Mumbai ।  मुंबईतील दहशतवादी हल्ल्याबाबत पुन्हा एकदा अलर्ट जारी करण्यात आला आहे. देशाच्या आर्थिक राजधानीत पुन्हा दहशत माजवण्याचा कट दहशतवादी रचत आहेत. वृत्तानुसार, गुप्तचर संस्थेने असे इनपुट दिले आहेत. दहशतवादाचा धोका लक्षात घेता मुंबईत ठिकठिकाणी पोलीस बंदोबस्त तैनात करण्यात आला आहे.

पोलीस सूत्रांनी दिलेल्या माहितीनुसार, सुरक्षा एजन्सीच्या सतर्कतेनंतर मुंबईतील अनेक धार्मिक स्थळे आणि इतर गर्दीच्या ठिकाणी कडक सुरक्षा व्यवस्था ठेवण्यात आली आहे. गर्दीच्या ठिकाणी आणि धार्मिक स्थळांवर ‘मॉक ड्रील’ घेण्याच्या सूचना पोलिसांना देण्यात आल्या आहेत. शहरातील सर्व डीसीपींनाही आपापल्या झोनमधील सुरक्षा व्यवस्थेकडे विशेष लक्ष देण्यास सांगण्यात आले आहे.

एका अधिकाऱ्याने सांगितले की, ‘शुक्रवारी पोलिसांनी क्रॉफर्ड मार्केट परिसरात मॉक ड्रिल केले होते. याच भागात प्रचंड गर्दी असते. येथे दोन प्रमुख धार्मिक स्थळेही आहेत. सुरक्षा कवायतीबाबत पोलिसांनी अधिकृतपणे सांगितले की, सुरक्षितता लक्षात घेऊन ही एक कसरत होती. हे सर्व अचानक का केले जात आहे याबाबत त्यांनी काहीही सांगितले नाही. आगामी सण आणि निवडणुकांच्या पार्श्वभूमीवर मुंबईतील क्रॉफर्ड मार्केट आणि इतर ठिकाणी मॉक ड्रील घेण्यात येत असल्याचे पोलिसांचे म्हणणे आहे.’

सूत्रांच्या हवाल्याने सांगितले की, ‘शहरातील सर्व मंदिरांना सतर्क राहण्याच्या सूचना देण्यात आल्या आहेत आणि खबरदारीचा उपाय म्हणून कोणत्याही संशयास्पद हालचालींची तक्रार करण्यास सांगितले आहे.

सणासुदीचा हंगाम सुरू होणार आहे. नवरात्र येणार आहे. सर्वत्र दुर्गापूजा साजरी होणार आहे. यानंतर करवा चौथ आणि त्यानंतर दिवाळी येईल. अशा स्थितीत बाजारपेठांमध्येही मोठी गर्दी होणार आहे. वर्षअखेरीस विधानसभा निवडणुकाही होणार आहेत. सणासुदीच्या काळात सर्वजण व्यस्त असताना दहशतवादी अशा संधी शोधतात, त्यामुळेच पोलीस आधीच अलर्ट मोडवर आले आहेत.