Bihar CMO Nitish Kumar । बिहारचे मुख्यमंत्री नितीश कुमार यांच्या कार्यालयाला बॉम्बची धमकी मिळाली आहे. त्यानंतर सुरक्षा यंत्रणा विभागात खळबळ उडाली आहे. कार्यालय परिसरात पोलिसांनी सुरक्षा वाढवली असून हाय अलर्ट जारी केला आहे. एटीएस या संपूर्ण प्रकरणाचा तपास करत आहे.

याप्रकरणी एसएचओ संजीव कुमार यांच्या माहितीनुसार सचिवालय पोलिस ठाण्यात गुन्हा दाखल करण्यात आला. पोलीस सूत्रांनी दिलेल्या माहितीनुसार, 16 जुलै रोजी सीएमओच्या अधिकृत ईमेल आयडीवर सीएमओला बॉम्बने उडवण्यात येणार असल्याचा संदेश आला होता. हा संदेश अल कायदा गटाच्या नावाने पाठवण्यात आला होता.

मिळालेल्या माहितीनुसार, ईमेल करणाऱ्याने [email protected] या आयडीवरून मेल पाठवला होता. सध्या पोलीस संबंधित मेल आयडीची माहिती घेण्याचा प्रयत्न करत आहेत. यापूर्वी, पोलिसांनी BNS 2023 च्या कलम 351 (4) (3) आणि 66 (F) IT कायद्यानुसार अज्ञातांविरुद्ध गुन्हा दाखल केला आहे. या संपूर्ण प्रकरणाचा तपास सचिवालय पोलीस ठाण्याचे पोलीस करत आहेत.

मुख्यमंत्र्यांचे कार्यालय बॉम्बने उडवून देण्याची धमकी देणाऱ्या ई-मेल प्रकरणी बिहार पोलिसांनी गुन्हा दाखल केला आहे. सचिवालय पोलीस ठाण्याचे निरीक्षक संजीव कुमार यांच्या वक्तव्याच्या आधारे नोंदवलेल्या एफआयआरनुसार, 16 जुलै रोजी मुख्यमंत्री कार्यालयाला ई-मेल पाठवण्यात आला होता.

कुमार म्हणाले की ई-मेल पाठवणाऱ्याने अल-कायदाशी संबंधित असल्याचा दावा केला होता आणि मुख्यमंत्री कार्यालयाच्या संकुलात बॉम्बस्फोट करण्याची धमकी दिली होती. पाटणाचे वरिष्ठ पोलीस अधीक्षक (एसएसपी) राजीव मिश्रा म्हणाले की, हे जुने प्रकरण आहे. आम्ही तपासानंतर 2 ऑगस्ट 2024 रोजी एफआयआर नोंदवला.

बिहार पोलिसांच्या स्टेट क्राईम रेकॉर्ड ब्युरोच्या वेबसाइटवर उपलब्ध असलेल्या एफआयआरनुसार, भारतीय न्याय संहिता आणि आयटी कायद्याच्या संबंधित कलमांखाली अज्ञात व्यक्तींविरुद्ध गुन्हा दाखल करण्यात आला आहे.

यापूर्वी पाटणा विमानतळालाही बॉम्बची धमकी मिळाली होती. यानंतर विमानतळाची सुरक्षा वाढवण्यात आली. ही धमकीही ईमेलद्वारे पाठवण्यात आली होती. मात्र, त्यावेळी अशी कोणतीही घटना घडली नव्हती.