Bribe Crime: पालघर जिल्ह्यात लाचलुचपत प्रतिबंधक विभागाने 20 लाख रुपयांची लाच मागणाऱ्या वनक्षेत्रपालला अटक केली आहे. वनक्षेत्रपाल संदीप चौरे (मांडवी परीक्षेत्र) असे अटक केलेल्या शासकीय कर्मचाऱ्याचे नाव आहे. वसई तालुक्यातील ससुनवघर येथील मालमत्तेवर ताबा मिळवून देण्यासाठी वनक्षेत्रपाल संदीप चौरे आणि खासगी इसम चंद्रकांत पाटील यांनी तक्रारदाराकडे लाच मागितला होती.

लाच द्यायची नसल्याने तक्रारदाराने पालघर लाचलुचपत प्रतिबंधक विभागाकडे याबाबत तक्रार केली. त्यानंतर 19 नोव्हेंबर आणि 13 डिसेंबर रोजी त्याची पडताळणी करण्यात आली. आरोपींनी ठरलेल्या 20 लाखांपैकी 10 लाखांची रक्कम स्वीकृतीसाठी तयारी दाखवली होती.

फिर्यादीच्या तक्रारीनुसार सापळा रचत एसीबीने खासगी इसम चंद्रकांत पाटील याला 10 लाख रुपयांची रोकड घेताना रंगेहात अटक केली. त्यानंतर, वनक्षेत्रपाल संदीप चौरे याचाही यात समावेश असल्याने एसीबीच्या पथकाने संदीप चौरे यालाही अटक केली आहे. आरोपींविरोधात भ्रष्टाचार प्रतिबंधक कायद्यांतर्गत गुन्हा दाखल करण्यात आला असून, एसीबी अधिकारी अधिकचा तपास करत आहे.

नागरिकांना शासकीय कामासाठी शासकीय अधिकारी कर्मचाऱ्यांकडून कोणत्याही लाचेची मागणी झाल्यास तत्काळ संपर्क साधण्याचे आवाहन लाचलुचपत प्रतिबंधक विभागाने केले आहे. त्यासाठी, 1034 हा टोल फ्री क्रमांकही देण्यात आला आहे.