Ramayana Trailer: रणबीर कपूर, साई पल्लवी आणि यश यांच्या प्रमुख भूमिका असलेला बहुचर्चित ‘रामायण’ चित्रपट पुन्हा एकदा चर्चेत आला आहे. या चित्रपटाच्या ट्रेलरची चाहते अनेक दिवसांपासून आतुरतेने वाट पाहत होते. आता त्यांची प्रतीक्षा संपणार असून, निर्मात्यांनी ट्रेलरच्या प्रदर्शनाची नवी तारीख जाहीर केली आहे.

चित्रपटाचे निर्माते नमित मल्होत्रा यांनी सोशल मीडियावर पोस्ट शेअर करत सांगितले की, ‘रामायण’चा ट्रेलर ३० जुलै रोजी ब्रह्ममुहूर्तावर म्हणजेच पहाटे ४.१५ वाजता प्रदर्शित केला जाणार आहे. या घोषणेनंतर सोशल मीडियावर चाहत्यांमध्ये प्रचंड उत्साह पाहायला मिळत आहे.

याआधी हा ट्रेलर २४ जुलै रोजी प्रदर्शित होणार होता. मात्र, देशभरात सुरू असलेल्या विद्यार्थी आंदोलनांच्या पार्श्वभूमीवर निर्मात्यांनी ट्रेलरचे प्रदर्शन पुढे ढकलण्याचा निर्णय घेतला होता. आता नव्या तारखेची घोषणा झाल्याने चाहते पुन्हा एकदा ट्रेलरच्या प्रतीक्षेत आहेत.

निर्मात्यांच्या या पोस्टवर अनेक कलाकारांनीही प्रतिक्रिया दिल्या आहेत. अभिनेता हृतिक रोशनने “Can’t Wait” अशी कमेंट करत आपली उत्सुकता व्यक्त केली. तर चित्रपटात लक्ष्मणाची भूमिका साकारणारा अभिनेता रवि दुबे याने हात जोडण्याचा इमोजी पोस्ट करून आनंद व्यक्त केला.

दरम्यान, काही माध्यमांच्या वृत्तानुसार ‘रामायण’चा ट्रेलर ‘स्पायडर-मॅन: ब्रँड न्यू डे’ या हॉलिवूड चित्रपटासोबत सिनेमागृहांमध्येही दाखवला जाऊ शकतो. या चित्रपटाचे जागतिक वितरण सोनी पिक्चर्स करत असल्याने ‘रामायण’ला आंतरराष्ट्रीय स्तरावरही मोठ्या प्रमाणात प्रसिद्धी मिळण्याची शक्यता व्यक्त केली जात आहे.

‘रामायण’ हा भारतीय चित्रपटसृष्टीतील सर्वात महत्त्वाकांक्षी प्रकल्पांपैकी एक मानला जात आहे. माध्यमांतील वृत्तांनुसार या चित्रपटाचा एकूण खर्च सुमारे ४,००० कोटी रुपये असल्याचे सांगितले जात आहे. मात्र, निर्मात्यांकडून या बजेटबाबत अधिकृत माहिती देण्यात आलेली नाही.

हा चित्रपट दोन भागांमध्ये प्रदर्शित होणार आहे. पहिला भाग दिवाळी २०२६ मध्ये प्रेक्षकांच्या भेटीला येणार असून, दुसरा भाग दिवाळी २०२७ मध्ये प्रदर्शित केला जाणार आहे. त्यामुळे हा चित्रपट पुढील दोन वर्षे प्रेक्षकांच्या चर्चेचा विषय ठरणार आहे.

चित्रपटाच्या स्टारकास्टचीही सध्या जोरदार चर्चा सुरू आहे. यात रणबीर कपूर भगवान श्रीराम यांच्या भूमिकेत दिसणार आहेत, तर साई पल्लवी माता सीतेची भूमिका साकारणार आहे. अभिनेता यश रावणाच्या भूमिकेत झळकणार असून, रवि दुबे लक्ष्मणाची भूमिका साकारत आहेत. याशिवाय सनी देओल हनुमानाच्या भूमिकेत दिसणार आहेत. अरुण गोविल राजा दशरथ यांच्या भूमिकेत झळकतील, तर रकुल प्रीत सिंह आणि विवेक ओबेरॉय यांच्याही महत्त्वाच्या भूमिका या चित्रपटात असणार आहेत.

काही दिवसांपूर्वी दिल्लीतील भारत मंडपम येथे चित्रपटाचा भव्य कार्यक्रम आयोजित करण्यात आला होता. या कार्यक्रमात चित्रपटातील कलाकारांची अधिकृत ओळख करून देण्यात आली. तसेच उपस्थितांना ट्रेलरची खास झलक दाखवण्यात आली होती. रणबीर कपूरचा भगवान श्रीराम यांच्या वेशातील पहिला लूकही याच कार्यक्रमानंतर समोर आला आणि त्याला चाहत्यांकडून मोठा प्रतिसाद मिळाला.

भव्य कथा, दमदार कलाकार, अत्याधुनिक व्हिज्युअल इफेक्ट्स आणि मोठ्या बजेटमुळे ‘रामायण’ हा चित्रपट भारतीय सिनेसृष्टीतील सर्वाधिक चर्चेत असलेल्या चित्रपटांपैकी एक ठरला आहे. आता ३० जुलै रोजी प्रदर्शित होणाऱ्या ट्रेलरमध्ये नेमकं काय पाहायला मिळणार, याकडे सर्वांचे लक्ष लागले आहे.