Eknath Shinde : एकनाथ शिंदेंच्या हेलिकॉप्टरमध्ये तांत्रिक बिघाड; प्रवास केला रद्द !
या दौऱ्यात त्यांनी चंद्रभागा नदीच्या वाळवंटात बुलेटवरून फिरत तात्पुरती शौचालये, पाणीपुरवठा आणि स्वच्छतेच्या व्यवस्थेची पाहणी केली.

Eknath Shinde – पंढरपूर कार्तिकी एकादशी यात्रेच्या पार्श्वभूमीवर वारकरी आणि भाविकांसाठी करण्यात आलेल्या सोयी-सुविधांची पाहणी करण्यासाठी पंढरपूर दौऱ्यावर आलेले उपमुख्यमंत्री एकनाथ शिंदे यांच्या हेलिकॉप्टरमध्ये तांत्रिक बिघाड झाल्याचा प्रकार घडला.
हेलिकॉप्टरमध्ये बिघाड झाल्यामुळे त्यांचा नियोजित हवाई प्रवास रद्द करावा लागला. परिणामी, एकनाथ शिंदे हे पंढरपुरातून वाहनाने पुण्याच्या दिशेने रवाना झाले आहेत.
कार्तिकी एकादशी सोहळा २१ नोव्हेंबर रोजी होणार असल्याने पंढरपुरात प्रशासनाकडून यात्रेची जय्यत तयारी सुरू आहे. या पार्श्वभूमीवर एकनाथ शिंदे यांनी गुरुवारी पंढरपूरला भेट देऊन यात्रा नियोजनाचा आढावा घेतला.
यावेळी त्यांनी वारकऱ्यांसाठी करण्यात आलेल्या विविध सोयी-सुविधांची प्रत्यक्ष पाहणी केली. चंद्रभागा वाळवंट, दर्शन व्यवस्था, स्वच्छता, पाणीपुरवठा आणि भाविकांच्या सुविधांबाबत त्यांनी माहिती घेतली.
या दौऱ्यात त्यांनी चंद्रभागा नदीच्या वाळवंटात बुलेटवरून फिरत तात्पुरती शौचालये, पाणीपुरवठा आणि स्वच्छतेच्या व्यवस्थेची पाहणी केली. तसेच प्रशासनाकडून यात्रेसाठी करण्यात आलेल्या नियोजनाचा आढावा घेतला.






