Thane News : जिल्ह्यात कार्यरत असलेल्या एका मोठ्या आंतरराज्य बेकायदेशीर मद्य तस्करी रॅकेटचा (Thane News) राज्य उत्पादन शुल्क विभागाने पर्दाफाश केला आहे. गेल्या चार दिवसांत अनेक ठिकाणी छापे टाकून विभागाने ३२ लाख रुपये किमतीचा बेकायदेशीर मद्यसाठा जप्त केला आहे. १० मार्च रोजी रात्री भिवंडी येथे अधिकाऱ्यांनी दोन चारचाकी वाहने अडवली.

या वाहनांच्या तपासणीत, व्हिस्कीच्या २,००० बाटल्या जप्त करण्यात आल्या आहेत. यामध्ये चार व्यक्तींना ताब्यात घेण्यात आले असून, १९.२९ लाख रुपये किमतीचा मुद्देमाल जप्त करण्यात आला आहे, असे राज्य उत्पादन शुल्क विभागाचे (ठाणे) अधीक्षक प्रवीण तांबे यांनी सांगितले. तसेच, उत्पादन शुल्क पथकाने चावदार पाडा आणि कोगाव येथील संशयित खरेदीदार व पुरवठादारांच्या घरांवरही छापे टाकले आहेत.

यावेळी अधिकाऱ्यांना मद्य रिफिलिंगचे एक अत्यंत सुसज्ज रॅकेट आढळून आले. मद्य भरलेल्या २० लिटरच्या अनेक जार, तसेच नामांकित व्हिस्की ब्रँड्सच्या शेकडो रिकाम्या आणि भरलेल्या बाटल्या सापडल्या आहेत. १२ मार्च रोजी वैजुला परिसरात एका फार्महाऊसवर छापा टाकण्यात आला. या ठिकाणी केवळ गोव्यात विक्रीसाठी अधिकृत असलेल्या व्हिस्कीचे २४० बॉक्स, तसेच रिकाम्या बाटल्या भरण्यासाठी लागणारे साहित्य जप्त करण्यात आले.

याव्यतिरिक्त, १३ मार्च रोजी २.०७ लाख रुपये किमतीचे मद्य जप्त करण्यात आले. यामुळे एकूण बेकायदेशीर मद्यसाठ्याची किंमत अंदाजे ३२ लाख रुपयांपर्यंत पोहोचली असून, जप्त केलेल्या वाहनांची किंमत १५ लाख रुपये इतकी आहे. पडघा पोलीस ठाण्यात या प्रकरणी गुन्हा दाखल करण्यात आला आहे.