प्रभात वृत्तसेवा तळेगाव दाभाडे – तळेगाव दाभाडे नगरपरिषदेचे नवनिर्वाचित नगराध्यक्ष संतोष हरिभाऊ दाभाडे यांच्यासह एकूण २८ नगरसेवकांनी सोमवारी (दि. २९) अधिकृतपणे पदभार स्वीकारला. यानिमित्त नगरपरिषद भवनात आयोजित सत्कार समारंभ उत्साहात पार पडला.या समारंभास आमदार सुनील शेळके, सरसेनापती दाभाडे घराण्यातील अंजलीराजे दाभाडे, सत्येंद्रराजे दाभाडे, वृषालीराजे दाभाडे,उमाराजे दाभाडे यांची विशेष उपस्थिती होती. तसेच माजी राज्यमंत्री संजय (बाळा) भेगडे, खासदार श्रीरंग बारणे, मुख्याधिकारी गिरीष दापकेकर, राष्ट्रवादी काँग्रेस व भाजपाचे पदाधिकारी, तसेच माजी नगराध्यक्ष व्यासपीठावर उपस्थित होते.यावेळी आमदार सुनील शेळके यांनी नगरपरिषदेच्या गेल्या नऊ वर्षांतील कारभार, प्रलंबित विकासकामे तसेच निवडणुकीदरम्यान झालेल्या राजकीय घडामोडींचा आढावा घेत नवनिर्वाचित नगराध्यक्ष व नगरसेवकांना मार्गदर्शन केले. नगरपरिषद इमारत जितकी सुंदर आहे, तितकेच सुंदर शहर घडवण्याची जबाबदारी तुमच्यावर आहे, असे स्पष्ट शब्दांत त्यांनी सांगितले.प्रशासनाने कोणतीही हयगय न करता नवे विकास प्रस्ताव तयार करून त्यांचा सातत्याने पाठपुरावा करावा, अशी अपेक्षा माजी मंत्री संजय भेगडे यांनी व्यक्त केली. नगरसेवक गणेश काकडे यांनी सर्व नगरसेवक तळेगावच्या विकासासाठी सदैव तत्पर राहतील, असे आश्वासन दिले. नगराध्यक्ष संतोष दाभाडे यांनी आपल्या भाषणात सर्व नगरसेवकांना सोबत घेऊन जबाबदारीची जाणीव ठेवून काम करण्याचे आश्वासन दिले. समारंभात माजी नगराध्यक्ष अंजलीराजे दाभाडे, चित्रा जगनाडे, माजी नगरसेवक चंद्रभान खळदे तसेच खासदार श्रीरंग बारणे यांनीही शुभेच्छापर भाषणे केली. मुख्याधिकारी गिरीष दापकेकर यांनी नवनिर्वाचित नगराध्यक्ष व नगरसेवकांचे स्वागत करून पुढील वाटचालीस शुभेच्छा दिल्या. कार्यक्रमाच्या शेवटी नगरपरिषद अधिकारी भास्कर वाघमारे यांनी उपस्थितांचे आभार मानले.
