पिंपरी  – सायलेन्सर बदलल्यामुळे बुलेटस्वारावर वाहतूक पोलिसांनी एकदा कारवाई केली असल्यास आणि पुन्हा दुसऱ्यांदा बुलेटस्वाराने सायलेन्सर बदलल्याचे आढळल्यास त्याची बुलेट जप्त केली जाणार आहे. तसेच गुन्हा दाखल करून न्यायालयात पाठविणार, असल्याची माहिती वाहतूक विभागाचे पोलीस आयुक्‍त आनंद भोईटे यांनी दै. “प्रभात’शी बोलताना दिली.

बुलेटचा मूळ सायलेन्सर बदलून मोठ्या आवाजाचे सायलेन्सर लावण्याचे फॅड सध्या तरुणाईमध्ये आहे. तसेच काही टवाळखोर बुलेटस्वाराकडून फटाक्‍यासारखा मोठा आवाजही केला जातो. यामुळे ज्येष्ठ नागरिक, रुग्ण, यांना याचा त्रास तर होतोच, परंतु फटाक्‍याच्या या आवाजामुळे इतर वाहन चालकही बिचकतात. अशा बुलेटस्वारांवर पोलिसांकडून कारवाई व्हावी, अशी नागरिकांची मागणी होती.

या मागणीची दखल घेत तत्कालीन पोलीस आयुक्‍त कृष्ण प्रकाश यांनी वाहतूक पोलिसांना सायलेन्सर बदलणाऱ्या बुलेटस्वारांवर कारवाई आदेश दिले होते. सुरुवातीला वाहतूक पोलिसांनी सायलेन्सर बदलणाऱ्या बुलेटराजांवर दंडात्मक कारवाई केली. मात्र त्यानंतरही बुलेटला मोठ्या आवाजाचे सायलेन्सर बसविण्याचा उद्योग टवाळखोरांकडून सुरू होता. बुलेटला मोठ्या आवाजाचे सायलेन्सर विक्री करणारे दुकानदार आणि मोठ्या आवाजाचे सायलेन्सर बसवून देणारे गॅरेज चालक यांनाही पोलिसांनी नोटीस बजावत कारवाईचे संकेत दिले. यामुळे सायलेन्सर बदलण्याचे प्रमाण कमी झाले.

हजारो सायलेन्सर जप्त
कारवाईच्या दुसऱ्या मोहिमेत दंडात्मक कारवाई सोबतच बुलेटचा सायलेन्सर काढून घेण्याची मोहीम पोलिसांनी हाती घेतली. या कारवाईत हजारो सायलेन्सर वाहतूक पोलिसांकडे जमा झाले. पोलीस आयुक्‍त कृष्ण प्रकाश यांची बदली झाल्यावर पुन्हा बुलेटस्वारांनी मोठ्या आवाजाचे सायलेन्सर बसविण्यास सुरवात केली. आजही शहरात मोठ्या आवाजाचे सायलेन्सर लावून बुलेटस्वार फिरत आहेत. याची गंभीर दखल वाहतूक पोलिसांनी घेतली आहे. बुलेटस्वारांवर वाहतूक पोलिसांनी गुन्हे दाखल करण्यास सुरवात केली. यामध्ये ध्वनी प्रदुषणाचेही कलम लावण्यात येत आहे.

पोलिसांचा आक्रमक पवित्रा
पोलिसांकडून सातत्याने कारवाई होत असतानाही पोलिसांच्या कारवाईला काही टवाळखोर जुमानत नसल्याचे दिसून आले. यामुळे वाहतूक पोलिसांनी आता आक्रमक पवित्रा घेण्यास सुरवात केली आहे. जर यापूर्वी मोठ्या आवाजाचे सायलेन्सर लावण्याची कारवाई संबंधित बुलेटवर झाली असेल तर यावेळी बुलेटच जप्त करण्यात येणार आहे, अशी माहिती वाहतूक विभागाचे पोलीस उपायुक्‍त आनंद भोईटे यांनी दिली. तसेच न्यायधिशांनाही अशा बुलेटस्वारांवर कडक कारवाई करण्याची विनंती वाहतूक पोलिसांच्यावतीने न्यायालयात केली जाणार आहे.

=====================