मुंबई: आगामी स्थानिक स्वराज्य संस्था आणि महापालिका निवडणुकीच्या पार्श्वभूमीवर महाराष्ट्राच्या राजकारणात महत्त्वपूर्ण घडामोडी घडत आहेत. या घडामोडींच्या केंद्रस्थानी आहेत ठाकरे बंधू (Thackeray Brothers) – उद्धव ठाकरे आणि राज ठाकरे. आज, 12 ऑक्टोबर 2025 रोजी, राज ठाकरे यांनी आपल्या कुटुंबीयांसह मातोश्रीवर भेट दिल्याने पुन्हा एकदा राजकीय आणि कौटुंबिक चर्चांना उधाण आले आहे. गेल्या तीन महिन्यांत राज ठाकरे यांची मातोश्रीवरील ही तिसरी भेट आहे. ज्यामुळे ठाकरे बंधूंच्या एकत्र येण्याच्या शक्यतेने राजकीय वर्तुळात उत्सुकता निर्माण झाली आहे. आजच्या भेटीचे स्वरूप आज राज ठाकरे आपल्या आईंसह मातोश्रीवर दाखल झाले. ही भेट कौटुंबिक स्नेह भोजनासाठी असल्याचे सांगण्यात येत आहे. मात्र, आगामी निवडणुकांच्या पार्श्वभूमीवर या भेटीचा राजकीय अर्थही काढला जात आहे. मातोश्रीवर दाखल होण्यापूर्वी राज ठाकरे यांनी माध्यमांशी संवाद साधताना स्पष्ट केले की, “ही भेट फक्त आईसोबत आहे,” असे सांगत राजकीय चर्चांना पूर्णविराम देण्याचा प्रयत्न केला. विशेष म्हणजे, राज ठाकरे यांच्या आई या उद्धव ठाकरे यांच्या मावशी आणि काकू देखील आहेत, त्यामुळे ही भेट कौटुंबिक बंध मजबूत करण्यासाठी असल्याचे मानले जात आहे. ठाकरे बंधूंच्या भेटींचा सिलसिला पहिली भेट 5 जुलै 2025: मराठी विजयी मेळाव्यात तब्बल दोन दशकांनंतर उद्धव आणि राज ठाकरे एकाच व्यासपीठावर दिसले. या घटनेने राजकीय वर्तुळात खळबळ उडाली. दुसरी भेट 27 जुलै 2025 : उद्धव ठाकरे यांच्या वाढदिवसानिमित्त राज ठाकरे यांनी मातोश्रीवर भेट देऊन शुभेच्छा दिल्या. तिसरी भेट 27 ऑगस्ट 2025 : गणेशोत्सवानिमित्त उद्धव ठाकरे कुटुंबासह राज ठाकरे यांच्या शिवतीर्थ निवासस्थानी दाखल झाले. ही भेटही कौटुंबिक असल्याचे सांगण्यात आले. चौथी भेट 10 सप्टेंबर 2025 : उद्धव ठाकरे पुन्हा एकदा शिवतीर्थावर राज ठाकरे यांच्या भेटीला गेले. यावेळीही भेटीचे स्वरूप कौटुंबिक असल्याचे स्पष्ट करण्यात आले. पाचवी भेट 5 ऑक्टोबर 2025 : राज ठाकरे आणि शर्मिला ठाकरे मातोश्रीवर दाखल झाले. या भेटीत ठाकरे बंधूंमध्ये 40 मिनिटे चर्चा झाली, जी कौटुंबिक असल्याचे सांगण्यात आले. सहावी भेट 12 ऑक्टोबर 2025 : राज ठाकरे कुटुंबियांसह मातोश्रीवर दाखल. हि कौटुंबिक स्नेह भेट असल्याचे सांगण्यात येत आहे. कौटुंबिक बंध की राजकीय रणनीती? गणेशोत्सवाच्या काळात राज ठाकरे यांच्या आईंनी उद्धव ठाकरे यांना शिवतीर्थावर येण्याचे निमंत्रण दिले होते. त्यानुसार उद्धव यांनी शिवतीर्थावर भेट दिली होती.आता राज ठाकरे यांची मातोश्रीवरील सलग तिसरी भेट आणि गेल्या तीन महिन्यांतील भेटींचा सिलसिला पाहता, या भेटी केवळ कौटुंबिक नसून त्यामागे राजकीय उद्दिष्टे असू शकतात, अशी शक्यता वर्तवली जात आहे. विशेषतः आगामी स्थानिक स्वराज्य संस्था आणि महापालिका निवडणुकीच्या पार्श्वभूमीवर ठाकरे बंधूंची एकजूट शिवसेना आणि मनसेच्या कार्यकर्त्यांमध्ये नवचैतन्य आणू शकते. आजच्या मातोश्रीवरील भेटीने ठाकरे बंधूंच्या एकत्र येण्याच्या चर्चांना आणखी बळ मिळाले आहे. ही भेट कौटुंबिक स्नेहाची आहे की राजकीय रणनीतीचा भाग आहे, याबाबत स्पष्टता नसली तरी महाराष्ट्राच्या राजकारणात या घडामोडींमुळे निश्चितच खळबळ उडाली आहे. आगामी निवडणुकीच्या पार्श्वभूमीवर ठाकरे बंधूंच्या पुढील हालचालींकडे सर्वांचे लक्ष लागले आहे.
