लोणी काळभोर, (वार्ताहर) – आठवीच्या विद्यार्थिनीवर लैंगिक अत्याचार करून मागील आठ दिवसांपासून फरार असणार्या रिक्षाचालकाला लोणी काळभोर पोलिसांनी कुंजीरवाडी (ता. हवेली) बाजार मैदानातून सोमवारी (दि. 12) रात्री नऊ वाजण्याच्या सुमारास मोठ्या शिताफीने बेड्या ठोकल्या आहेत. विजय वसंत जाधव (वय 24, रा. पाषाणकर बाग, लोणी काळभोर) असे अटक करण्यात आलेल्या आरोपीचे नाव आहे. याप्रकरणी 14 वर्षीय अल्पवयीन मुलीने लोणी काळभोर पोलीस ठाण्यात फिर्याद दिली आहे. पीडित मुलगी ही लोणी काळभोर परिसरातील एका शाळेत इयत्ता आठवीत शिक्षण घेत आहे. या मुलीला मंगळवारी (दि. 6) सकाळी दहा वाजण्याच्या सुमारास नेहमीप्रमाणे शाळेत चालली होती. तिला खोटे सांगून रिक्षात नेत पीडितेसोबत लगट करून बळजबरी करू लागला; मात्र आरोपीच्या तावडीतून सुटण्यासाठी पीडिता जोरजोरात ओरडू लागली. तेव्हा आरोपी घटनास्थळावरून पळून गेला. याप्रकरणी लोणी काळभोर पोलीस ठाण्यात आरोपी विजय जाधव याच्यावर विनयभंगासह बाललैंगिक अत्याचार कायदा कलमान्वये गुन्हा दाखल करण्यात आला आहे. गुन्ह्याचा तपास करीत असताना, पथकातील पोलीस कर्मचाऱी अजिंक्य जोजारे यांना आरोपी विजय जाधव हा कुंजीरवाडी (ता. हवेली) येथील बाजार मैदानात येणार आहे, अशी माहिती एका खबर्यामार्फत मिळाली होती. पोलिसांनी या ठिकाणी सापळा रचून आरोपी विजय जाधव याला मोठ्या शिताफीने बेड्या ठोकल्या आहेत. विजय जाधव याने वरील गुन्ह्याची कबुली पोलिसांना दिली आहे. तर पोलिसांनी गुन्ह्याच्या तपासासाठी आरोपीची रिक्षाही जप्त केली आहे.
