Indapur : १९७२ च्या दुष्काळापेक्षाही यंदाचे संकट मोठे
Indapur : केंद्राकडून मदत मिळण्यासाठी निश्चित नियम व निकषांची पूर्तता करावी लागते. महाराष्ट्र सरकारने मदतीसंदर्भातील अहवाल केंद्राकडे सादर केला आहे. एनडीआरएफच्या माध्यमातून मदतीच्या रकमेत वाढ करण्यात आली असून, वाढीव निकषांनुसार अहवालात आवश्यक दुरुस्ती करून तो परिपूर्ण करण्याची कार्यवाही सुरू आहे.

इंदापूर : राज्यात यंदा पावसाने दिलेली ओढ, पावसातील मोठा खंड आणि एल निनोच्या संकटामुळे शेतीसमोर गंभीर परिस्थिती निर्माण झाली आहे. १९७२ च्या दुष्काळापेक्षाही यंदाचे संकट मोठे असून, सिंचन सुविधा वाढूनही रब्बी हंगामातील पेरणी त्या काळापेक्षा कमी झाली आहे. आगामी जून २०२७ पर्यंत या संकटाचा सामना करावा लागू शकतो. मात्र, दुष्काळ कितीही गंभीर असला तरी राज्य सरकार शेतकऱ्यांना वाऱ्यावर सोडणार नाही. त्यांना जास्तीत जास्त मदत देण्यासाठी शासन सर्वतोपरी प्रयत्न करेल, अशी ग्वाही राज्याचे कृषिमंत्री दत्तात्रय भरणे यांनी दिली.
भरणेवाडी (ता. इंदापूर) येथे पत्रकारांशी संवाद साधताना त्यांनी राज्यातील दुष्काळी परिस्थितीसह शेतकऱ्यांना मिळणारी मदत, अतिवृष्टीग्रस्तांचे अनुदान, मराठा विद्यार्थ्यांना कृषी शिक्षणातील सवलती आणि बारामती विमानतळाच्या निधीविषयी भाष्य केले. अतिवृष्टीग्रस्त शेतकऱ्यांच्या मदतीबाबत बोलताना कृषिमंत्री भरणे म्हणाले, केंद्र सरकारने मदतीच्या बाबतीत हात आखडता घेतलेला नाही.
केंद्राकडून मदत मिळण्यासाठी निश्चित नियम व निकषांची पूर्तता करावी लागते. महाराष्ट्र सरकारने मदतीसंदर्भातील अहवाल केंद्राकडे सादर केला आहे. एनडीआरएफच्या माध्यमातून मदतीच्या रकमेत वाढ करण्यात आली असून, वाढीव निकषांनुसार अहवालात आवश्यक दुरुस्ती करून तो परिपूर्ण करण्याची कार्यवाही सुरू आहे. त्यामुळे अतिवृष्टीग्रस्त शेतकऱ्यांना मदत मिळण्याच्या दृष्टीने शासन प्रयत्नशील असल्याचे त्यांनी सांगितले.
ओबीसी समाजातील विद्यार्थ्यांना ज्या प्रकारच्या शैक्षणिक सवलती दिल्या जातात, त्याच धर्तीवर मराठा समाजातील विद्यार्थ्यांनाही राज्यातील चारही कृषी विद्यापीठांमध्ये सवलती देण्यात येणार असल्याचे कृषिमंत्री भरणे यांनी स्पष्ट केले.
बारामती विमानतळाच्या नियोजनात अजितदादांची दूरदृष्टी
बारामती विमानतळाच्या निधी आणि अंदाजपत्रकाबाबत बोलताना भरणे यांनी दिवंगत उपमुख्यमंत्री अजित पवार यांच्या नियोजनाचा उल्लेख केला. विमानतळासाठी कोणत्या बाबी आवश्यक आहेत, याचे अंदाजपत्रक अजित पवार यांनी हयात असतानाच तयार केले होते. खासदार सुप्रिया सुळे यांनी मांडलेल्या भूमिकेचा संदर्भ देत, या प्रक्रिया यापूर्वीच पूर्ण झाल्या असत्या तर आजची वेळ आली नसती, असे भरणे यांनी नमूद केले.





