वाघोली : महाराष्ट्राची माती ही जिद्द, ताकद आणि परंपरेचा संगम असून कुस्ती हा आपल्या संस्कृतीचा अविभाज्य भाग आहे. प्राचीन काळापासून कुस्तीने महाराष्ट्राला राष्ट्रीय व आंतरराष्ट्रीय स्तरावर वेगळी ओळख मिळवून दिली आहे. राज्यभरातील नामांकित मल्लांच्या सहभागामुळे ही परंपरा अधिक बळकट होत असल्याचे प्रतिपादन विधानपरिषद सभापती राम शिंदे यांनी केले. वाघोली येथील स्व. अजितदादा पवार क्रीडानगरी, बाजारतळ येथे आयोजित 68 व्या महाराष्ट्र केसरी कुस्ती स्पर्धेला त्यांनी भेट दिली. यावेळी बोलताना शिंदे म्हणाले, कुस्ती हा केवळ खेळ नसून शिस्त, सहनशीलता आणि विजयाची जिद्द शिकवणारा क्रीडा प्रकार आहे. अखाड्यातील प्रत्येक डाव जीवनातील संघर्ष आणि यशाचे धडे देणारा असतो. खेळाडूंनी जिंकणे-हरणे यापेक्षा सहभाग, क्रीडाभाव, सातत्य आणि प्रामाणिकपणाला प्राधान्य द्यावे, असे आवाहन त्यांनी केले. मैदानावर दाखवलेली मेहनत आणि संघभावना हीच भविष्यातील यशाची भक्कम पायाभरणी ठरते, असेही ते म्हणाले. स्पर्धेच्या उत्कृष्ट आयोजनाबद्दल आयोजक रामकृष्ण सातव पाटील तसेच महाराष्ट्र राज्य कुस्तीगीर संघाचे त्यांनी अभिनंदन केले. सहभागी सर्व कुस्तीपटूंना शुभेच्छा देत भविष्यात महाराष्ट्राचे नाव राष्ट्रीय व आंतरराष्ट्रीय स्तरावर अधिक उज्ज्वल व्हावे, अशी अपेक्षा त्यांनी व्यक्त केली. याप्रसंगी राज्यमंत्री मेघनाताई बोर्डीकर, खासदार श्रीरंग आप्पा बारणे, आमदार माऊली कटके, आमदार नारायण आबा पाटील, माजी खासदार तथा अध्यक्ष महाराष्ट्र राज्य कुस्तीगीर संघ रामदास तडस, माजी आमदार संजय भेगडे, सामाजिक कार्यकर्ते प्रभाकर मोहोळ, जि.प. सदस्य राजूकाका गुंड, एसीपी तथा राष्ट्रकुल पदक विजेते राहुल आवारे, किसान मोर्चा भाजपाचे प्रदेशाध्यक्ष रामकृष्ण वेताळ, माजी प्रदेशाध्यक्ष गणेश भेगडे, प्रदेश उपाध्यक्ष दादासाहेब सातव, कार्याध्यक्ष संदीप भोंडवे, नगरसेवक अनिल सातव, पुणे शहर भाजपाचे सचिव केतन जाधव, नगरसेविका पल्लवीताई जावळे, पुणे कुस्तीगीर संघाचे अध्यक्ष पै. मेघराज कटके तसेच आयोजक रामकृष्ण सातव पाटील उपस्थित होते. हेही वाचा : महाराष्ट्र केसरीचा ‘फायनल’ थरार! सिकंदर शेख, महेंद्र गायकवाड, हर्षवर्धन सदगीर, जय पाटील अंतिम फेरीत दाखल
