ठाणे : मुंबईसह महानगरात मेट्रोचे जाळे वेगाने पसरताना दिसत आहे. MMRDAतील शहरांना मुंबईशी जोडण्यासाठी मेट्रोचे प्रकल्पाचे काम वेगात सुरू आहे. 2025 मध्ये दोन मेट्रो प्रवाशांच्या सेवेत दाखल होण्याची शक्यता आहे. ठाणे शहरातदेखील आता मेट्रो धावताना दिसणार आहे. त्यामुळे ठाणेकरांचा प्रवास आरामदायी आणि सुखकर होण्यास मदत होणार आहे. यादरम्यान आता ठाण्यातील महत्त्वकांक्षी प्रकल्प म्हणजे ठाणे इंटिग्रल रिंग मेट्रो प्रकल्पाबाबत एक मोठी अपडेट समोर आली आहे. ठाणे इंटिग्रल रिंग मेट्रो प्रकल्प कॉरिडॉरसाठी जिओ-टेक्निकल इन्व्हेस्टिगेशन सुरू केले आहे. हा महत्त्वकांक्षी कॉरिडॉर 29 किमीचा असूण यात 22 स्थानके असणार आहेत. तर यातील दोन स्थानके भूमिगत असणार आहेत. 2029 पर्यंत ही मेट्रो ठाणेकरांच्या सेवेत दाखल होऊ शकते. कसा आहे मेट्रो प्रकल्प? ठाणे इंटिग्रल मेट्रो प्रकल्प हा 29 किमी लांबीचा असणार आहे. यामध्ये 26 किमी लांबीचा मार्ग हा उन्नत असून 3 किमीचा मार्ग भूमिगत असणार आहे. या प्रकल्पांतर्गंत 22 स्थानके असून त्यातील दोन स्थानके भूमिगत असणार आहेत. त्यातीलच एक भूमिगत स्थानक थेट ठाणे रेल्वे स्थानकाला जोडले जाणार आहे. तर, अन्य स्थानके मेट्रो कॉरिडॉरला जोडली जाणार आहेत. 22 स्थानके कोणती? रायला देवी, वागळे सर्कल, लोकमान्य नगर बस डेपो, शिवाजी नगर, नीळकंठ टर्मिनल, गांधी नगर, डॉ काशीनाथ घाणेकर नाट्यगृह, मानपाडा, डोंगरीपाडा, विजयनगरी, वाघबीळ, वॉटरफ्रंट, पाटलीपाडा, आझाद नगर बस स्टॉप, मनोरमा नगर, बाळकुम नाका, बाळकुंम पाडा, राबोडी, ठाणे जंक्शन (भूमिगत) आणि नवीन ठाणे या स्थानकांचा समावेश असणार आहे.
