मुंबई : दिवाळीच्या निमित्ताने मुंबईतील शिवाजी पार्कवर ठाकरे बंधू एकत्र येत यावेळी दिवाळी धमाका पाहायला मिळणार आहे. मनसेच्यावतीने मुंबईतील शिवाजी पार्क मैदानावर दरवर्षी दीपोत्सव साजरा केला जातो. यावर्षीही दिवाळीच्या अगोदर दीपोत्सव सोहळा संपन्न होणार असून हा सोहळा खास असणार आहे. उद्धव ठाकरेंचे नाव मनसेच्या दीपोत्सव पत्रिकेत छापल्याने ठाकरे बंधू दिवाळीतच राजकीय धमाका करतात की काय याची चर्चा होत आहे.

शिवाजी पार्कवरील यावर्षीच्या दीपोत्सव सोहळ्याचे उद्धाटन शिवसेना पक्षप्रमुख उद्धव ठाकरे करणार आहेत.आगामी महापालिका निवडणुकांच्या अनुषंगाने शिवसेना आणि मनसे एकत्र येणार असल्याचे आता जवळपास निश्चित मानले जात आहे. केवळ औपचारिक घोषणा आणि जागावाटप बाकी असल्याचा अंदाज राजकीय पदाधिकारी व्यक्त करत आहेत.

शाळेतील तिसरी भाषा मराठा असावी, या मुद्द्यावरुन एकत्र येत ठाकरे बंधूंमधील दुरावा कमी झाला असून जवळीक सर्वांनाच आश्चर्य वाटणारी आहे. गेल्या काही दिवसांत ठाकरे बंधूंच्या जवळपास सात ते आठ वेळा भेटी झाल्या आहेत.