Tata Punch EV Facelift: भारतीय ऑटोमोबाईल क्षेत्रातील आघाडीची कंपनी टाटा पॅसेंजर इलेक्ट्रिक मोबिलिटी लिमिटेडने आपली बहुप्रतीक्षित ‘टाटा पंच EV फेसलिफ्ट’ अधिकृतपणे भारतीय बाजारपेठेत लाँच केली आहे. या नवीन मॉडेलची सुरुवातीची एक्स-शोरूम किंमत ९.६९ लाख रुपये निश्चित करण्यात आली आहे. मात्र, कंपनीने सादर केलेल्या ‘बॅटरी-एज-ए-सर्व्हिस’ म्हणजेच BaaS (Battery-as-a-Service) या पर्यायामुळे ग्राहकांना ही कार अवघ्या ६ लाख ४९ हजार रुपयांच्या परवडणाऱ्या किमतीत खरेदी करता येणार आहे. या विशेष योजनेअंतर्गत ग्राहकांना बॅटरीसाठी प्रति किलोमीटर २.६ रुपये इतका अतिरिक्त शुल्क भरावे लागेल, ज्यामुळे ईव्ही खरेदी करणे अधिक सोपे झाले आहे. लुक आणि फिचर्स – डिझाइनच्या बाबतीत २०२६ टाटा पंच EV मध्ये अनेक लक्षणीय बदल पाहायला मिळतात. कारचा पुढचा भाग अधिक सुटसुटीत आणि आधुनिक करण्यात आला असून, तिथे आता ब्लॅक स्ट्रिपऐवजी बॉडी कलर पॅनलचा वापर केला आहे. यात कनेक्टेड LED DRLs आणि हेडलाईटच्या रचनेत बदल केल्यामुळे या कारचा लूक नेक्सॉन ईव्ही आणि हॅरियर ईव्हीच्या जवळ जाणारा वाटतो. कारच्या बाजूच्या भागात १६ इंचाचे नवीन डिझाइन केलेले अलॉय व्हील्स दिले आहेत, तर मागील बाजूस नवीन टेललॅम्प्सची जोड देण्यात आली आहे. ही कार फिअरलेस येल्लो, बेंगाल रूज आणि कॅरामल अशा आकर्षक रंगांसह एकूण सात पर्यायांमध्ये उपलब्ध करून देण्यात आली आहे. याशिवाय १९५ मिमी ग्राउंड क्लीयरन्स आणि ४५० मिमी वॉटर वेडिंग क्षमतेमुळे ही मायक्रो SUV खडतर रस्त्यांवरही उत्तम स्थिरता प्रदान करते. इंटीरियर आणि फीचर्सबद्दल बोलायचे झाले तर, नवीन पंच EV चे केबिन आता अधिक हाय-टेक झाले आहे. यात १० इंचाची मोठी इन्फोटेनमेंट स्क्रीन, डिजिटल इन्स्ट्रुमेंट क्लस्टर आणि मध्यभागी टाटाचा चमकणारा लोगो असलेले नवीन ‘टू-स्पोक’ स्टिअरिंग व्हील देण्यात आले आहे. प्रवाशांच्या सोयीसाठी व्हेंटिलेटेड सीट्स, कूल्ड ग्लोव्हबॉक्स, ऑटोमॅटिक क्लायमेट कंट्रोल आणि वायरलेस ॲपल कारप्ले व अँड्रॉइड ऑटो यांसारख्या आधुनिक सुविधांचा समावेश आहे. सुरक्षेसाठी टाटाने यामध्ये ६ एअरबॅग्ज, ३६०-डिग्री कॅमेरा, इलेक्ट्रॉनिक स्टेबिलिटी प्रोग्राम (ESP) आणि हिल होल्ड असिस्ट यांसारखे प्रगत फीचर्स स्टँडर्ड म्हणून दिले आहेत. ४६८ किलोमीटरपर्यंतची दमदार रेंज – या कारमध्ये बॅटरीचे दोन मुख्य पर्याय उपलब्ध आहेत. ३० kWh बॅटरी पॅकसह ४० kWh चा मोठा बॅटरी पॅक देखील देण्यात आला आहे, जो एका पूर्ण चार्जवर ४६८ किलोमीटरपर्यंतची (ARAI) दमदार रेंज देतो. चार्जिंगसाठी यात ३.३ किलोवॅट आणि ७.२ किलोवॅट चार्जरचे पर्याय आहेत, तर ६५ किलोवॅटच्या डीसी फास्ट चार्जरच्या साहाय्याने ही बॅटरी केवळ २६ मिनिटांत २० ते ८० टक्क्यांपर्यंत चार्ज होऊ शकते. विविध व्हेरिएंट्समध्ये उपलब्ध असलेल्या या कारची किंमत व्हेरिएंट आणि बॅटरी क्षमतेनुसार ९.६९ लाख ते १२.५९ लाख रुपयांच्या दरम्यान आहे. टाटाच्या या नवीन पावलामुळे भारतीय इलेक्ट्रिक कार बाजारपेठेत मोठी स्पर्धा निर्माण होण्याची शक्यता आहे.
