ्यावर दिसू लागला आहे. याच संधीचा फायदा घेऊन इंदापूर तालुक्यात गॅसचा काळाबाजार करणाऱ्यांविरुद्ध आता प्रशासनाने कंबर कसली आहे. गॅसचा अवैध साठा किंवा काळाबाजार करणाऱ्यांची गय केली जाणार नाही, दोषी आढळल्यास थेट गुन्हे दाखल करून कठोर कायदेशीर कारवाई केली जाईल, असा इशारा सर्व गॅस एजन्सीना इंदापूर तालुक्याचे पुरवठा निरीक्षण अधिकारी सपन गडमवार यांनी दिला आहे. याशिवाय नागरिकांनी कोणत्याही अफवांवर विश्वास ठेवू नये, इंदापूर तहसीलदारांच्या अध्यक्षतेखाली एक विशेष टीम तयार करण्यात आली असून तालुक्यातील गॅस आणि इंधन पुरवठा सुरळीत ठेवण्यासाठी सर्व गॅस एजन्सीना कडक सूचना देण्यात आल्या अससल्याचेही गडमवार यांनी स्पष्ट केले आहे. प्रशासकीय बैठकीत कडक सूचना या संदर्भात इंदापूर तहसील कार्यालयात एक महत्त्वाची बैठक पार पडली. या बैठकीला पुरवठा निरीक्षक अधिकारी सपन गडमवार, तुषार शिंदे, लहू जाधव, काळे मॅडम यांच्यासह पोलीस प्रशासन, पुरवठा विभाग आणि गॅस कंपन्यांचे अधिकारी उपस्थित होते.
