पुणे – केतन अगरवालचा खून करण्यापूर्वी त्याला बंगळुरूला नेऊन त्याचे हात-पाय तोडण्याच्या पर्यायावर विचार झाला होता. केतनचा पासपोर्ट फाडणे आणि त्याच्या नावाने फेक सोशल मीडिया अकाउंट तयार करणे, या कल्पनाही चेतन चौधरी याने मांडल्याचे तपासात निष्पन्न झाले आहे. या बाबतीत रितेश हंगे हा सल्लागाराची भूमिका बजावत असल्याचे तपासातून दिसते. महत्वाचे म्हणजे केतनसोबत विवाह करण्याची इच्छा नसल्याचे सिया गोयल हिने अनेकांकडे बोलून दाखविले होते.

या प्रकरणाचा तपास पूर्ण करून पुणे ग्रामीण पोलिसांनी न्यायालयात तब्बल ५ हजार ३०० पानी दोषारोपपत्र दाखल केले आहे. त्यात प्रत्यक्षदर्शींसह विविध व्यक्तींचे जबाब, छायाचित्रे, सोशल मीडिया खात्यांची माहिती तसेच अन्य डिजिटल पुरावे जोडले आहेत.
केतनला बंगळुरूला नेऊन त्याचे हात-पाय तोडण्याचा विचार झाला होता. यासंदर्भात रितेश हंगे याने बंगळुरूमधील एका मित्राशी चर्चा केली होती. मात्र, संबंधित मित्राने याला विरोध केला.

तुम्ही वेडे आहात का? असे काही करू नका, असा सल्ला त्याने दिला. या व्यक्तीचा जबाब पोलिसांनी नोंदविला असून, तो दोषारोपपत्राचा भाग आहे. केतनसोबत विवाह करण्याची इच्छा नसल्याचे सियाने अनेकांकडे बोलून दाखविले होते. तपासादरम्यान पोलिसांनी संबंधित व्यक्तींचे जबाब नोंदविले आहेत. त्यामुळे केतनसोबतच्या विवाहाबाबत सियाची भूमिका काय होती, याची माहितीही दोषारोपपत्रातून पुढे आली आहे.

चेतनने माही या नावाने इन्स्टाग्राम अकाउंट तयार केल्याचेही आढळले असून, या अकाउंटशी संबंधित डिजिटल पुरावे पोलिसांनी संकलित केले आहेत. केतनविरुद्ध केलेल्या कटाच्या विविध टप्प्यांमध्ये रितेश हंगे याची भूमिका महत्त्वाची असल्याचे दिसते. बंगळुरूला नेण्यापासून अन्य पर्यायांबाबतही रितेशकडून सल्ला घेतला जात असल्याचे तपासात निष्पन्न झाले आहे. त्यासंदर्भातील जबाब, डिजिटल पुरावे दोषारोपपत्रात जोडले आहेत.

उज्ज्वल निकम विशेष सरकारी वकील
केतन अगरवाल खूनप्रकरणाच्या न्यायालयीन कामकाजासाठी ज्येष्ठ विधिज्ञ उज्ज्वल निकम यांची विशेष सरकारी वकील म्हणून लवकरच नियुक्ती केली जाणार आहे. या सगळ्याची प्रक्रिया पूर्ण झाली आहे.

October Heat: सप्टेंबरअखेरीस शहरात ऑक्टोबर हिटचा चटका