Tata Sons IPO : टाटा समूहाची होल्डिंग कंपनी असलेल्या टाटा सन्सच्या संभाव्य शेअर बाजारातील लिस्टिंगवरून नवी चर्चा सुरू झाली आहे. टाटा ट्रस्ट्सचे अध्यक्ष नोएल टाटा यांनी या लिस्टिंगबाबत चिंता व्यक्त केली आहे. कंपनी शेअर बाजारात सूचिबद्ध झाल्यास हजारो भागधारकांचा नफ्यासाठी दबाव वाढू शकतो. त्यामुळे समूहाच्या परोपकाराच्या परंपरेवर परिणाम होण्याची शक्यता त्यांनी व्यक्त केली.

टाटा समूहाची ओळख केवळ नफ्यावर नव्हे, तर समाजहिताच्या कामावरही आधारित आहे. लिस्टिंगमुळे समूहाच्या कामकाजाची मूलभूत विचारधारा बदलू शकते, असेही त्यांनी नमूद केले.

नोएल टाटा यांनी सांगितले की, भविष्यात कंपनीचे ३० ते ४० हजार भागधारक झाल्यास नफा मिळवण्याला अधिक महत्त्व दिले जाण्याची शक्यता आहे. त्यामुळे परोपकाराची भावना मागे पडू शकते. समूहाची विचारधारा एखाद्या व्यक्तीवर अवलंबून न राहता पुढील काळातही कायम राहणे आवश्यक आहे. या विषयावर नियामक आणि संबंधित घटकांशी चर्चा करून मार्ग काढण्याचा टाटा ट्रस्ट्सचा प्रयत्न राहील, असेही त्यांनी स्पष्ट केले.

दरम्यान, टाटा समूहाच्या रिटेल व्यवसायाच्या विस्ताराची योजनाही त्यांनी मांडली. वेस्टसाइडची सध्या देशभरात सुमारे ३२० स्टोअर्स आहेत. ही संख्या ५०० पेक्षा अधिक करण्याचे उद्दिष्ट आहे. उत्पादनाची रचना, निर्मिती आणि विक्री यावर थेट नियंत्रण ठेवणाऱ्या खासगी ब्रँडच्या व्यवसायामुळे कंपनीला ग्राहकांपर्यंत उत्पादने पोहोचवणे शक्य झाले आहे.

जूडियोच्या यशाबाबत बोलताना त्यांनी सांगितले की, २०१६ मध्ये सामान्य ग्राहकांना परवडणाऱ्या किमतीत चांगल्या दर्जाचे फॅशन कपडे उपलब्ध करून देण्याच्या उद्देशाने हा ब्रँड सुरू करण्यात आला. सुरुवातीला जूडियोची उत्पादने १९९ ते ९९९ रुपयांपर्यंत उपलब्ध होती. कमी किमतीत फॅशन देण्याच्या धोरणामुळे या ब्रँडला ग्राहकांचा चांगला प्रतिसाद मिळाला.

टाटा समूह आता सेमीकंडक्टर आणि इलेक्ट्रिक वाहनांच्या बॅटरीसारख्या नव्या क्षेत्रांतही गुंतवणूक करत आहे. देशाच्या औद्योगिक विकासात भागीदार होण्याची समूहाची भूमिका असल्याचे नोएल टाटा यांनी सांगितले. मोठे प्रकल्प पूर्ण करताना आणि भांडवलाची गुंतवणूक करताना अधिक शिस्त पाळण्याची गरजही त्यांनी व्यक्त केली.

टाटा ट्रस्ट्सच्या अध्यक्षपदाच्या अनुभवाबद्दल बोलताना त्यांनी वंचित घटकांच्या समस्या जवळून समजल्याचे सांगितले. समाजातील विविध अडचणी सोडवण्यासाठी परोपकाराच्या माध्यमातून मोठे काम करता येऊ शकते, असेही त्यांनी नमूद केले.