पिंपरी – पिंपरी-चिंचवड महापालिकेच्या वायसीएम रुग्णालयात रविवारी उपचारासाठी दाखल झालेल्या पुण्यातील 50 वर्षीय महिलेचा अवघ्या तासाभरात मृत्यू झाला होता. या महिलेचा अहवाल मंगळवारी रात्री उशिरा आला, त्यात महिला “करोना’ पॉझिटिव्ह असल्याचे निष्पन्न झाले. वायसीएम रुग्णालयात मृत्यू झाला असला तरीही महिलेच्या मृत्यूची नोंद पुणे शहरात केली जाणार असल्याचे पिंपरी महापालिकेच्या वैद्यकीय विभागाने स्पष्ट केले.

ही महिला पुण्यातील मार्केडयार्ड भागातील रहिवाशी आहे. पिंपरीतील एका खासगी रुग्णालयात महिला उपचारासाठी दाखल झाली होती. या रुग्णालयाने महिलेला करोना संशयित म्हणून रविवारी (दि.20) एप्रिल रोजी महापालिकेच्या वायसीएम रुग्णालयात पाठविले होते. वायसीएम रुग्णालयात दाखल केल्यानंतर अवघ्या तासाभरातच महिलेचा रविवारी मृत्यू झाला होता. प्रशासनाने महिलेच्या घशातील द्रावाचे नमुने तपासणीसाठी एनआयव्हीकडे पाठविले होते. त्याचे रिपोर्ट मंगळवारी (दि.21) रात्री उशिरा आले. त्यामध्ये रविवारी मृत्यू झालेल्या महिलेचे रिपोर्ट पॉझिटिव्ह आले आहेत.

महिलेला कोणाच्या संपर्कातून करोनाची लागण झाली होती हे समजू शकले नाही. वायसीएम रुग्णालयात मृत्यू झालेल्या महिलेची माहिती पुणे महापालिकेला कळविली जाणार आहे. या महिलेच्या मृत्यूची नोंद पिंपरी-चिंचवड शहरात केली जाणार नसल्याचे वैद्यकीय विभागाने स्पष्ट केले. त्यामुळे पिंपरी शहरातील कोरोनामुळे मृत्यू झालेल्यांचा दोनचा आकडा स्थिर आहे.

“करोना’बाधितांच्या संख्येत तीनने वाढ
पिंपरी-चिंचवड शहरातील आणखी तिघांना करोनाची बाधा झाल्याचे आज स्पष्ट झाले. यामध्ये दोन महिला व एका पुरुषाचा समावेश आहे. त्यामुळे शहरातील करोनाबाधितांची संख्या आता 67 वर पोहोचली आहे. आज दिवसभरात 81 संशयित महापालिकेच्या वायसीएम रुग्णालयात दाखल झाले असून, काल दाखल झालेल्या व घशातील द्रावाचे नमुणे तपासणीसाठी पाठविलेल्यांमधील तिघाजणांचे अहवाल पॉझिटिव्ह आले आहेत. एक जण दापोडी तर दुसरा रुग्ण वाकड परिसरातील आहे. तसेच तिसरी पॉझिटिव्ह महिला मयत झाली असून, ती गुलटेकडी, पुणे येथील आहे. तर आज दिवसभरात आणखी दोन रुग्ण बरे झाल्याने उपचारानंतर बरे झालेल्या करोनाबाधितांचा आकडा 20 वर पोहोचला आहे.