Jammu-Kashmir Terrorist Attack : जम्मू-काश्मीरमध्ये दहशतवाद्यांनी पुन्हा एकदा सुरक्षा दलांना लक्ष्य करत खळबळ उडवून दिली आहे. दक्षिण काश्मीरमधील कुलगाम जिल्ह्यात बुधवारी दुपारी मोटारसायकलवरून आलेल्या दोन दहशतवाद्यांनी केंद्रीय राखीव पोलीस दलाच्या (CRPF) नाका पथकावर अचानक गोळीबार केला. या हल्ल्यात तीन जवानांना गोळ्या लागल्या असून ते जखमी झाले आहेत.

हल्ल्यानंतर परिसरात गोंधळाचे वातावरण निर्माण झाले. जवानांनी तत्काळ प्रत्युत्तर दिले; मात्र नागरिकांच्या सुरक्षेचा विचार करून त्यांनी संयम बाळगला. याचाच फायदा घेत हल्लेखोर घटनास्थळावरून पसार झाले. घटनेचे गांभीर्य लक्षात घेऊन सुरक्षा दलांनी संपूर्ण परिसराला वेढा घातला असून दहशतवाद्यांचा शोध घेण्यासाठी मोठी शोधमोहीम सुरू केली आहे.

मोटारसायकलवरून आले अन् CRPF जवानांवर गोळीबार केला!

मिळालेल्या माहितीनुसार, कुलगाम जिल्ह्यातील आखरन-नौपुरा परिसरात बुधवारी दुपारी CRPFच्या ४६व्या बटालियनच्या जवानांनी नाकाबंदी केली होती. या ठिकाणी येणाऱ्या-जाणाऱ्या वाहनांची आणि नागरिकांची तपासणी सुरू होती. दुपारी साधारण सव्वादोनच्या सुमारास मोटारसायकलवरून दोन तरुण नाक्याजवळ आले. त्यांनी कोणताही इशारा न देता नाका पथकावर अचानक गोळीबार सुरू केला.

अचानक झालेल्या गोळीबारामुळे परिसरात एकच खळबळ उडाली. नागरिकांमध्ये भीतीचे वातावरण निर्माण झाले, तर नाका पथकातील तीन जवान गोळ्या लागल्याने जमिनीवर कोसळले. परिस्थितीचे गांभीर्य ओळखून इतर जवानांनी तातडीने मोर्चा सांभाळत हल्लेखोरांना प्रत्युत्तर दिले.

मात्र, घटनास्थळी नागरिकांची गर्दी आणि निर्माण झालेला गोंधळ लक्षात घेऊन जवानांनी गोळीबार करताना संयम बाळगला. याच संधीचा फायदा घेत दोन्ही हल्लेखोर पळून जाण्यात यशस्वी झाले.

एका जवानाच्या पायात, दुसऱ्याच्या हातात तर तिसऱ्याच्या पाठीत गोळी

हल्ल्याची माहिती मिळताच जवळच्या सुरक्षा छावण्यांमधून अतिरिक्त जवान घटनास्थळी दाखल झाले. त्यांनी संपूर्ण परिसराची नाकाबंदी करत जखमी जवानांना तातडीने जवळच्या रुग्णालयात उपचारासाठी हलवले.

जखमी जवानांची नावे हेड कॉन्स्टेबल सोमवीर, कॉन्स्टेबल शांतनू आणि कॉन्स्टेबल राकेश दास अशी असल्याचे वृत्तात नमूद करण्यात आले आहे. वैद्यकीय माहितीनुसार, एका जवानाच्या पायाला, दुसऱ्या जवानाच्या हाताला, तर तिसऱ्या जवानाच्या पाठीत गोळी लागली आहे. त्यांच्यावर रुग्णालयात उपचार सुरू आहेत.

दहशतवाद्यांचा शोध सुरू; CCTV फुटेजची तपासणी

हल्लेखोरांनी घटनास्थळावरून पळ काढल्यानंतर सुरक्षा दलांनी संपूर्ण परिसरात शोधमोहीम सुरू केली आहे. परिसरातील संशयास्पद ठिकाणांची तपासणी केली जात असून, घटनास्थळाच्या आसपास लावण्यात आलेल्या सीसीटीव्ही कॅमेऱ्यांचे फुटेजही तपासले जात आहे.

हल्लेखोर कोणत्या दिशेने पळाले आणि त्यांना स्थानिक पातळीवर मदत मिळाली होती का, याचाही तपास केला जात आहे. दरम्यान, CRPF, जम्मू-काश्मीर पोलीस आणि लष्कराचे वरिष्ठ अधिकारी घटनास्थळी दाखल झाले असून परिस्थितीवर लक्ष ठेवून आहेत.