नवी दिल्ली  – दिल्ली पोलिसांच्या गुन्हे शाखेच्या अँटी नार्कोटिक्स टास्क फोर्स (एएनटीएफ) ने अफगाणिस्तान, पाकिस्तान आणि भारतात पसरलेल्या आंतरराष्ट्रीय ड्रग्ज सिंडिकेटचा पर्दाफाश करत एक मोठे यश मिळवले आहे. सुमारे ५० दिवस चाललेल्या ‘क्लीन स्वीप’ ऑपरेशनमध्ये चार राज्यांचा समावेश होता आणि १० आरोपींना अटक करण्यात आली आहे.

या कालावधीत, एएनटीएफ पथकाने अफगाणिस्तानातील १६६७ ग्रॅम उच्च दर्जाचे हेरॉइन, १३० ग्रॅम संशयास्पद रासायनिक पदार्थ, १६ मोबाईल फोन आणि १.६५ लाख रुपये रोख जप्त केले. याशिवाय, ड्रग्ज तस्करीत वापरल्या जाणाऱ्या दोन मोटारसायकलीही जप्त करण्यात आल्या असून १० कोटी रुपयांच्या ५ मालमत्तांच्या चौकशीसाठी गोठवण्याचे आदेश देण्यात येत आहेत.

या मोबाईल फोनमधून मिळालेल्या माहितीनुसार, अमृतसर, तरनतारन, पंजाबमधील खेमकरण, जम्मू आणि काश्मीरमधील कुपवाडा आणि हरियाणातील मेवात यासारख्या सीमावर्ती भागात एक आंतरराष्ट्रीय नेटवर्क सक्रिय असल्याचे उघड झाले. अफगाणिस्तान आणि पाकिस्तानमधून दिल्लीत हेरॉइनची खेप येत असल्याची गुप्त माहिती एएनटीएफला मिळाली होती.