इंदापूर : यंदा पुणे जिल्हा परिषदेचे अध्यक्षपद सर्वसाधारण असल्यामुळे, जिल्ह्यातील प्रत्येक जिल्हा परिषदेच्या मतदारसंघाला अनन्यसाधारण महत्व निर्माण झाले आहे. सर्वच नेत्यांचे वर्चस्व असलेल्या बावडा-लुमेवाडी या जिल्हा परिषद गटाची व पंचायत समितीची लढत ही दुरंगी नव्हे तर तिरंगी होण्याची चिन्हे आहेत. जिल्ह्यातील सर्वाधिक लक्षवेधी लढत या जिल्हा परिषदेच्या गटात होणार आहे.

यापूर्वी बावडा – लाखेवाडी असा हा गट होता. नव्याने या गटाचे नामकरण बावडा- लुमेवाडी झाले आहे. तसेच या गटातील काही जुनी गावे, दुसर्‍या गटाला जोडली आहेत. यामध्ये माजी मंत्री हर्षवर्धन पाटील यांना अधिकचे लीड देणारी गावे भांडगाव, शेटफळ हवेली, भोडणी व लाखेवाडी ही गावे इतर गटात गेले असल्याने, त्याचा फटका निश्चितपणे हर्षवर्धन पाटील यांना बसेल असे बोलले जात आहे.

बावडा हे गाव स्वातंत्र्य मिळाल्यापासून राजकीय चर्चेत असणारे ठरले आहे. कर्मयोगी माजी खासदार दिवंगत नेते शंकरराव पाटील यांचे हे गाव असल्यामुळे सलग सहा वेळा आमदार दोनदा खासदार असल्यामुळे व त्यांच्यानंतर माजी मंत्री हर्षवर्धन पाटील हे तब्बल चार वेळा आमदार राहिल्यामुळे, इंदापूर तालुक्याच्या राजकारणाचा केंद्रबिंदू असणारे बावडा गाव व हा जिल्हा परिषद गट ठरलेला आहे.

माजी मंत्री हर्षवर्धन पाटील 1992 साली याच गटातून जिल्हा परिषदेचे सदस्य झाले. नंतर 1995 साली आमदार झाले. आत्तापर्यंतच्या सर्व जिल्हा परिषद निवडणुकांमध्ये पाटील कुटुंबीयांच्या विचाराचा सदस्य निवडून आलेला आहे. मागील 35 वर्षांत या भागात जिल्हा परिषद सदस्य म्हणून स्व. सुभाष खोरे, स्व. भगवान आवारे, माजी मंत्री हर्षवर्धन पाटील, जिल्हा बँकेचे संचालक आप्पासाहेब जगदाळे, भीमराव आवारे, प्रतिभा पाटील, श्रीमंत ढोले, स्व. रत्नप्रभा पाटील, अंकिता पाटील यांनी या गटात निवडून येण्याचा मान मिळवला आहे.

2024 च्या विधानसभेनंतर राजकीय गणिते बदलली

हर्षवर्धन पाटील यांनी पक्ष बदलल्यामुळे राजकीय ताकद या गटात अबाधित राहू शकली नाही. अनेक जवळचे सहकारी दुसर्‍या पक्षात गेले. यामध्ये आप्पासाहेब जगदाळे, चुलत बंधू मयूरसिंह पाटील यांचा समावेश आहे. हा गट महिला सर्वसाधारण प्रवर्गासाठी असला तरी देखील दोन्ही राष्ट्रवादी काँग्रेस व भारतीय जनता पार्टी या तीनही राजकीय पक्षांमध्ये सक्षम व प्रबळ उमेदवार आहेत.

एकाच गटात प्रभावशाली नेते

जिल्हा बँकेचे संचालक आप्पासाहेब जगदाळे हे प्रभावशाली अजित पवार यांच्या राष्ट्रवादीचे नेते आहेत. तर भारतीय जनता पार्टीत जिल्हा कोर कमिटीचे सदस्य मयूरसिंह पाटील, तर राष्ट्रवादी काँग्रेसचे तालुकाध्यक्ष हनुमंत कोकाटे याच जिल्हा परिषद गटात येतात. विधानसभेतील अपक्ष उमेदवार प्रवीण माने यांचे प्रचारप्रमुख म्हणून मयूरसिंह पाटील यांनी चोख काम केल्यामुळे, याच गटातून सहा हजार मते प्रवीण माने यांना देण्यामध्ये मयूरसिंह पाटील यांचा सिंहाचा वाटा आहे. त्यांच्या पत्नी निवडणूक लढवण्याची दाट शक्यता आहे.

प्रबळ उमेदवार पुढे येणार

माजी मंत्री हर्षवर्धन पाटील यांच्या कन्या अंकिता पाटील ठाकरे किंवा नीरा भीमा साखर कारखान्याच्या चेअरमन भाग्यश्री पाटील व जिल्हा बँकेचे संचालक आप्पासाहेब जगदाळे यांच्या कुटुंबातील महिला तसेच भाजप नेते मयूरसिंह पाटील यांच्या पत्नी यशश्री पाटील व राष्ट्रवादी काँग्रेस शरदचंद्रजी पवार पक्षाचे नेते अशोक घोगरे यांच्या घरातील संभाव्य उमेदवारांच्या नावाचा गवगवा चाललेला दिसतो.

माने-पाटील एकत्र आल्यास..

स्थानिक स्वराज्य संस्थेच्या निवडणुकीत माजी मंत्री हर्षवर्धन पाटील व सोनाई परिवाराचे प्रमुख दशरथ माने यांचे राजकीय मनोमिलन होईल, असे बोलले जात आहे. प्रत्यक्षात पाटील व माने स्थानिक स्वराज्य संस्थेच्या माध्यमातून एकत्र आले तर मात्र या जिल्हा परिषद गटात विरोधकांची मोठी पंचायत होईल असे चित्र आहे