Aditi Tatkare : राष्ट्रवादी काँग्रेसच्या दोन्ही गटांच्या विलिनीकरणाच्या चर्चांना वेग आला असताना प्रदेशाध्यक्ष सुनील तटकरे यांच्या भूमिकेवरून राजकीय वातावरण तापलं आहे. शरद पवार यांच्या राष्ट्रवादी काँग्रेसमधील नेत्यांकडून तटकरेंवर जोरदार टीका केली जात आहे. त्यामुळे या संपूर्ण प्रकरणात सुनील तटकरे यांना व्हिलन ठरवलं जात असल्याचं चित्र निर्माण झालं आहे. आता यावर त्यांची कन्या आणि मंत्री आदिती तटकरे यांनी प्रतिक्रिया देत नाराजी व्यक्त केली आहे.

‘सुनील तटकरे यांना व्हिलन का ठरवलं जात आहे?’ असा सवाल आदिती तटकरे यांनी उपस्थित केला. त्या नंदुरबार जिल्ह्याच्या दौऱ्यावर असताना माध्यमांशी संवाद साधत होत्या. यावेळी त्यांना राष्ट्रवादीच्या विलिनीकरणाच्या मुद्द्यावरून सुनील तटकरेंना लक्ष्य केलं जात असल्याबाबत प्रश्न विचारण्यात आला.

यावर बोलताना आदिती तटकरे म्हणाल्या, “ही दुर्दैवी गोष्ट आहे. या विषयावर मी मुलगी म्हणून बोलेन. सुनील तटकरे यांना व्हिलन ठरवलं जात आहे, याचं मला वाईट वाटतं. अजितदादा आणि सुनील तटकरे यांना मी अनेक वर्षांपासून एकत्र पाहिलं आहे.”

पुढे त्या म्हणाल्या, “राष्ट्रवादी काँग्रेसच्या स्थापनेच्या आधीपासूनच दोघांची मैत्री होती. काँग्रेसमध्ये असल्यापासून ते एकमेकांचे मित्र आहेत. अनेक प्रसंगांना दोघांनी एकत्रितपणे सामोरं जाताना पाहिलं आहे. मात्र, त्यांच्या मैत्रीत कधीही दुरावा आला नाही. आता दादा आपल्यात नाहीत; पण मित्र म्हणून सुनील तटकरे आपलं कर्तव्य पार पाडत राहतील. प्रदेशाध्यक्ष आणि मित्र म्हणून ते आपली जबाबदारी पार पाडत आहेत.”

विलिनीकरणाच्या चर्चेवर भाष्य करणं टाळलं

दरम्यान, राष्ट्रवादी काँग्रेसच्या दोन्ही गटांच्या विलिनीकरणाबाबत विचारलं असता आदिती तटकरे यांनी थेट भाष्य करणं टाळलं. “मी एक छोटी कार्यकर्ती आहे. शरद पवार साहेब, सुनेत्रा पवार आणि सुप्रिया सुळे यांच्यासारखे वरिष्ठ नेते याबाबत निर्णय घेतील. आम्ही सुनेत्रा काकींच्या नेतृत्वाखाली काम करत आहोत. त्या जो निर्णय घेतील किंवा जी भूमिका मांडतील, ती कार्यकर्ते म्हणून आम्हाला मान्य असेल,” असं आदिती तटकरे यांनी स्पष्ट केलं.

धावफलकावर ० धावा अन् ३ विकेट्स ! रोहित, विराट आणि श्रेयस तिघेही भोपळ्यावर बाद; भारतीय क्रिकेट इतिहासात पहिल्यांदाच असं घडलं