हैदराबाद  – तेलंगणातील निवडणुकीपूर्वी आयकर विभागाने गुरुवारी भारत राष्ट्र समितीचे आमदार नल्लामोथू भास्कर राव यांच्या घरावर आणि कार्यालयाच्या परिसरात छापे टाकले. त्याच्या काही निकटवर्तीयांच्या घरांवरही हे छापे टाकण्यात आले. भास्कर राव मिर्यालागुडा येथून आमदार आहेत. तसेच यावेळीही ते बीआरएसच्या तिकिटावर निवडणूक लढवत आहेत.

नल्लामोथू भास्कर राव हे मूळचे नलगोंडा जिल्ह्यातील निदामनून मंडळातील शाकापुरम गावचे आहेत. 2014 मध्ये ते मिर्यालागुडा विधानसभा मतदारसंघातून आमदार म्हणून निवडून आले होते. 2018 मध्ये त्यांना पुन्हा त्याच भागातून आमदार होण्याची संधी मिळाली. वेगळ्या तेलंगणा राज्याच्या आंदोलनात सामील झालेल्या पहिल्या नेत्यांपैकी राव होते.

यापूर्वी 13 नोव्हेंबर रोजी आयकर विभागाच्या अधिकाऱ्यांनी तेलंगणाच्या मंत्री सबिता इंद्रा रेड्डी यांच्या जवळच्या लोकांच्या घरावर छापे टाकले होते. 2019 पासून त्या तेलंगणाच्या शिक्षणमंत्री आहेत. इन्कम टॅक्‍सने प्रदीप नावाच्या व्यक्तीच्या घराचीही झडती घेतल्याचे सांगण्यात आले. तो मंत्र्याचा जवळचा नातेवाईक असल्याचे सांगण्यात आले.