नवी दिल्ली – भारतातील आघाडीची ऑटोमोबाईल उत्पादक कंपनी टाटा मोटर्सची एकूण देशांतर्गत विक्री सप्टेंबर महिन्यात 15 टक्क्यांनी घसरून 69,694 वर आली आहे. टाटा मोटर्सने गेल्या वर्षी सप्टेंबरमध्ये एकूण 82,023 वाहनांची विक्री केली होती. टाटा मोटर्सने मंगळवारी सांगितले की, त्यांनी देशात इलेक्ट्रिकसह एकूण 41,063 प्रवासी वाहनांची विक्री केली आहे, जी सप्टेंबर 2023 मधील 44,809 वाहनांच्या तुलनेत 8 टक्के कमी आहे.

व्यावसायिक वाहनांच्या विक्रीतही मोठी घट –

मागणीचा अभाव आणि हंगामी कारणांमुळे विक्रीत घट झाल्याचे टाटा मोटर्स पॅसेंजर व्हेइकल्स लिमिटेड आणि टाटा पॅसेंजर इलेक्ट्रिक मोबिलिटी लिमिटेडचे ​​व्यवस्थापकीय संचालक शैलेश चंद्र यांनी सांगितले. प्रवासी वाहन विभागाव्यतिरिक्त, टाटा मोटर्सने सप्टेंबरमध्ये एकूण 28,631 व्यावसायिक वाहनांची विक्री केली.

टाटा मोटर्सने गेल्या वर्षी सप्टेंबरमध्ये 37,214 वाहनांची विक्री केली होती. व्यावसायिक वाहनांच्या सेगमेंटमध्येही टाटा मोटर्सच्या विक्रीत 23 टक्क्यांची मोठी घसरण नोंदवण्यात आली आहे. टाटा मोटर्स लिमिटेडचे ​​कार्यकारी संचालक गिरीश वाघ यांनी सांगितले की, जुलै-सप्टेंबर या तिमाहीत व्यावसायिक वाहनांची देशांतर्गत विक्री ७९,९३१ युनिट्स होती, जी आर्थिक वर्ष २०२४ च्या दुसऱ्या तिमाहीतील विक्रीपेक्षा १९ टक्के कमी आहे.

अशोक लेलँडच्या विक्रीतही घट –

भारतीय व्यावसायिक वाहन निर्माता अशोक लेलँडची सप्टेंबरमध्ये निर्यातीसह एकूण विक्री वार्षिक 10 टक्क्यांनी घटून 17,233 युनिट्सवर आली आहे. सप्टेंबर 2023 मध्ये कंपनीने एकूण 19,202 वाहनांची विक्री केली होती. निर्यातीसह मध्यम आणि जड व्यावसायिक वाहनांची (M&HCV) विक्री गेल्या महिन्यात 11,077 युनिट्सवर होती, जी सप्टेंबर 2023 मध्ये विकल्या गेलेल्या 12,752 M&HCV च्या तुलनेत 13 टक्क्यांनी घसरली आहे.

किया इंडियाच्या विक्रीत जोरदार उडी –

दुसरीकडे, किया इंडियाच्या विक्रीत सप्टेंबरमध्ये 17 टक्क्यांनी वाढ झाली आहे. Kia ने सप्टेंबरमध्ये एकूण 23,523 वाहने विकली. Kia ने सप्टेंबर 2023 मध्ये 20,022 वाहने डीलर्सना पाठवली. किया इंडियाचे वरिष्ठ उपाध्यक्ष आणि विक्री आणि विपणन विभागाचे राष्ट्रीय प्रमुख हरदीप सिंग ब्रार यांनी सांगितले की, गणेश चतुर्थी आणि ओणम दरम्यान ग्राहकांचा उत्कृष्ट प्रतिसाद होता.